باكۋدا قازاقستاننىڭ رەسپۋبليكا كۇنى اتالىپ ءوتتى
قازاقستاننىڭ ازەربايجانداعى ەلشىلىگى رەسپۋبليكا كۇنىنە وراي سالتاناتتى قابىلداۋ وتكىزدى، دەپ حابارلايدى aqshamnews.kz
ءىس-شاراعا 900-گە جۋىق قوناق قاتىستى. مەرەكەمەن قۇتتىقتاۋ ءۇشىن ازەربايجان پارلامەنتىنىڭ دەپۋتاتتارى، مەملەكەتتىك ورگانداردىڭ باسشىلارى مەن وكىلدەرى، ديپلوماتيالىق ميسسيالار مەن حالىقارالىق ۇيىمداردىڭ جەتەكشىلەرى، ماڭعىستاۋ وبلىسىنىڭ اكىمدىگى وكىلدەرى، ازەربايجاندىق زيالى قاۋىم، قوعام بەلسەندىلەرى، بيزنەس قاۋىمداستىعى جانە ب ا ق وكىلدەرى، سونداي-اق ازەربايجاندا تۇراتىن قازاقستاندىقتار جينالدى.
قابىلداۋدىڭ رەسمي بولىگىندە قازاقستان مەن ازەربايجاننىڭ مەملەكەتتىك ءانۇراندارى شىرقالدى. قازاقستاننىڭ ازەربايجانداعى ەلشىسى ءالىم بايەل ءوز سوزىندە قازاق-ازەربايجان ىنتىماقتاستىعىنىڭ تابىستى دامىپ كەلە جاتقانىن اتاپ ءوتتى. بۇعان پرەزيدەنت ق. توقايەۆتىڭ ازەربايجانعا جانە پرەزيدەنت ي. الييەۆتىڭ قازاقستانعا بىرنەشە رەت جاساعان رەسمي ساپارلارى دالەل. ەكى ەلدىڭ قارىم-قاتىناسى ستراتەگيالىق ارىپتەستىكتەن وداقتاستىق دەڭگەيىنە كوتەرىلدى.
ەلشى ەكى ەلدىڭ ورتا ءدالىز (تحكب) جانە كاسپيي تەڭىزىنىڭ تۇبىمەن تالشىقتى-وپتيكالىق بايلانىس جەلىسىن تارتۋ سياقتى ماڭىزدى وڭىرلىك جوبالاردى بىرلەسىپ ىلگەرىلەتىپ جاتقانىن، سونداي-اق باستاپقى كاپيتالى 300 ميلليون دوللاردى قۇرايتىن قازاق-ازەربايجان ينۆەستيسيالىق قورىنىڭ قۇرىلعانىن اتاپ ءوتتى.
سونىمەن قاتار، ەلشى قاراشا ايىندا وتەتىن COP29 سامميتىندە قازاقستان، ازەربايجان جانە وزبەكستاننىڭ ورتالىق ازيادان ازەربايجان ارقىلى ەۋروپاعا جاسىل ەنەرگيا ەكسپورتتاۋعا باعىتتالعان جاڭا جوبانى ىسكە قوساتىنىن ايتتى. «قازاقستان ازەربايجاندى COP29 وتكىزۋ ميسسياسىندا تولىق قولدايدى جانە بۇل ماڭىزدى ءىس-شاراعا بەلسەندى قاتىسادى»، – دەپ قوستى ءا. بايەل.
ەلشى ناۋرىز ايىندا ەكى ەلدىڭ مەملەكەت باسشىلارىنىڭ قاتىسۋىمەن قازاقستاننىڭ ازەربايجان حالقىنا سىي رەتىندە فيزۋليدە سالعان بالالار شىعارماشىلىعى ورتالىعىنىڭ رەسمي اشىلعانىن، سونداي-اق الماتىدا ازەربايجان مەن ارمەنيا اراسىندا بەيبىت كەلىسسوزدەردىڭ وتكەنىن اتاپ ءوتتى.
سونداي-اق، ءا. بايەل ازەربايجان پرەزيدەنتى ي. الييەۆتىڭ «ءبىزدىڭ وتباسىمىز – تۇركى الەمى» دەگەن ءسوزىن قايتالاي وتىرىپ، قازاقستاننىڭ تۇركى مەملەكەتتەرى ۇيىمىنا ءتوراعالىق ەتىپ وتىرعان جىلى وسى ۇيىمنىڭ 15 جىلدىق مەرەيتويى اتالىپ ءوتىپ جاتقانىن ەسكە سالدى.
ءىس-شارانىڭ رەسمي بولىگىنىڭ سوڭىندا ءا. بايەل مەملەكەت باسشىسىنىڭ اتىنان بەلگىلى ازەربايجاندىق ساراپشى جانە قوعام قايراتكەرى فارحاد مامەدوۆكە ەكى ەل اراسىنداعى قاتىناستاردى دامىتۋعا قوسقان ەلەۋلى ۇلەسى ءۇشىن II دارەجەلى «دوستىق» وردەنىن تابىستادى.
سونىمەن قاتار، ءىس-شارا بارىسىندا ماڭعىستاۋ وبلىسى اكىمىنىڭ ورىنباسارى اببات ورىسبايەۆ قوناقتارعا ماڭعىستاۋ وبلىسىنىڭ ينۆەستيسيالىق جانە تۋريستىك الەۋەتى تۋرالى پرەزەنتاسيا ۇسىندى.
سالتاناتتى قابىلداۋدا قوناقتارعا ۇلتتىق تاعامدار مەن وتاندىق كومپانيالاردىڭ ونىمدەرى ۇسىنىلدى. سونداي-اق، ازەربايجاندىق جۋرناليست جانە فوتوگراف رۋستام گاسىموۆتىڭ قازاقستانعا ارنالعان اۆتورلىق فوتوكورمەسى ءوتتى. Air Astana جانە FlyArystan اۋە كومپانيالارى قازاقستانعا تەگىن بيلەتتەر ۇتىسى وتكىزدى. ماڭعىستاۋ وبلىسىنان ارنايى كەلگەن شىعارماشىلىق ۇجىم ونەر كورسەتىپ، قازاقستان مەن ازەربايجان اۆتورلارىنىڭ تۋىندىلارى شىرقالدى. كەش ءداستۇرلى ان-بيمەن جالعاستى.