850 دروننىڭ كومەگىمەن الماتىدا رەسپۋبليكا كۇنىنە وراي انيماسيالىق شوۋ ۇيىمداستىرىلدى
2024 جىلعى 25 قازاندا الماتىدا رەسپۋبليكا كۇنىن مەرەكەلەۋگە ورايلاستىرىلعان دروندار شوۋى ءوتتى. قالانىڭ مىڭداعان تۇرعىنى مەن قوناعى ۇمىتىلماس كورىنىستى تاماشالاۋ ءۇشىن اباي الاڭى مەن استانا الاڭىنا جينالدى، دەپ حابارلايدى aqshamnews.kz
اباي الاڭىنان 500-دەن استام درون سينحروندى تۇردە كوككە كوتەرىلىپ، بىرەگەي 3D ۆيزۋالدى بەينەلەر جاسادى. ينستاللياسيالار ۇلتتىق مادەنيەتتىڭ ەلەمەنتتەرىن جانە ەل تاريحىنداعى ماڭىزدى ساتتەردى بەينەلەپ، بىرلىك پەن ماقتانىش رۋحىن ەرەكشە بەينەلەدى. جارىق شوۋى مۋزىكالىق شىعارمالارمەن سۇيەمەلدەندى.
قالا تۇرعىندارى مەن قوناقتارى قازاقستان كارتاسىن، اڭىزعا اينالعان التىن ادامدى، نوتالار مەن دومبىرانى، كوك بايراعىمىزدى، الماتىنىڭ بىرەگەي فلوراسىنىڭ سيمۆولى — قىزعالداقتى، كۇش پەن بوستاندىقتى بەينەلەيتىن كەرەمەت قار بارىسىن جانە الماتى الماسى - اپورتتى، قالانى كورنەكتى عيماراتتارى مەن تاۋلارىن قىزىقتادى.
كەيىن 21:30-دا استانا الاڭىنان اسپانعا تاعى 350 درون كوتەرىلدى. كوكتە بوستاندىق پەن تاۋەلسىزدىكتىڭ سيمۆولى ىسپەتتى قالىقتاعان بۇركىتتىڭ بەينەسى، قازاقستان كارتاسى،«كوكتوبە» تەلەمۇناراسى، اسپالى جول جانە الماتىنىڭ تانىمال كورىكتى جەرلەرى، بەيبىتشىلىك پەن وتباسىلىق يگىلىكتىڭ سيمۆولى - شاڭىراق، قالاعا جانە جالپى ءبىزدىڭ ەلگە دەگەن سۇيىسپەنشىلىكتىڭ بەلگىسى رەتىندە جۇرەكتەر بەينەلەدى. ودان بولەك، «25 قازان – رەسپۋبليكا كۇنى قۇتتى بولسىن!» دەگەن قۇتتىقتاۋ ءسوزى پايدا بولدى.
استانا الاڭىنداعى شوۋ شامامەن 20 مينۋتقا سوزىلدى جانە دەمەۋشىلەر ەسەبىنەن ۇيىمداستىرىلدى.
ۇيىمداستىرۋشىلار ءداستۇرلى وتشاشۋدىڭ ورنىنا درونداردى پايدالانۋ — مەرەكەلەۋدىڭ يننوۆاسيالىق ءتاسىلى عانا ەمەس، سونىمەن قاتار تەحنولوگيالىق دامۋ مەن ەكولوگيالىق باستامالارعا دەگەن ۇمتىلىستىڭ سيمۆولى بولعانىن اتاپ ءوتتى. بۇل شەشىم قورشاعان ورتاعا اسەردى ازايتا وتىرىپ، بىرەگەي ۆيزۋالدى ەففەكتىلەردى جاساۋعا مۇمكىندىك بەردى.
