ءبىزدىڭ مۇرا» فەستيۆالىنىڭ كورمەسى اشىلادى

بۇل كورمە – قازاقستان قولونەرشىلەر وداعى مەن رەسپۋبليكا شەبەرلەرىنىڭ وزىندىك ەسەبى.

2021 جىلى 5 قاراشادا ساعات 15.00-دە ءابىلحان قاستەيەۆ اتىنداعى ق ر مەملەكەتتىك ونەر مۋزەيىندە «شەبەر – 2020/2021. ءبىزدىڭ مۇرا» فەستيۆالىنىڭ كورمەسى اشىلادى، دەپ حابارلايدى Almaty-akshamy.kz اتالعان مۋزەيدىڭ باسپا ءسوز قىزمەتىنە سىلتەمە جاساپ.

كونكۋرس  قازاقستان قولونەرشىلەر وداعىنىڭ ءتوراعاسى ايجان بەكقۇلوۆانىڭ  باسشىلىعىمەن 11 جىل بويى وتكىزىلىپ كەلەدى.

كورمەگە كەلگەن قوناقتار حالىق ىسمەرلەرىنىڭ داستۇرلەرى مەن قيال الەمىنە قول جەتكىزە الادى. ەكسپوزيسيانىڭ نەگىزىن رەسپۋبليكالىق «شەبەر» كونكۋرسى مەن «يۋنەسكو ساپا بەلگىسى» حالىقارالىق كونكۋرسى جەڭىمپازدارىنىڭ جۇمىستارى قۇرايدى. مۇندا جۇزدەن اسا بۇيىم بار. كورمەدە قازاقتىڭ ءداستۇرلى قول ونەرى مەن قازاقستاننىڭ زاماناۋي قولدانبالى ونەرى تۋىندىلارىنىڭ بارلىق سالاسى تۇگەل دەرلىك كورسەتىلەدى. ولاردىڭ ىشىندە كيىزدەن جاسالعان بۇيىمدار، زەرگەرلىك ونەر، كەستە – ءبىز كەستە، قىش، اعاش ويۋ، مەتالدى كوركەمدەپ وڭدەۋ، توقىما جانە ءداستۇرلى كيىمدەر بار.

كونكۋرستىڭ ماقساتى – رەسپۋبليكادا قولونەردى دامىتۋ، حالىقتىق ساندىك-قولدانبالى ونەردىڭ ۇمىتىلعان تۇرلەرىن جانداندىرۋ، قولونەر شەبەرلەرىن رەسپۋبليكالىق كونكۋرستارعا قاتىسۋعا تارتا وتىرىپ، قازاقستاننىڭ بارلىق وڭىرلەرىندە كوشپەلى كونسۋلتاسيالار مەن شەبەرلىك ساباقتارى ارقىلى ولارعا كومەك كورسەتۋ. «شەبەر» فەستيۆالى شىعارماشىلىق پروسەسكە دەم بەرىپ، ۇلتتىق ونەردى ناسيحاتتايدى. بۇل قالالىقتار ءۇشىن ۇلكەن مەرەكە، تۋريستەر ءۇشىن الماتىنىڭ كوركىن ارتتىرۋ ماقساتىندا جۇمىس ىستەيتىن وتباسىلار ءۇشىن تاماشا دەمالىس.

كورمەنى 2021 جىلدىڭ 5 جەلتوقسانىنا دەيىن تاماشالاۋعا بولادى.