ەرەكشە ستيل، بويالعان شاش، تاتۋ. ءبىر كەزدەرى كوپشىلىككە وسىنداي كەيىپپەن، «تۇسىنىكسىز» اندەرىمەن، ونىمەن قوسا وزدەرىنىڭ كيىم كيۋ ستيلدەرى، سول كەزدە كوزگە جات كورىنەتىن وبرازدارىمەن جارق ەتە قالعان «91 توبىن» جاقتاۋشىلاردان گورى ولارعا سىن ايتىپ، قارالاعاندار قاراسى قالىڭ بولدى. 2016 جىلدارى توپتىڭ كوپتەگەن كونسەرتتەرىن وتكىزۋگە تىيىم سالىنىپ، ءتىپتى توپ مۇشەلەرىنىڭ ومىرىنە ءقاۋىپ تونگەن كەزدەر دە جيىلەدى.
توپتىڭ كەسكىن-كەلبەتىنە، ايتقان اندەرىنە اشىق تۇردە سىندار ايتىپ، ءتىپتى وسى تاقىرىپتا تەلەارنا باعدارلامالارىندا كوپتەگەن توك-شوۋلار ءتۇسىرىلىپ، پىكىرتالاستار دا ايتىلدى. توپتى قولداۋشىلارعا قاراعاندا، ولاردى داتتاۋشىلاردىڭ، ولاردىڭ ونەرىنە تۇسىنبەۋشىلىكپەن قاراۋشىلار قاراسى قالىڭ بولدى. دەگەنمەن، وسىنداي قيىندىقتارعا قاراماستان، بۇگىندە Ninety One وزدەرىن مويىنداتقان، وزدەرىنىڭ ونەرىن قولدايتىن قالىڭ تىڭدارمانى بار جۇلدىزدارعا اينالدى دەۋگە تولىق نەگىز بار.
2023 جىلعى مامىردا توپتىڭ ءار قاتىسۋشىسى قازاقستانداعى يۋنيسەف ىزگى نيەت ەلشىلەرىنىڭ ءبىرى رەتىندە جەكە تاعايىندالعان بولاتىن.
توپتىڭ اندەرىندە ماڭىزدى ماسەلەلەر قوزعالادى جانە پوزيتيۆتىك قۇندىلىقتار ناسيحاتتالادى. ماسەلەن، «Bari biled» جانە «Why'm» اندەرىندە ءسوز بوستاندىعى، قورشاعان ورتانىڭ لاستانۋى جانە زورلىق-زومبىلىق سياقتى تاقىرىپتار كوتەرىلەدى.
Cۋرەت: Unicef.org
يۋنيسەف-تىڭ ىزگى نيەتتى ەلشىلەرى رەتىندە «NINETY ONE» قاتىسۋشىلارى يۋنيسەف-تىڭ بالالارعا مەديسينالىق، ءبىلىم بەرۋ جانە قورعاۋ قىزمەتتەرىنە قول جەتىمدىلىكتى قامتاماسىز ەتۋ ماقساتىن قولداپ، پسيحيكالىق دەنساۋلىق پەن ينتەرنەتتەگى قاۋىپسىزدىك جايىندا حاباردار بولۋ ماسەلەسىنە ەرەكشە نازار اۋدارادى.
«NINETY ONE» توبىنىڭ بالالاردىڭ ءومىرىن جاقسارتۋعا دەگەن ۇمتىلىسى شابىت بەرەدى. وزدەرىنىڭ مۋزىكاسى ارقىلى ولار قازاقستاندىق بالالار مەن ولاردىڭ وتباسىلارىنىڭ ءومىرىن جاقسى جاققا وزگەرتەدى. يۋنيسەف وسى مۋزىكالىق توپتىڭ مۇشەلەرى ىزگى نيەت ەلشىلەرى بولىپ تابىلاتىنىن ماقتان تۇتادى جانە ەلدىڭ بارلىق بالالارى ءۇشىن جارقىن بولاشاق قۇرۋعا باعىتتالعان بىرلەسكەن جۇمىستىڭ جالعاساتىنىنا ۇمىتتەنەدى.
بيىل توپتىڭ قۇرىلعانىنا – 8 جىل. وزگەشە لەپپەن كەلگەن جاڭاشا فورماتتاعى توپتى وردا توبىنىڭ ءانشىسى ەربولات بەدەلحان قۇرعان بولاتىن. ءيا، بۇل توپقا كوپ سىن ايتىلدى، «كۇيە» جاعىلدى، دەيتۇرعانمەن، ەرەكشە باعىتتاعى ونەر يەلەرى بۇعان سىنبادى. توپتىڭ نەگىزىن قالاۋشى ەربولات بەدەلحان توپتاعى جاستارعا ولاردىڭ وسىنداي كوپتەگەن سىنداردان وتەتىنىن ءاۋ باستا ايتىپ ەسكەرتكەن بولاتىن. توپتىڭ قۇرۋشىسى ءارى پروديۋسەرى بولعان ەربولات بەدەلحاننىڭ ءوزى دە وردا توبىنان شىققان ءانشى ەكەنى كوپكە بەلگىلى. وتكەن جىلدان بەرى 91-لىك جىگىتتەر پروديۋسەرسىز جۇمىس ىستەپ كەلەدى. ياعني، توپ پروديۋسەرىمەن جاسالعان جۇمىس توقتاپ، ءقازىر توپ ءوز الدىنا جەكە جۇمىس ىستەپ جاتىر. بۇل شەشىم - پروديۋسەردىڭ قالاۋى، توپتى اياعىنا تۇرعىزىپ، تىڭدارماندارىنىڭ ءوزى قالىڭ «اسكەرگە» اينالىپ، 91 مۇشەلەرىنىڭ قاناتى قاتايدى دەگەن كەزدە توپتى «ۇياسىنان» ۇشىرعان بولۋى كەرەك. توپتىڭ بەرگەن سۇحباتتارىنا قاراعاندا، بۇگىندە ولاردىڭ بۇرىنعى پروديۋسەرمەن قارىم-قاتىناسى جاقسى، ونەردەگى اعالارىنان ءالى دە بولسا، اقىل-كەڭەس الىپ تۇرادى.
Ninety One - ميلليونداعان جانكۇيەرلەردىڭ جۇرەگىن جاۋلاعان Q-pop باعىتىنداعى العاشقى قازاقستاندىق توپ. ءبىراق بۇل باعىتتىڭ ءوزى شەتەلدىك كارىستەردىڭ K-pop جانرىنان تۋىنداعان دەپ جاتادى. سىرت كەلبەتتەرى كارىستىڭ دورامالارىندا نازىكتەۋ كەلگەن كارىس جىگىتتەرىنەن اينىماي قالعان ءبىزدىڭ جىگىتتەر سول ونەردى وزدەرىنىڭ شاماسى جەتكەن «قازاقشا-پوپ»، ياعني Q-pop رەتىندە قالىپتاستىردى. باسىندا ايتىپ كەتكەنىمىزدەي، بۇل توپقا، جالپى ونەرىنە قارسىلىق كورسەتكەندەر، اياقتارىنان شالعىسى كەلگەندەر كوپ بولدى. «بۇلار ناشاقورلار، كوزدەرىن بوياپ، قۇلاقتارىن تەسىپ، نە ۇل، نە قىز ەكەنىن تۇسىنىكسىز» دەگەن سىڭايدا قارالاۋشىلار بولدى. شىن مانىندە، توپتىڭ ايتۋىنشا، ولاردىڭ بار قالاعانى – قازاق جاستارىنا وزدەرىنىڭ تىلىندە، ياعني قازاقشا Q-pop باعىتىندا ولاردىڭ سۇرانىسىن بەرۋ. سەبەبى، بۇل توپتى شەكتەگەنمەن، جاستار وسى باعىتتى ءبارىبىر شەتەلدىك توپتاردان ىزدەيتىن ەدى. سول تۇرعىدان العاندا، 91 توبى جاستاردىڭ سۇرانىسىن جاپتى. قازىرگى جاستاردىڭ اراسىندا ەكىنىڭ ءبىرىنىڭ وسى توپتى تىڭدايتىنىنا قاراپ، بۇعان كەلىسپەسكە دە بولمايدى دەپ قالدىق. وسى اقپاراتتى جازۋ بارىسىندا توپتىڭ You-tube ارناسىنداعى ءبىراز اندەرىن تىڭداپ، سوڭىندا جازىلعان پىكىرلەردى دە ەسكەردىك. ءبىر بايقاعانىمىز، توپ اندەرىن تىڭدايتىنداردىڭ باسىم بولىگى «ءتىلىمىز قانداي كەرەمەت، وسىعان دەيىن ونىڭ وسىنداي ادەمى ەكەنىن بىلمەپپىز» دەپ جازعان. بۇدان Q-pop باعىتى ارقىلى بولسا دا، ءتىلدىڭ ءقادىرىن ۇقتىرۋعا بولادى ەكەن دەگەن وي كەلدى.
ءبىر قىزىعى، توپتى ءسۇيىپ تىڭدايتىندار اراسىندا ۇلكەن ادامداردىڭ دا بار ەكەنىن اڭعاردىق. وعان دا مىسال كەلتىرىپ كەتەيىك: «جاسىم 61-دە. وسى توپتىڭ اندەرىن جاقسى كورىپ تىڭدايمىن. جاڭاشا باعىت جاستارعا جاراسىپ-اق تۇر. باستىسى، اندەرىنىڭ ءبارى قازاق تىلىندە» دەگەن ەكەن ءبىر اپامىز.
جالپى، پىكىرلەردىڭ ءبارىن وقىپ شىعۋ مۇمكىن ەمەس، اراسىندا شەتەلدىك تىڭدارماندارىنان دا پىكىرلەر كوپ ەكەن. تەرىس پىكىر دە جوق ەمەس، دەگەنمەن ءقازىر توپتىڭ ىزدەپ، جاڭا شىعاتىن اندەرىن كۇتىپ ءجۇرىپ تىڭدارماندارى كوپ ەكەنى انىق.
وسى رەتتە، Ninety One اندەرىن تىڭداۋ ارقىلى قازاق ءتىلىن ۇيرەنۋگە قىزىعۋشىلىعى ويانعان دەگەن شەتەلدىكتەر جايلى جاڭالىقتى كوزىڭىز شالعان بولار. اقش-تىڭ قازاقستانداعى ەلشىلىگى ەۆان اللەن ەسىمدى شەتەلدىكتىڭ وقيعاسىمەن بولىسكەن ەدى. تارازداعى ۋنيۆەرسيتەتتەردىڭ بىرىندە اعىلشىن تىلىنەن ساباق بەرەتىن ەۆان ورىس ءتىلىن مۇلدە بىلمەيتىنىن، سوندىقتان قازاق ءتىلىن ۇيرەنۋگە دەرەككوز تابۋ قيىن بولعانىن ايتقان.
«Ninety one توبىن تاپقان كەزدە قاتتى قۋاندىم. مەن ولاردىڭ اندەرىنەن ءتىلدى ۇيرەنە باستادىم، ولاردان سوزدەرى مەن ينتوناسيالاردى قايتالاي باستادىم. قازاق ءتىلىن ۇيرەنۋگە كوپ ۋاقىت جۇمسادىم»، – دەيدى شەتەلدىك.
ەۆان توپ اندەرىنىڭ بارلىق ءسوزىن بىلەدى ەكەن. توپ ونەرىنە دەگەن قىزىعۋشىلىق، سول ەلدىڭ ءتىلىن ۇيرەنۋگە جەتەلەسە – بۇل سول ۇلتقا دەگەن قۇرمەت دەپ باعالاۋ كەرەك شىعار.
ءبىر جىل پروديۋسەرسىز جۇمىس ىستەگەن توپ وسىدان 2 اي بۇرىن «گاپ» اتتا جاڭا البومدارىن جارىققا شىعاردى. توپتىڭ 8 جاسقا تولۋىن ولار اۋقىمدى تۇردە اتاپ ءوتتى. الدىمەن استانادا، كەيىننەن الماتىدا 1-قىركۇيەك كۇنى وتكەن كونسەرتتەرى ارقىلى قورىتىندىلادى. اسا جوعارى دايىندىقپەن وتكەن كونسەرتتەرىنە جينالعان تىڭدارماندارىنىڭ سول جەردەن جاريالاعان بەينە-ۇزىندىلەرى بۇگىندە الەۋمەتتىك جەلىلەردە جەتىپ ارتىلادى. تەك الماتىدا وتكەن كونسەرتىنىڭ وزىنە 9000 ادام بارعان.
توپتىڭ باسىنان بۇگىنگى كۇنگە دەيىنگى جاساعان جۇمىستارىن حرونولوگيالىق رەتپەن ۇسىنۋدى ءجون كودىك. تومەندەگى اقپارات قازاقشا ۆيكيپەديا نەگىزىندە جاسالدى:
توپ ۇجىمى 2015 جىلى «ايىپتاما» انىمەن دەبيۋت جاساپ، وزدەرىن تانىستىردى. ءان كوپتەگەن مۋزىكالىق چارتتاردان العاشقى ورىنداردى يەلەنىپ، بەينەبايانى مەن توپ مۇشەلەرىنىڭ سىرت كەلبەتتەرى ادامداردىڭ قىزىعۋشىلىقتارىن تۋدىردى. ارى قاراي، شىعارىلعان كۇنى-اق حيت بولعان ميني-البومدار مەن سينگلدەر حالىق نازارىنا ارتى-ارتىنان ۇسىنىلا باستادى. بەينەباياندارى YouTube جەلىسىندە كوپ قارالىمدار جيناپ، 120 ەلدىڭ مۋزىكالىق چارتتارىندا بوي كورسەتكەن بولاتىن.
2015: ايىپتاما انىمەن دەبيۋت الۋى
Ninety One توبى 2014 جىلى بولعان K-Top Idols جوباسىنىڭ نەگىزىندە KTI-boys دەگەن اتاۋمەن قۇرىلعان. ZAQ پەن A.Z بۇل جوبانىڭ جەڭىمپازدارى بولعان، ال ALEM مەن BALA توپقا كاستينگ ارقىلى قوسىلدى. ACE SM Entertainment اگەنتتىگىندە 2،5 جىل ستاجەر بولىپ، توپقا قوسىلدى. KTI-boys 1،5 جىل بويى كۇردەلى دايىندىقتان ءوتىپ، 2015 جىلدىڭ 1 قىركۇيەگىندە Ninety One اتاۋىمەن العاشقى «ايىپتاما» سينگلىن جارىققا شىعاردى. ءدال سول جىلدىڭ 8 قازان ايىندا وسى انگە بەينەبايان ءتۇسىرىلىپ، حالىق نازارىنا ۇسىنىلدى. كليپ Gakku TV ارناسىندا Top-10 شەرۋىندە 20 اپتا بويى ۇزدىك اتانىپ، 31 ناۋرىز كۇنى توپقا Gakku TV ارناسىنىڭ ارنايى سىيلىعى تابىستالدى.
سۋرەت: Yvision.kz
2016: قايتادان
2016 جىلدىڭ 3 اقپانىندا Ninety One توبىنىڭ «ايىپتاما» البومى «Apple Inc.» كومپانياسىنىڭ iTunes مەدياپلەەرىنە ەنگىزىلدى[3]. 2016 جىلدىڭ 2 ماۋسىمىندا الماتى قالاسىندا توپتىڭ «قايتادان» انىنە كەزەكتى بەينەبايان جارىققا شىقتى، ال 5 ماۋسىم كۇنى استانا قالاسىندا كليپتىڭ تۇساۋكەسەرى ءوتتى. بۇل بەينەبايان دا Gakku TV ارناسىندا Top-10 شەرۋىندە 20 اپتا بويى 1 ورىندا تۇرىپ كەزەكتى «Gakku Top Ten» ارنايى سىيلىعىن يەلەندى. 2016 جىلدىڭ 4 قىركۇيەگىندە استانا، ال 24 قىركۇيەك كۇنى الماتى قالاسىندا ونەرلەرىنە 1 جىل تولۋىنا وراي جەكە كونسەرتتەرىن بەردى. سول جىلى توپ قازاقستاننىڭ استانا، الماتى، شىمكەنت، تاراز، وسكەمەن، سەمەي، پەتروپاۆل، پاۆلودار، قاراعاندى جانە كوكشەتاۋ قالالارىندا ءوزىنىڭ جەكە كونسەرتتەرىن بەرىپ، 23 شىلدە - 5 تامىز ارالىعىندا قىتايدا وتكەن وردا توبىنىڭ جەكە كونسەرتىنە قاتىستى.
2017: «QARANGY ZHARYQ»
2017 جىلدىڭ 1 مامىرىندا ءتورت ايلىق ۇزىلىستەن كەيىن توپ «QARANGY ZHARYQ» اتتى جاڭا تولىق البومىنا ەنگەن «Su asty» انىنە تۇسىرىلگەن بەينەبايانمەن ساحناعا قايتا ورالدى (comeback). «QARANGY ZHARYQ» البومىنىڭ العاشقى ءبولىمىنىڭ تۇساۋكەسەرىندە جىگىتتەر اتالمىش البوم بەس شاعىن البومنان تۇراتىندىعىن جانە ءار البومعا ەكى ءان ەنەتىندىگىن ايتتى. سونىمەن قاتار البومنىڭ ىشىندە قازاقستاندىق العاشقى كوميكس - پايىم («paiym») جارىققا شاقتى. پايىم اتاۋى - Su Asty Corporation. قازىرگى كەزدە البومنىڭ تەك 2 ءبولىمى جارىق كوردى. 2017 جىلدىڭ 2 شىلدەسىندە 91 توبى "QARANGY ZHARYQ" اتتى رەسمي تۋرىن تالدىقورعاندا باستاپ، قازاقستاننىڭ تاراز (4 شىلدە)، ورال (7 شىلدە)، اقتاۋ (9 شىلدە)، قوستاناي (11 شىلدە)، وسكەمەن (13 شىلدە) جانە سەمەي (14 شىلدە) سياقتى قالالارىندا وزدەرىنىڭ جەكە كونسەرتتەرىن قويىپ، 16 شىلدە كۇنى قاراعاندى قالاسىندا تۋرلارىن اياقتادى.
توپ اتاۋى
كوپشىلىك اراسىندا توپ مۇشەلەرى 1991 جىلى تۋعان جىگىتتەردەن قۇرالعان دەپ ويلايدى. سول سەبەپتى دە توپ اتاۋىن 91 دەپ اتاعان دەپ ەسەپتەيدى.
الايدا توپ اتاۋى العاشىندا KTI-boys بولعان. سودان كەيىن 91- گە اۋىستى. توپتىڭ «NINETY ONE» دەپ اتالۋىن توپ مۇشەلەرى قازاقستاننىڭ 1991 جىلى الىنعان تاۋەلسىزدىگىمەن تۇسىندىرەدى. توپ اتاۋىنان توپ بۇنىمەن وزدەرىن دە، ءوز مۋزىكاسىنىڭ، ءستيلىنىڭ تاۋەلسىز ەكەنىن كورسەتكىسى كەلدى.
توپ مۇشەلەرىن ونىڭ تىڭدارماندارى ءوز ەسىمدەرىنەن گورى، لاقاپ اتتارىمەن جاقسىراق تانيدى.
ALEM – مالىك باتىرحان اباي ۇلى، 1993 جىلى 18 اقپاندا تۋعان. توپتىڭ ۇلكەنى، ۆوكاليستى، وزبەكستان، ءۇشقۇدىق تۋماسى. كىشىرەك كۇنىندە قوستانايعا كوشىپ كەلگەن.
ACE – ازامات قايرات ۇلى اشماقىن، 1993 جىلى 29 تامىزدا تۋعان.توپتىڭ ليدەرى، ۆوكاليست، جەتەكشى ءبيشى، توپ كەلبەتى، الماتى تۋماسى
ZaQ – دۋلات بولات ۇلى مۇحامەتقالي، 1996 جىلى 8 اقپاندى تۋعان، باس ءبيشى، رەپەر، سەمەيدىڭ تۋماسى
BALA – دانيار اقىلباي ۇلى قۇلىمشا، 1998 جىلى 19 اقپاندا تۋعان، باس ۆوكاليست، توپتىڭ كەنجەسى، اقتوبەنىڭ تۋماسى
A.Z - ازامات بايبولات ۇلى زەنكايەۆ، توپتىڭ ەكس-ليدەرى، رەپەر، 1993 جىلدىڭ 28 قىركۇيەگىندە اتىراۋ قالاسىندا دۇنيەگە كەلگەن.
توپ قۇرامىندا باستاپقىدا 5 ادام ەدى، 2020 جىلى 4 تامىزدا «ninetyone» ينستاگرام پاراقشاسىندا، ازامات زەنكايەۆ توپتان كەتەتىنى تۋرالى رەسمي تۇردە حابارلاندى. ءقازىر توپ قۇرامىندا 4 ءانشى بار.
ALEM
باتىرحان اباي ۇلى مالىك — توپ ۆوكاليستى، توپتىڭ ۇلكەنى. 1993 جىلدىڭ 18 اقپانىندا وزبەكستان رەسپۋبليكاسىنىڭ ءۇشقۇدىق قالاسىندا دۇنيەگە كەلگەن. وتباسىندا وزىنەن بولەك اعاسى جانە قارىنداسى بار. رەسەيدىڭ چەليابى قالاسىندا مادەنيەت جانە ونەر اكادەمياسىن اياقتاعان، سونىمەن قاتار مۋزىكا مەكتەبىنىڭ دومبىرا كلاسسىندا وقىعان. «قازاقستان داۋىسى» اتتى رەسپۋبليكالىق ۆوكالدى تەليەۆيزيالىق شوۋ جوباسىنىڭ ءفيناليستى. ح-فاكتور جوباسىنىڭ جارتىلاي ءفيناليستى. بارسەلونا (يسپانيا)، بەرلين (گەرمانيا) جانە رەسەي قالالارىندا وتكەن حالىقارالىق كونكۋرستار لاۋرەاتى.
ACE
ازامات قايرات ۇلى اشماقىن — توپ ۆوكاليستى، توپتىڭ كوشباسشىسى، جەتەكشى ءبيشى، 1993 جىلدىڭ 29 تامىزىندا الماتى قالاسىندا دۇنيەگە كەلگەن. ءىنىسى بار. تەمىربەك قارا ۇلى جۇرگەنوۆ اتىنداعى قازاق ۇلتتىق ونەر اكادەمياسىنىڭ كوللەدجىندە اكتەرلىك شەبەرلىك ماماندىعىن بىتىرگەن. وڭتۇستىك كورەيالىق پروديۋسەرلىك SM Entertainment (كور. SM엔터테인먼트) اتتى مۋزىكالىق اگەنتتىك اياسىندا 2012-2015 جىلدارى كورەيا رەسپۋبليكاسىندا ءبىلىم الىپ كەلگەن. سوندىقتان قازاق جانە ورىس تىلدەرىنەن بولەك كورەي ءتىلىن بىلەدى. تىلدەرگە دەگەن قىزىعۋشىلىعى وتە جوعارى. ميستيكالىق جانە ەزوتەريكالىق كىتاپتاردى وقىعاندى جاقسى كورەدى.
ZاQ
دۋلات بولات ۇلى مۇحامەتقالي — حورەوگراف، رەپەر، 1996 جىلدىڭ 8 اقپانىندا شىعىس قازاقستان وبلىسى، سەمەي قالاسىندا دۇنيەگە كەلگەن. وتباسىندا وزىنەن بولەك ءىنىسى جانە قارىنداسى بار. ءۇرجار اۋدانى ءۇرجار اۋىلىنداعى «ءىلياس جانسۇگىروۆ» اتىنداعى ورتا مەكتەپتە 11 جىل وقىعان. ابىلايحان اتىنداعى قازاق حالىقارالىق قاتىناستار جانە الەم تىلدەرى ۋنيۆەرسيتەتىندە وقىعان. ورىس تىلىنەن حالىقارالىق وليمپيادا جەڭىمپازى. "K-TOP IDOLS" جوباسىنىڭ جەڭىمپازى.
BALA
دانيار اقىلباي ۇلى قۇلىمشا — توپ ۆوكاليستى،ماكنە. 1998 جىلدىڭ 19 اقپانىندا اقتوبە قالاسىندا دۇنيەگە كەلگەن. سۋرەت سالعاندى ۇناتادى. جۇسىپبەك ەلەبەكوۆ اتىنداعى رەسپۋبليكالىق ەسترادا-سيرك كوللەدجىندە وقىعان. «Brotherhood» اسپاپتى توبىنىڭ بۇرىنعى مۇشەسى.
فاندوم
توپتىڭ فاندومى – «EagleZ». «EagleZ» اعىلشىن تىلىنەن اۋدارعاندا «قىراندار» دەگەن ماعىنا بىلدىرەدى. سوڭىنداعى «Z» ءارپىنىڭ قويىلۋ ەرەكشەلىگى دە بار. بۇل تىڭداۋشىلاردىڭ قازىرگى «Z بۋىنى» ەكەندىگىن كورسەتەدى. «EagleZ» اتاۋى توپتىڭ اتىمەن تىعىز بايلانىستى. توپ مۇشەلەرى جانكۇيەرلەرىن ەركىن، بيىكتەگى قىرانعا تەڭەيدى. جىگىتتەر وزدەرىنىڭ تالانتىمەن تەك قازاقستاندا ەمەس، سونىمەن قاتار رەسەي، ۋكراينا، ۇلىبريتانيا، تۇركيا، وڭتۇستىك كورەيا، امەريكا قۇراما شتاتتارى، كانادا، جۇڭگو جانە باسقا مەملەكەتتەردە ايگىلى بولىپ، EagleZ-دىڭ سانى كوبەيۋدە. شەتەلدىك جانكۇيەرلەر بەينەبايان جانە ۆيدەولارىنا رەاكسيا ءتۇسىرىپ، الەۋمەتتىك جەلىلەرگە جىبەرىپ وتىرادى.
توپ تۋرالى ەڭ-ەڭ دەگەن اقپاراتتاردى ءبىر جەرگە جيناپ بەرۋگە تىرىستىق. مۋزىكا الەمىنە تاپتاۋرىنداردى بۇزا وتىرىپ كىرگەن 91 توبى بۇگىندە كوپشىلىكتىڭ، اسىرەسە جاستاردىڭ سۇيىكتى توبىنا اينالدى. جاڭاشا لەپ اكەلگەن توپ وزدەرىن مويىنداتا ءبىلدى دەگەن ويدامىز. سوڭعى شىققان البومدارىن توپ "گاپ" دەپ اتاعان بولاتىن. نەگە "گاپ" دەپ اتاعاندارىن سۇراعاندا، ولار "ءار ادامنىڭ ءومىرى - ول ءوزىنىڭ تاڭداۋى . ال تاڭداۋ جاساعان كەزدە، ونىڭ ارتىندا ءبىر گاپ بار" دەپ جاۋاپ بەردى. NINETY ONE تاعى قانداي گاپ دايىنداپ ءجۇر ەكەن؟ قازاقستان شوۋ-بيزنەسىنە كەلگەندە شۋ جاساپ كەلگەن توپتىڭ قالاي بولعاندا دا ەلدىڭ شوۋ-بيزنەسىندە اتى قالارى انىق.شوۋ-بيزنەسكە كەلگەن كەزدەرىنەن جۇرتشىلىقتى ەلەڭ ەتكىزگەن توپقا الداعى ۋاقىتتا شىعارماشىلىق جەتىستىكتەر مەن ۇزاق عۇمىر تىلەيمىز.