الەمگە قازاقستان اتىن ايگىلەگەن، ەلگە وسىنداي سىيلىقتى تانىتقان قازاقتىڭ قارا بالاسى - يمانبەك زەيكەنوۆ.
ەلىمىزدىڭ اتىن حالىقارالىق ارەنادا تانىتىپ جۇرگەن قازاقستاندىقتار جايلى ايدارىمىزدى جالعاستىرامىز.
گرەممي جىل سايىن امەريكانىڭ ونەر جانە دىبىس جازۋ عىلىمى ۇلتتىق اكادەمياسى (NARAS) تاعايىندايتىن مۋزىكالىق پرەميا. بۇل سىيلىق اكادەميانىڭ بەلسەندى مۇشەلەرىنىڭ داۋىس بەرۋ ناتيجەسى بويىنشا تاعايىندالادى. ولاردىڭ قاتارىندا ارتىستەر، مۋزىكانتتار، پروديۋسەرلەر، ستۋديالىق دىبىس رەجيسسەرلەرى جانە الەمنىڭ دىبىس جازۋ سالاسىنداعى مايتالماندار بار. وسىلايشا، گرەممي مۋزىكالىق يندۋستريانىڭ ەڭ جوعارى ماراپاتى بولىپ تابىلادى، بۇل ونى كونسەپتۋالدى تۇردە كينوداعى وسكارمەن جانە تەليەۆيزيا سالاسىنداعى ەمميمەن بايلانىستىرادى.
«گرەممي» سىيلىعىن العان مىناداي بەلگىلى ادامدار مەن مۋزىكالىق توپتار بار: فرەنك سيناترا، The Beatles، The Rolling Stones، ستينگ، ەلۆيس پرەسلي، دجون لەننون، تينا تەرنەر، دجوردج بەنسون، بي بي كينگ، بوب ديلان، ۋيتني حيۋستون، مادوننا، بەيونسە، رياننا. ديريجەر گەورگ شولتي 31 رەت (رەكورد)، «U2» توبى 22 رەت، مايكل دجەكسون 13 رەت العان ەكەن. |
ال ءبىزدىڭ ەلىمىزدىڭ بۇگىنگى تاريحىندا تۇڭعىش Grammy سىيلىعىن پاۆلودار ءوڭىرىنىڭ تۋماسى يمانبەك زەيكەنوۆ يەلەندى.
ونىڭ نۇسقاسىندا شەتەلدىك ورىنداۋشىنىڭ انىنە جازىلعان رەميكس ءتورت اي بويى الەمدىك مۋزىكا چارتىنىڭ ۇزدىك وندىعىنان تۇسپەدى. بۇل قاراپايىم تەمىرجولشى قازاق جىگىتىنىڭ ءوز اتىن عانا ەمەس، ەلىمىزدى ونەر سالاسىندا تانىتقان، كوپشىلىكتى تاڭداندىرعان كەرەمەت جەتىستىگى بولدى.
يمانبەك زەيكەنوۆ 2000 جىلى 21 قازاندا پاۆلودار قالاسىنان 50 شاقىرىم جەردەگى اقسۋ قالاسىندا دۇنيەگە كەلگەن. سول جەردە وسىپ-ونگەن. يمانبەك 8 جاسىندا العاش رەت اكەسى سىيلاعان گيتارادا ويناعان. تەمىرجول ينستيتۋتىندا وقىپ جۇرگەندە، ول اقسۋ تەمىرجول ستانسياسىندا جۇمىس ىستەي باستادى. بىرنەشە جىل «قازاقستان تەمىر جولى» اق-نىڭ اقسۋداعى بولىمشەسىندە بەلگى بەرۋشى بولىپ جۇمىس ىستەدى. ال مۋزىكا ونىڭ بالا كۇنىنەن بەرگى ءحوببيى، يمانبەكتىڭ ارنايى مۋزىكالىق ءبىلىمى جوق. گيتارا تارتۋدى اكەسى ۇيرەتسە، مۋزىكا جاساۋدى ءوز بەتىنشە YouTube جەلىسىندەگى ۆيدەولاردى قاراي وتىرىپ ۇيرەنگەن.
Grammy سىيلىعىنا ۇسىنىلعان رەميكستى جاس تالانت نەبارى 2 ساعاتتىڭ ىشىندە جازىپ شىققان.
ايتا كەتەيىك، يمانبەك مۇنداي ماراپاتقا ۇسىنىلعان العاشقى قازاقستاندىق. بۇگىندە ونىڭ 50-گە جۋىق تۋىندىسى بار.
الەمدىك مۋزىكا باعىتىنداعى ايتۋلى سىيلىقتاردىڭ ءبىرى Grammy («گرەممي») جۇلدەسىنىڭ 63ء-ىنشى سالتاناتتى ماراپاتتاۋ ءراسىمى جاھاندىق پاندەمياعا بايلانىستى ونلاين وتكەن بولاتىن. زەيكەنوۆتىڭ امەريكالىق رەپەر Saint Jhn-نىڭ «Roses» كومپوزيسياسىنا (2016) ارناپ 2019 جىلى جاساعان رەميكسى ۇزدىكتەر قاتارىندا اتالدى. كوپتەگەن مۋزىكالىق پابليكتەردە امەريكالىق ورىنداۋشىنىڭ كومپوزيسياسىنا جازىلعان ونىڭ «ەڭ ۇزدىك رەميكس» نوميناسياسىنىڭ جەڭىپ العان تۋىندىسى بۇل ءاننىڭ العاشقى نۇسقاسىنان الدەقايدا ۇتىمدىراق شىعىپ، وعان ەكىنشى ءومىر سىيلاعانىن جانە تانىمال بولا تۇسۋىنە جول اشقانىن جارىسا جازىلدى.
ونىڭ شىعارماسى «حيت» بولعانىن ترەكتىڭ «Billboard Hot 100» ۇزدىك وندىعىندا 4 ايداي تۇردى. رەميكس Apple Musicء-تىڭ تور-10 قاتارىنا كىردى، Shazam مۋزىكالىق قوسىمشاسىندا 22 ملن قارالىم جيناپ، ۇزاق ۋاقىت بويى «ياندەكس. مۋزىكا» چارتىندا العاشقى ورىندى بەرمەي تۇردى.
ترەك بىرنەشە چارتتا، سونىڭ ىشىندە اقش پەن ۇلىبريتانيادا كوش باستاپ، The Weeknd، Dua Lipa، Billie Eillish، Roddy Ricch جانە Justin Bieber سياقتى ارتىستەردەن وزىق بولدى.
«ءار مۋزىكانتتىڭ مانساپ جولىنداعى ەڭ كەرەمەت ءسات – Grammy سىيلىعىن الۋ. ءبىز وسى جەتىستىككە قول جەتكىزدىك!» دەپ جازدى سول كەزدە يمانبەك.
گرەممي جۇلدەسىنە يە بولعاننان كەيىن كوپ ۇزاماي ونەرپاز Imanbek Rita Ora جانە David Guetta سياقتى الەمگە ايگىلى مۋزىكانتتارمەن بىرگە ءان جازعان.
قازاقستاندىق العاشقى گرەەمي يەگەرى جايلى امەريكالىق New York Times گازەتى ماقالا جاريالاعان.
«مەنىڭ جەتىستىگىمنىڭ جاھاندىق دەڭگەيگە يە ەكەنىن تۇسىنەمىن. ەندى مەن «ءبىر رەتتىك ءارتىس» ەمەس ەكەنىمدى دالەلدەۋىم كەرەك»، – دەدى مۋزىكانت The New York Times گازەتىنە بەرگەن سۇحباتىندا.
سونىڭ دالەلى رەتىندە قازاقستاندىق ديدجەي يمانبەك زەيكەنوۆتىڭ قورجىنىندا (Imanbek) Billboard Awards جۇلدەسىن دە كوپ ۇزاماي يەلەندى.
يمانبەك زەيكەنوۆ Saint JHN-نىڭ Roses انىنە جاساعان رەميكسى ءۇشىن «ۇزدىك ەلەكترون ءان» نوميناسياسىندا دا ماراپاتقا يە بولدى.
«Billboard Awards ماراپاتىن الدىم. ول دا Grammy سياقتى، تاعى ءبىر سىيلىق قانجىعادا»، دەگەن بولاتىن مۋزىكانت.
Billboard Music Award – مۋزىكالىق چارتتارداعى ۇزدىك جەتىستىكتەرى ءۇشىن امەريكالىق مۋزىكالىق باسپا Billboard باسىلىمى بەرەتىن مۋزىكالىق سىيلىق.
گرەمميدەن كەيىن جۇلدىزى جانعان قاراپايىم جىگىت بۇل جۇلدەسىنەن كەيىن وسى سىندى كوپتەگەن رەيتينگتەر مەن كونكۋرستاردا اتى اتالىپ، جاقسى جەتىستىكتەرگە جەتىپ ءجۇر. ول ءارتۇرلى ەلدەردىڭ جۇلدىزدارىمەن بىرلەسىپ، سانسىز جۇمىستار جاساپ ءجۇر.
بىلتىر Imanbekء-تىڭ تۋىندىسى 1 ملرد مارتە تىڭدالعانى ءۇشىن Spotify سىيلىعىنا لايىق دەپ تانىلعان بولاتىن.
ودان بولەك، قازاقستاندىق ديدجەي يمانبەك زەيكەنوۆ رەسەيدىڭ GQ جۋرالىنىڭ جىل سايىنعى سىيلىعىندا «جىل جاڭالىعى» اتالىمىندا جەڭىسكە جەتتى.
وسىلاي مۋزىكاعا دەگەن سۇيىسپەنشىلىگىنىڭ ارقاسىندا ءبىر-اق كۇندە تانىلعان يمانبەكتىڭ فوتوسى بيىل ناۋرىزدا نيۋ-يوركتەگى تايمس-سكۆەر عيماراتىنىڭ ەكرانىنا شىقتى. يمانبەك زەيكەنوۆ بۇل تۋرالى ءوزىنىڭ Instagram پاراقشاسىندا تايمس-سكۆەر عيماراتىنىڭ ەكرانىنا شىققان سۋرەتى ءۇشىن ەكى دىبىس جازۋ ستۋدياسىنا العىس ءبىلدىردى. بۇل ونىڭ امەريكاندىق مۋزىكانت تريەۆور دەنيەلمەن بىرلەسىپ جۇمىستانعان جاڭا ترەگىنىڭ جارناماسى.
ال ءبىز ءوز كەزەگىمىزدە ەلىمىزدىڭ جاقسى ءيميدجىن قالىپتاستىرۋدا ۇلەسىن قوسىپ جۇرگەن جىگىتتىڭ شىعارماشىلىعىنا شابىت، ءالى دە كوپتەگەن جەتىستىكتەرگە جەتۋىنە تىلەكتەسپىز!