بىزدە ءبارى بار، ءبىراق ينفراقۇرىلىم جوق

مادەنيەت جانە سپورت ءمينيسترى داۋرەن ابايەۆ قازاقستاننىڭ تۋريزمىنە 5 بالدىق شكالانىڭ 3 بالىن بەردى، دەپ حابارلايدى اlmaty-akshamy.kz

داۋرەن ابايەۆ ەلىمىزدىڭ تۋريزم سالاسىندا قانداي پروبلەمالار بارىن ايتتى.

ەڭ ءبىرىنشى – ينفراقۇرىلىم. مىسالى، ءقازىر وسى جەردەن كەز كەلگەن وڭىرگە ۆەلوسيپەدتەن بارا الاتىن بولساق، وندا ول ءتۋريزمدى دامىتا الادى. ياعني ينفراقۇرىلىم مەن قىزمەت كورسەتۋ سالاسىن دامىتۋ قاجەت، - دەيدى مينيستر.

ابايەۆ اتاپ وتكەندەي، بىزدە ءبىر تۋريستەن ءبىر جىلدىق جالاقىسىن الىپ قالعىسى كەلەتىندەر دە بار. ويىنشا، بۇل ءتۋريزمدى دامىتپايدى.

ءبىز ءتيىمدى ينفراقۇرىلىم جاساپ، قىزمەت كورسەتۋدى دامىتساق، ادامدار ول ورىندارعا ءبىر رەت ەمەس، ءتىپتى 100 رەت بارادى. بۇل بيزنەستىڭ دە تابىسىن كوبەيتۋگە سەپتىگىن تيگىزەدى، - دەپ ەسەپتەيدى مادەنيەت جانە سپورت سالاسى باسشىسى.

مينيستر قازاقستاننىڭ ءتۋريزمىن 5 بالدىق شكالامەن باعالادى.

- قازىرگى ۋاقىتتا ەلىمىزدىڭ تۋريزمىنە 5 بالدان 3 بالل بەرۋگە بولادى دەپ ويلايمىن. ويتكەنى قىزىق ورىندار، بارۋعا تۇرارلىق، بىر-بىرىنە مۇلدە ۇقسامايتىن جەرلەر بار. بىزدە تاۋ مەن تاس، ورمان مەن ءشول - ءبارى بار. سوندىقتان 5 بالعا جەتۋ ءۇشىن ينفراقۇرىلىم مەن سەرۆيستى دامىتۋىمىز كەرەك، - دەپ ءتۇسىندىردى ول.

ونىڭ ايتۋىنشا، ەلىمىزدە كەز كەلگەن تۋريسكە دەمالۋعا مۇمكىندىك بار. 

ايتا كەتەيىك، بۇگىن مادەنيەت جانە سپورت مينيسترلىگىنىڭ تۋريزم سالاسى بويىنشا كەڭەيتىلگەن القا وتىرىسى وتكەن بولاتىن.

وتىرىسقا پرەزيدەنت اكىمشىلىگى، ق ر پارلامەنتى، ۇكىمەت وكىلدەرى، مينيسترلىكتىڭ قوعامدىق كەڭەسىنىڭ مۇشەلەرى، «Kazakh Tourism» ۇلتتىق كومپانياسى» اق، وبلىستىق تۋريزم باسقارمالارىنىڭ باسشىلارى، بيزنەس جانە تۋريستىك قوعامداستىق وكىلدەرى قاتىسىپ جاتىر.