سالانى سيفرلاندىرۋعا ەرەكشە كوڭىل ءبولىنىپ جاتىر.
قازاقستاندا كورسەتىلەتىن مەملەكەتتىك قىزمەتتىڭ 93،4 پايىزى ەلەكتروندى فورماتقا اۋىستىرىلدى. بۇل تۋرالى ق ر مەملەكەتتىك قىزمەت ىستەرى اگەنتتىگىنىڭ كەڭەيتىلگەن القا وتىرىسىندا ايتىلدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«الداعى ۋاقىتتا مەملەكەتتىك قىزمەتتەر ساپاسىن باعالاۋدى كەزەڭ-كەزەڭمەن ونلاين فورماتقا كوشىرۋ جوسپارلانۋدا. ەلەكتروندىق قىزمەتتەردى دامىتۋعا كەلەر بولساق، بۇگىندە مەملەكەتتىك قىزمەت كورسەتۋ سالاسىن سيفرلاندىرۋعا ەرەكشە كوڭىل بولىنۋدە. تىزىلىمگە سايكەس، مەملەكەتتىك قىزمەتتەردىڭ 93،4% ەلەكتروندىق فورماتقا اۋدارىلدى»، - دەدى ق ر مەملەكەتتىك قىزمەت ىستەرى اگەنتتىگىنىڭ ءتوراعاسى دارحان جازىقبايەۆ اتالعان جيىندا.
ونىڭ ايتۋىنشا، اتالعان باعىتتاعى وڭ وزگەرىستەرگە قاراماستان، جەكەلەگەن مەملەكەتتىك قىزمەتتەر بويىنشا پروبلەما بار.
«اگەنتتىك تۇراقتى نەگىزدە «ەلەكتروندىق ۇكىمەت» پورتالىندا مەملەكەتتىك قىزمەتتەردىڭ كورسەتىلۋىنە مونيتورينگ جۇرگىزىپ، سونىڭ قورىتىندىسى بويىنشا پورتالدا ەلەكتروندىق قىزمەتتەردىڭ 189 تۇرىنە قولجەتىمدىلىكتىڭ جوقتىعىن انىقتادى. سونىمەن قاتار، اگەنتتىكتىڭ جەدەل مونيتورينگىنىڭ ارقاسىندا «ەلەكتروندىق ۇكىمەت» پورتالىندا 158 ەلەكتروندىق قىزمەتتىڭ قولجەتىمدىلىگى قامتاماسىز ەتىلدى»، - دەيدى ول.
سونىمەن قاتار اگەنتتىك باسشىسى مەملەكەتتىك قىزمەت سالاسى بويىنشا الەمدىك ۇزدىك تاجىريبەلەردىڭ زەرتتەلەتىندىگىن تىلگە تيەك ەتتى.
«مەملەكەتتىك قىزمەتشىلەردىڭ وزىنە جۇكتەلگەن تاپسىرمانى ۇتىمدى ورىنداۋى ءۇشىن، يكەمدى جۇمىس كەستەسى مەن قاشىقتىقتان جۇمىس ىستەۋ جاعدايىن جاساۋ قاجەت. ياعني جۇمىس جاساۋ كەڭىستىگىندەگى ءتيىمدى جاعدايلاردى پايدالانۋ تاجىريبەسىن كەڭەيتۋىمىز كەرەك. سول سەكىلدى الداعى ۋاقىتتا اگەنتتىك ساراپشىلارمەن ورتاق تالقىلاۋدىڭ قورىتىندىسىن جانە الەمدىك تاجىريبەنى جان-جاقتى زەردەلەپ، ناقتى ۇسىنىستاردى دايىندايدى»، - دەدى د.جازىقبايەۆ.