الماتى تۇرعىندارىنا بيىلعى جىلدىڭ توعىز ايىندا كورسەتىلگەن مەديسينالىق كومەك ساپاسىن باقىلاۋ بارىسىندا 50 مىڭنان استام قىزمەتتىڭ ءتۇرلى كەمشىلىكتەرمەن كورسەتىلگەنى انىقتالدى. ناتيجەسىندە قالاداعى ەمدەۋ مەكەمەلەرىنە 1،3 ملرد تەڭگەدەن استام ايىپپۇل سالىندى دەپ حابارلايدى almaty-akshamy.kz «الەۋمەتتىك مەديسينالىق ساقتاندىرۋ قورى» كەاق الماتى فيليالى سىلتەمە جاساپ.
مەديسينالىق قىزمەت ساپاسىن باقىلاۋ ءبولىمى جەتەكشىسى اسەم ماناپبايەۆانىڭ ايتۋىنشا، كەمشىلىكتىڭ باسىم بولىگىنە كونسۋلتاتيۆتىك-دياگنوستيكالىق كومەك كورسەتەتىن كلينيكالار تاراپىنان جول بەرىلگەن. جالپى، كونسۋلتاتيۆتىك-دياگنوستيكالىق كومەك بويىنشا 45 مىڭنان استام قىزمەت ءتۇرلى كەمشىلىكپەن كورسەتىلگەن. ناتيجەسىندە 80 ملن تەڭگە قايتارىپ الىندى.
اقاۋمەن كورسەتىلگەن 5،8 مىڭ قىزمەت – ستاسيونارلار مەن ستاسيوناردى الماستىراتىن كومەك ۇيىمدارىنا تيەسىلى. اتالعان كەمشىلىكتەر ءۇشىن ستاسيونارلار مەن ستاسيوناردى الماستىراتىن مەكەمەلەر 1،2 ملرد تەڭگەدەن استام ايىپپۇل تولەدى.
ال، كەمشىلىكتەرگە جول بەرگەن ەمحانالار قورعا 60 ملن تەڭگە قايتاردى.
«مونيتورينگ بارىسىندا انىقتالعان كەمشىلىكتەردىڭ دەنى ەمدەۋ-دياگنوستيكا بارىسىندا بەلگىلەنگەن ستاندارتتاردان اۋىتقۋ، مەديسينالىق قۇجاتتاردى دۇرىس تولتىرماۋ، قىزمەت باعاسىن نەگىزسىز ءوسىرۋ سىندى ولقىلىقتارعا كەلىپ سايادى. سونىمەن قاتار، «كورسەتىلدى» دەپ جازىلعان بەلگىلى ءبىر قىزمەت تۇرلەرىنىڭ شىن مانىندە كورسەتىلگەنىن راستاي الماعان كلينيكالار دا بار»، – دەدى اسەم ماناپبايەۆا.
مسق كورسەتىلگەن قىزمەت ساپاسىنا تۇراقتى باقىلاۋ جۇرگىزىپ وتىرادى. كورسەتىلگەن قىزمەت اقىسى تىڭعىلىقتى تەكسەرۋدەن كەيىن تولەنەدى.
بۇعان دەيىن حابارلانعانداي، قايتارىپ الىنعان قاراجات مەديسينالىق كومەكتىڭ وزگە تۇرلەرىنە جۇمسالادى.