بيىلدان قالماي ءقاۋىپسىز ەڭبەك تۇجىرىمداماسى ازىرلەنەدى

وندىرىستە ءولىم-جىتىم جيىلەپ كەتتى.

ماسەلەن، حالىقارالىق ستاندارت بويىنشا 500 وقيعادا ءبىر عانا شىعىن بولۋى ءتيىس. ال ءبىزدىڭ ەلدە 11 جاعدايدا ءبىر ادام كوز جۇمادى. ساراپشىلار قوعامدى الاڭداتقان وسى ماسەلەنى ەلورداداعى فورۋمدا تالقىلادى. ەندى بيىلدان قالماي، ءقاۋىپسىز ەڭبەك تۇجىرىمداماسى ازىرلەنۋى ءتيىس، دەپ حابارلايدى Almaty-akshamy.kz.

24.kzء-تىڭ دەرەكتەرىنە سۇيەنسەك، قۇجاتتا جۇمىسكەرلەردىڭ ەڭبەك جاعدايىنداعى ساپانى ارتتىرۋ، ەڭبەك رەسۋرستارىن ۇنەمدەۋ كوزدەلمەك. وندىرىستەگى ەڭبەك قاۋىپسىزدىگىن باعالاۋدا جاراقات الۋ كورسەتكىشى، جابدىقتاردىڭ قاۋىپسىزدىگى، جەكە قورعانۋ قۇرالدارىمەن قامتاماسىز ەتۋ جانە سىرقاتتانۋ دەڭگەيى قامتىلادى. سونداي-اق كاسىپورىنداردىڭ سيفرلىق كارتاسى ازىرلەنەدى. بۇل كارتادا ەڭبەك جاعدايىن تولىق كورۋگە بولادى. ماتەريالدىق-تەحنيكالىق بازاعا مونيتورينگ جاسالىپ، سوعان سايكەس جاڭعىرتۋ جۇمىستارى جۇرگىزىلەدى.

«ءاربىر جۇمىس ورنى باعالانسا، ءاربىر جۇمىسكەرىنىڭ ناقتى ونىڭ جاعدايى قانداي جۇمىس ورنىندا جانە دە ول قانشالىقتى قاماتماسىز ەتىلدى كەپىلدىك بويىنشا، قۇرالدار بويىنشا، ارنايى كيىم بويىنشا، سوندا ول وعان ناقتى الەۋمەتتىك، ەكونوميكالىق ەففەكت بەرەدى دەپ ويلايمىن. ول، ەڭ باستىسى، شىن ايتساق، ەڭ تۇپكىدە مۇنىڭ بارلىعى جۇمىستىڭ جاعدايىن، جۇمىسكەردىڭ جاعدايىن جاسايدى»، - دەيدى ەڭبەكتى قورعاۋ جونىندەگى رەسپۋبليكالىق عىلىمي-زەرتتەۋ ينستيتۋتى باس ديرەكتورىنىڭ ورىنباسارى ءالىمجان بەكماعانبەتوۆ.