جاڭا كەن ورىندارى وندىرىلگەن العاشقى گازدى جىل سوڭىنا دەيىن الۋ جوسپارلانىپ وتىر
ۇكىمەتتە ق ر پرەمەر-مينيسترى ءاليحان سمايىلوۆتىڭ توراعالىعىمەن وتكەن كەڭەستە ىشكى نارىقتىڭ قاجەتتىلىگىن تولىق قامتاماسىز ەتۋ ءۇشىن سۇيىتىلعان مۇناي گازىن ءوندىرۋدى ۇلعايتۋ شارالارى قارالدى، دەپ حابارلايدى Almaty-akshamy.kz.
جيىندا ەلىمىزدەگى گاز تۇتىنۋدىڭ جىل سايىن ارتىپ كەلە جاتقانى، اتاپ ايتقاندا، وتكەن جىلدىڭ قورىتىندىسىنا سايكەس بۇل كورسەتكىش 1،8 ملن توننانى قۇراعانى ايتىلدى. بۇل كولەمنىڭ 65%-عا جۋىعى اۆتوكولىكتەرگە، 25%-ى ونەركاسىپ كاسىپورىندارىنا، 10%-ى حالىقتىڭ قاجەتتىلىكتەرىنە جانە باسقا دا سالالارعا جۇمسالدى. 2023 جىلعى بولجامدى گاز تۇتىنۋ كولەمى 1،9 ملن توننانى قۇرايدى.
«ارتىپ كەلە جاتقان قاجەتتىلىكتەردى وتەۋ ءۇشىن ءبىرقاتار كەلەشەگى بار جاڭا كەن ورىندارى يگەرىلە باستايدى. ولاردان العاشقى وندىرىلگەن گازدى وسى جىلدىڭ سوڭىنا دەيىن الۋ جوسپارلانىپ وتىر»، - دەلىنگەن حابارلامادا.
پرەمەر-مينيستر جانار-جاعارماي نارىعىنداعى جاعدايدى ۇدايى باقىلاۋدىڭ جانە ازاماتتاردى، ونەركاسىپ كاسىپورىندارى مەن الەۋمەتتىك مەكەمەلەردى ۇزدىكسىز قامتاماسىز ەتۋ ءۇشىن جوسپارلانعان جوبالاردى ۋاقتىلى ىسكە اسىرۋدىڭ ماڭىزدى ەكەنىن اتاپ ءوتتى.