بيىلدان باستاپ ءبىرىنشى سىنىپ وقۋشىلارى ءبىر تىلدە عانا ءبىلىم الادى – اسحات ايماعامبەتوۆ

ءبىلىم سالاسىنا جاڭالىقتار ەنگىزەتىلۋدە

بيىلدان باستاپ ءبىرىنشى سىنىپ وقۋشىلارى ءبىر تىلدە عانا ءبىلىم الادى. بۇل تۋرالى وقۋ-اعارتۋ ءمينيسترى اسحات ايماعامبەتوۆ تۇركىستان وبلىسىنىڭ تۇرعىندارىمەن كەزدەسۋدە ايتتى، دەپ حابارلايدى Almaty-akshamy.kz قازاقپارات-قا سىلتەمە جاساپ. 
مينيستر 1 قىركۇيەكتەن باستاپ ءبىلىم سالاسىنا ەنگىزەتىلەتىن جاڭالىقتاردى اتاپ ءوتتى. ياعني، بيىلعى وقۋ جىلىنان باستاپ قازاق مەكتەبىنىڭ ءبىرىنشى سىنىبىنا بارعان بالالار تەك قازاق تىلىندە ءبىلىم الادى. 

«مۇنىڭ الدىندا ءبىرىنشى سىنىپقا بارعان بالا اعىلشىن ءتىلىنىڭ الىپپەسىن وقۋ كەرەك بولدى. ورىس ءتىلىنىڭ الىپپەسىن، قازاق ءتىلىنىڭ الىپپەسىن وقۋ كەرەك بولدى. بۇل 6 جاستاعى بالا ءۇشىن قيىن. بالانى دامىتۋ ءۇشىن انا ءتىلىن ۇيرەتىپ العان وتە ماڭىزدى. ءبىز سول شەشىمدى قابىلدادىق. بيىلدان باستاپ قازاق ءتىلدى مەكتەپكە بارعان بالالار، تەك قازا تىلىندە جازىپ، ۇيرەنەتىن بولادى» - دەدى، اسحات ايماعامبەتوۆ. 

سونداي-اق، مينيستر پەداگوگتاردىڭ مارتەبەسىن كوتەرۋ باعىتىندا اتقارىلىپ جاتقان جۇمىستاردىڭ ناتيجە بەرە باستاعانىن جەتكىزدى. 

«مۇعالىمدەردى وزدەرىنە ءتان ەمەس جۇمىستاردان بوساتتىق. جالاقىسى ءوستى. ءقازىر بۇل ماسەلە نەگىزىندە شەشىلدى. سونىڭ ىشىندە ءارتۇرلى قۇجات، ءارتۇرلى ەسەپ تاپسىرۋ بويىنشا ۇلكەن پروبلەما بولدى. جالپى مەن قول قويعان بۇيرىق بويىنشا پەداگوگ بىرىنشىدەن كۇندەلىكتى ەلەكتروندى جۋرنالعا باعا قويادى. ەكىنشىسى كۇندەلىكتى وقۋ جوسپارىن دايىندايدى. ءبىتتى، باسقا ەشتەڭە بولماۋى كەرەك. كىمدە-كىم وسى بۇيرىقتى بۇزاتىن بولسا، وندا ءبىز ولاردى قاتاڭ جاۋاپكەرشىلىككە تارتامىز. الدىڭعى جىلى وسى باعىتتا 700-گە جۋىق ادام ءتۇرلى جاۋاپكەرشىلىككە تارتىلدى»، - دەدى مينيستر.