تەكسەرۋ جۇمىستارى قىركۇيەك ايىنا دەيىن جالعاسادى
جولاۋشىلار پويىزدارىندا كورسەتىلەتىن قىزمەتتەردىڭ ساپاسىن ارتتىرۋ ماقساتىندا ارنايى تەكسەرىس جۇرگىزىلۋدە، دەپ حابارلايدى Almaty-akshamy.kz.
قىركۇيەك ايىنا دەيىن جالعاساتىن شارانى ييدم كولىك كوميتەتى، ءىىم كولىكتەگى پوليسيا دەپارتامەنتى مەن سىبايلاس جەمقورلىققا قارسى ءىس-قيمىل اگەنتىگى بىرلەسىپ ۇيىمداستىرۋدا.
«بۇگىندە پويىزداردىڭ تەحنيكالىق جاي-كۇيىمەن قاتار تاسىمالداۋ كەزىندەگى قاۋىپسىزدىككە دە ءجىتى نازار اۋدارىلىپ وتىر. وسىعان وراي اعىمداعى جىلدىڭ العاشقى بەس ايىندا تەمىر جول سالاسىنداعى 220 كاسىپورىنعا تەكسەرۋ جۇرگىزىلدى. تەكسەرىس ناتيجەسىندە 4 091 بۇزۋشىلىق انىقتالىپ، جىلجىمالى قۇرامنىڭ 47 بىرلىگىن پايدالانۋ توقتاتىلدى»، - دەپ جازدى يندۋستريا جانە ينفراقۇرىلىمدىق دامۋ مينيسترلىگى رەسمي سايتىنا.
سونداي-اق اۋماقتىق كولىكتىك باقىلاۋ ورگاندارى 200 جولاۋشىلار پويىزىن تەكسەرىپ، جولاۋشىلاردى تاسىمالداۋ قاعيدالارىنىڭ تالاپتارىن بۇزۋعا قاتىستى 431 كەمشىلىك انىقتاعان. بيلەتسىز جولاۋشىلاردى تاسىمالداۋعا قاتىستى 33 وقيعانىڭ جولى كەسىلىپ، 31 ملن تەڭگە كولەمىندە ايىپپۇل وندىرىلگەن.
«قازىرگى تاڭدا جولاۋشىلارمەن كەرى بايلانىس ورناتۋ جانە تاسىمالداۋ كەزىندەگى ساپانى ارتتىرۋ ماقساتىندا كولىك كوميتەتىنىڭ احۋالدىق ورتالىعىنىڭ بازاسىندا تاۋلىك بويى ارنايى Whatsapp ءنومىرى جۇمىس ىستەيدى. 2022 جىلدىڭ العاشقى التى ايىندا اتالعان جەلىگە مىڭنان استام ءوتىنىش پەن شاعىم كەلىپ ءتۇستى»، - دەلىنگەن جازبادا.