«بالالار جىلى» اياسىندا العاش رەت اشىلعان تۋريستىك-شاتىرلى لاگەر

كاسپيي جاعالاۋىندا وقۋشىلارعا ارنالعان لاگەر شاتىرلارى تىگىلدى 

ماڭعىستاۋلىق بالالار جازعى دەمالىستارىن تەڭىز جاعالاۋىندا قۇرىلعان تۋريستىك شاتىرلى لاگەرلەردە وتكىزىپ جاتىر، دەپ حابارلايدى Almaty-akshamy.kz قازاقپارات-قا سىلتەمە جاساپ.

«بالالار جىلى» اياسىندا ماڭعىستاۋدا العاش رەت تۋريستىك-شاتىرلى لاگەر اشىپ وتىرمىز. دەمالىس كەزىندە بالالاردىڭ بوس ۋاقىتىن ءتيىمدى ۇيىمداستىرۋ ماقساتىندا جوسپارلاندى. العاشقى اۋىسىم قۇرىق تەڭىزى جاعالاۋىندا ءوتىپ جاتىر. شاتىرلى لاگەرگە بەينەۋ، ءتۇپقاراعان اۋداندارىنان 60 بالا كەلدى. ولار ءۇش كۇن بويى ورتكە قارسى ساقتىق شارالارىن، تابيعاتتى قورعاۋ، كارتامەن جۇمىس ىستەۋ، كەدەرگىلەرمەن شاتىر ورناتۋ، وت جاعۋ، ءبىرىنشى دارەجەلى كومەك كورسەتۋ، توتەنشە جاعدايلاردا وز-وزىنە قىزمەت كورسەتۋ داعدىلارىن يگەرەدى. سونداي-اق، ءتۇرلى تانىمدىق شارالار وتكىزىلەدى»، - دەيدى وبلىستىق بالالار مەن جاسوسپىرىمدەر ءتۋريزمى ورتالىعىنىڭ ديرەكتورى اياجان تەمىرلانوۆا.

تەڭىز جاعاسىنداعى لاگەردە 6 شاتىر تىگىلگەن. تورتەۋى – بالالاردىڭ جاتىن ورنى، قالعان ەكەۋى – اسحانا، شتاب، مەدپۋنكت پەن دەمالىس بولەمەسى. سونداي-اق، مۇندا ساحنا مەن بي، فۋتبول، ۆولەيبول الاڭشالارى، دۋش كابينالارى بار. تۋريستىك شاتىرلى لاگەرلەردە جاز ايلارىندا ماڭعىستاۋلىق 13-15 جاس ارالىعىنداعى 300 بالا دەمالادى. ال، بۇدان كەيىنگى شاتىرلار ۇشتاعان، تاۋشىق، اقمىش اۋىلدىق ساياباعى، اقەسپە تاۋىندا تىگىلمەك.