قازاقستاندىقتاردىڭ زەينەتاقى جيناقتارى جىل باسىنان بەرى 455 ملرد تەڭگەگە كوبەيدى
جىل باسىنان بەرى ينۆەستيسيالىق تابىس تۇسكەن جارنالار سوماسىنان اسىپ ءتۇستى. 2021 جىلدىڭ 1 جەلتوقسانىنداعى جاعداي بويىنشا، ءبىرىڭعاي جيناقتاۋشى زەينەتاقى قورى سالىمشىلارىنىڭ شوتتارىندا 13،4 تريلليون تەڭگەدەن استام زەينەتاقى جيناقتارى قالىپتاستى، دەپ حابارلايدى Almaty-akshamy.kz 24.kz-كە سىلتەمە جاساپ
01.12.2020 - 01.12.2021 ارالىعىنداعى ءبىر جىل ىشىندە زەينەتاقى جيناقتارىنىڭ سوماسى 648،8 ميلليارد تەڭگەگە نەمەسە 5%-عا ءوستى، ال 2021 جىلدىڭ قاڭتار ايىنان بەرى 455 ملرد تەڭگەگە نەمەسە 4 پايىزعا ءوستى.
زەينەتاقى جيناقتارىنىڭ نەگىزگى سوماسى مىندەتتى زەينەتاقى جارنالارى (مزج) ەسەبىنەن جيناقتالدى، ونىڭ مولشەرى 13،0 ترلن تەڭگە (سوڭعى 12 ايداعى ءوسىم – 5%). مىندەتتى كاسىپتىك زەينەتاقى جارنالارى (مكزج) بويىنشا زەينەتاقى جيناقتارىنىڭ سوماسى 361،8 ملرد تەڭگە (ءوسىم – 17%)، ال ەرىكتى زەينەتاقى جارنالارى (ەزج) بويىنشا زەينەتاقى جيناقتارىنىڭ سوماسى 1،7 ملرد تەڭگەگە جەتتى. 2021 جىلدىڭ ونى ءبىر ايىندا بجزق سالىمشىلارى وتكەن جىلدىڭ سايكەس كەزەڭىنە قاراعاندا كوبىرەك قاراجات سالدى. 2021 جىلدىڭ 1 جەلتوقسانداعى جاعداي بويىنشا سالىمشىلاردىڭ شوتتارىنا جالپى كولەمى 1،2 ترلن تەڭگە زەينەتاقى جارنالارى ءتۇستى، بۇل 2020 جىلدىڭ سايكەس كەزەڭىندەگى كورسەتكىشتەن 227،9 ملرد تەڭگەگە نەمەسە 24% ارتىق. جارنالاردىڭ جالپى كولەمىنىڭ 95،7% بجزق-عا مزج بويىنشا تۇسىمدەر قۇرايدى، ول 1،1 ترلن تەڭگە (سوڭعى 12 ايداعى ءوسىم - 24%)، مكزج بويىنشا 50،4 ملرد تەڭگە (ءوسىم 17%)، 660 ملن تەڭگە (ءوسىم 38%) ەزج بويىنشا اۋدارىلدى.
سالىمشىلاردىڭ جارنالارىنان باسقا، زەينەتاقى جيناقتارىنىڭ ايتارلىقتاي ءوسۋى 2021 جىلعى 1 قاڭتار ايىنان 1 جەلتوقسانىنا دەيىن 1،3 تريلليون تەڭگەدەن استام تازا ينۆەستيسيالىق تابىستىڭ ارقاسىندا قامتاماسىز ەتىلدى.
بۇل بىلتىرعى كورسەتكىشتەردەن 210 ملرد تەڭگەگە نەمەسە 19 پايىزعا اسىپ تۇسكەن. قازاقستان ۇلتتىق بانكىنىڭ باسقارۋىمەن بجزق زەينەتاقى اكتيۆتەرى بويىنشا كىرىستىلىك جىل باسىنان بەرى 11،0%، ال ينفلياسيا 7،8% قۇرادى. بۇل رەتتە سوڭعى 12 ايداعى كىرىس – 11،77% ، وسى كەزەڭدەگى ينفلياسيا – 8،7% كورسەتتى. بجزق-داعى جەكە زەينەتاقى شوتتارىنىڭ سانى 2021 جىلدىڭ 1 جەلتوقسانىنداعى جاعداي بويىنشا 11،7 ملن بىرلىككە تەڭ.
شوتتاردىڭ ەڭ كوپ سانى مىندەتتى زەينەتاقى جارنالارى (مزج) بويىنشا اشىلعان، ولاردىڭ سانى – 10 868 712 بىرلىك. ودان ءارى مكزج ەسەبىنەن قالىپتاسقان شوتتار – 542 397 بىرلىك. بجزق-داعى ەزج ەسەبىنەن قالىپتاسقان شوتتار سانى ءقازىر 59 217 بىرلىك بولدى. جىل باسىنان بەرى بجزق سالىمشىلارىنا شامامەن 2،4 ترلن تەڭگە تولەندى، تولەمدەردىڭ باسىم بولىگىن تۇرعىن ءۇي جاعدايىن جاقسارتۋ مەن ەمدەلۋ اقىسىن تولەۋ ماقساتىندا الىنعان ءبىرجولعى زەينەتاقى تولەمدەرى (بزت) قۇرادى، ونىڭ كولەمى – 2،1 ترلن تەڭگە. جاسى بويىنشا تولەمدەر – 89،2 ملرد تەڭگە.
ساقتاندىرۋ ۇيىمدارىنا اۋدارىمدار 54،1 ملرد تەڭگەنى قۇراسا، مۇراگەرلىك بويىنشا تولەمدەر – 52،5 ملرد تەڭگە، ق ر شەگىنەن تىس تتج كەتۋگە بايلانىستى تولەمدەر – 37،5 ملرد تەڭگە، جەرلەۋگە – 5،0 ملرد تەڭگە جانە مۇگەدەكتىك بويىنشا تولەمدەر 2،0 ملرد تەڭگە.
ايتا كەتەرلىك جايت، كەستە بويىنشا بجزق-دان تولەنەتىن اي سايىنعى ورتاشا تولەم سوماسى (زەينەت جاسىنا تولۋىنا بايلانىستى) 28 431 تەڭگە، ال اي سايىنعى تولەمنىڭ ەڭ جوعارى سوماسى 673 643 تەڭگە بولدى.