سيفرلىق پلاتفورما ىسكە قوسىلدى
يندۋستريا جانە ينفراقۇرىلىمدىق دامۋ ءمينيسترى قايىربەك وسكەنبايەۆ پرەزيدەنت تاپسىرمالارىنىڭ ورىندالۋ بارىسى جايلى ايتىپ بەردى، دەپ حابارلايدى Almaty-akshamy.kz.
«وزدەرىڭىزگە ءمالىم، بيىل شىلدە ايىندا مەملەكەت باسشىسى قاسىم-جومارت توقايەۆ ۇكىمەتتىڭ كەڭەيتىلگەن وتىرىسىندا ءبىزدىڭ مينيسترلىككە «قازاۆتوجول» مەن «كازاحاۆتودوردى» بىرىكتىرىپ، ءبىرتۇتاس اۆتوجول كومپانياسىن قۇرۋدى تاپسىرعان بولاتىن. پرەزيدەنت تاپسىرماسىن جۇزەگە اسىرۋ ماقساتىندا ءبىز اتالعان ەكى جول وپەراتورىن بىرىكتىرۋ بويىنشا ۇكىمەت قاۋلىسىنىڭ جوباسىن دايىنداپ، ول ۇكىمەت مۇشەلەرى تاراپىنان قولداۋ تاپتى. وسىلايشا، «قازاۆتوجول» مەن «كازاحاۆتودور» ءبىرتۇتاس جول كومپانياسىنا بىرىكتىرىلدى. بۇگىن ەكى جول وپەراتورىن قوسۋ جۇمىسى باستالدى. تاياۋ ارادا اتالعان كومپانيالاردىڭ وبلىستىق فيليالدارىنىڭ اكىمشىلىك-باسقارۋ پەرسونالىن قىسقارتۋ جولىمەن بىرىكتىرۋ جوسپارلانعان»، - دەپ جازدى مينيستر Telegram پاراقشاسىندا.
ونىڭ ايتۋىنشا، جىل باسىنان بەرى پرەزيدەنتتىڭ مينيسترلىككە جۇكتەگەن 95 تاپسىرماسى ورىندالعان.
بىرىنشىدەن، حالىقتىڭ الەۋمەتتىك جاعىنان از قامتىلعان توبىنا جالدامالى تۇرعىن ءۇيدى سۋبسيديالاۋعا ارنالعان ءوتىنىم قابىلدايتىن سيفرلىق پلاتفورما ىسكە قوسىلدى. اتالعان پلاتفورما ارقىلى ازاماتتار تاراپىنان 32 مىڭعا جۋىق ءوتىنىم كەلىپ ءتۇسىپ، ونىڭ 8 مىڭعا جۋىعى ماقۇلدانعان.
ەكىنشىدەن، قالالاردىڭ كەشەندى قۇرىلىسىنىڭ جاڭا ستاندارتى قابىلداندى. اتالعان قۇجات قالالىق جەردە ءومىر ءسۇرۋ ورتاسى مەن تۇرعىن ۇيگە قاتىستى قولايلى جاعداي جاساۋدى كوزدەيدى.
ۇشىنشىدەن، «ە-شاڭىراق» اقپاراتتىق جۇيەسى ىسكە قوسىلدى. اقپاراتتىق جۇيەنى جاساۋ بارىسىندا سالانىڭ بىتىراڭقى اقپاراتتىق جۇيەلەرىن بىرىكتىرەتىن تۇرعىن ءۇي كوممۋنالدىق شارۋاشىلىقتىڭ سيفرلىق جۇيەسىن قۇرۋعا باسىمدىق بەرىلدى.
بۇل جۇيە اۋقىمدى اقپاراتتاردى تالداۋ ەسەبىنەن ءتيىمدى باسقارۋ شەشىمىن قابىلداۋعا مۇمكىندىك بەرەدى دەگەن سەنىمدەمىن. جوبا مەملەكەتتىك-جەكەمەنشىك ارىپتەستىك تەتىگى بويىنشا بيۋدجەتتىك قارجىلاندىرۋسىز ىسكە اسىرىلدى.
تورتىنشىدەن، بيىل ارنايى ەكونوميكالىق ايماقتاردىڭ تيىمدىلىگىن ارتتىرۋعا جانە اەا باسقارۋشى كومپانيالارىنىڭ كادرلىق قۇرامىن نىعايتۋعا ارنالعان جول كارتاسى قابىلداندى. بۇل قۇجات ارقىلى ءبىز ارنايى ەكونوميكالىق ايماقتاردىڭ قىزمەتىن رەفورمالاۋ شارالارىنا باسىمدىق بەردىك.
بەسىنشىدەن، حالىقارالىق جۇك تاسىمالىن دامىتۋ ءۇشىن ۇيىمداستىرۋ ءىس-شارالارىنىڭ جوسپارى ازىرلەندى. اتالعان قۇجات ەلىمىزدىڭ ترانزيتتىك الەۋەتىن ارتتىرۋعا تىڭ سەرپىن بەرەدى دەپ ويلايمىز.
التىنشىدان، اۆتوكولىك قۇرالدارى مەن اۋىل شارۋاشىلىعى تەحنيكالارىن شىعاراتىن وتاندىق زاۋىتتارعا كەڭ كولەمدەگى تەكسەرۋ جۇمىستارى اياقتالدى. ءاربىر كاسىپورىنعا جان-جاقتى تالداۋ جۇرگىزىلىپ، انىقتالعان كەمشىلىكتەردى تۇزەتۋ بويىنشا ءتيىستى ۇسىنىستار بەرىلدى.
جەتىنشىدەن، سوڭعى ءۇش جىلدا سالىنعان ۇيلەرگە ريەۆيزيا جۇرگىزىلىپ، ەسەپ پەن ناقتى ءىستىڭ شىنايىلىعى تەكسەرىلدى. اتاپ ايتقاندا، 2019-2021 جىلدارى ارالىعىندا ەلىمىزدە 45،5 ملن شارشى مەتر تۇرعىن ءۇي پايدالانۋعا بەرىلگەن. جەرگىلىكتى اتقارۋشى ورگاندار بەرگەن اقپارات بويىنشا گەوپورتالعا ەنگىزىلگەن تۇرعىن ءۇي كولەمى 43،3 ملن شارشى مەتردى قۇرايدى. ونىڭ 83 پايىزى تەكسەرىس بارىسىندا راستالدى. ال قالعان 17 پايىز باسپانا پايدالانۋعا بەرۋ تۋرالى اكتىنىڭ جوق بولۋىنا، قۇرىلىستىڭ اياقتالماۋىنا جانە جەر ۋچاسكەسىن ماقساتسىز پايدالانۋعا بايلانىستى راستالمادى.
سەگىزىنشىدەن، روپ وپەراتورىنىڭ قاراجاتىن پايدالانا وتىرىپ، وتاندىق اۋىل شارۋاشىلىعى تەحنيكاسىن ساتىپ الۋعا ارنالعان جەڭىلدەتىلگەن نەسيە بەرۋ تەتىگىن ەنگىزۋ مەحانيزمى ىسكە قوسىلدى. وسىلايشا، وزدىگىنەن جۇرەتىن اۋىل شارۋاشىلىعى تەحنيكالارىن جاڭارتۋ باعىتىندا 30 ملرد تەڭگە (ارالاس كوزدەر ارقىلى تارتىلاتىن قاراجاتتى قوسا ەسەپتەگەندە – 40 ملرد تەڭگە) ءبولىندى. سونىمەن قاتار بۇگىندە وتانداستارىمىز جەڭىلدەتىلگەن اۆتونەسيە باعدارلاماسىنا دا قاتىسۋدا.
«مەملەكەت باسشىسىنىڭ بارلىق تاپسىرماسى ەرەكشە باقىلاۋىمىزدا جانە دەر كەزىندە ورىندالىپ جاتىر» دەپ اتاپ ءوتتى قايىربەك وسكەنبايەۆ.