تۋبەركۋلەزدەن بولاتىن ءولىم-جىتىمنىڭ 17 پايىزعا تومەندەگەنى بايقالادى.
بيىل انا ءولىمى 3،5 ەسە تومەندەدى. بۇل تۋرالى بۇگىن سەناتتاعى ۇكىمەت ساعاتىندا دەنساۋلىق ساقتاۋ ءمينيسترى اجار عينيات ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«حالىقتىڭ دەنساۋلىعىن نىعايتۋ - ۇكىمەتتىڭ ماڭىزدى مىندەتتەرىنىڭ ءبىرى. مەملەكەت باسشىسىنىڭ حالىققا مەديسينالىق كومەك كورسەتۋدىڭ تيىمدىلىگىن ارتتىرۋ جونىندەگى تاپسىرمالارى اياسىندا كەشەندى جۇمىس جۇرگىزىپ جاتىرمىز. ەلىمىزدە بيىل رەسمي ستاتيستيكا بويىنشا، دەنساۋلىق ساقتاۋدىڭ نەگىزگى كورسەتكىشتەرىنىڭ وڭ ءۇردىسى بايقالادى. 2020-2021 جىلدارى پاندەمياعا بايلانىستى حالىقتىڭ دەنساۋلىعى كۇرت ناشارلاعان بولاتىن. ول تەك قازاقستاندا عانا ەمەس، بارلىق دۇنيەجۇزىندە بايقالعان ءۇردىس. ماسەلەن، وتكەن جىلدىڭ ۇقساس كەزەڭىمەن سالىستىرعاندا بيىل 9 ايدا حالىقتىڭ جالپى ءولىم-جىتىم كورسەتكىشى 28 پايىزعا تومەندەپ وتىر»، - دەدى مينيستر.
ونىڭ دەرەگىنشە، قان اينالىمى جۇيەسى اۋرۋلارىنان بولاتىن ءولىم-جىتىم كورسەتكىشىنىڭ شامامەن - 32، وبىردان – 9، جاراقاتتان - 4، تىنىس الۋ اعزالارىنىڭ اۋرۋلارىنان بولاتىن ءولىم-جىتىم - 33، ال تۋبەركۋلەزدەن بولاتىن ءولىم-جىتىمنىڭ 17 پايىزعا تومەندەگەنى بايقالادى.
«بيىل انا ءولىم-جىتىمى 3،5 ەسەگە تومەندەدى. نارەستە ءولىم-جىتىمىنىڭ ابسوليۋتتىك سانى 200-دەن استام بالاعا تومەندەپ وتىر. ال اۋرۋشاڭدىق قازىرگى الدىن الۋ زەرتتەۋلەرىنىڭ ارقاسىندا جانە كوۆيدتىڭ سالدارىنان بۇگىندە ءوسىپ وتىر. حالىق دەنساۋلىعى كورسەتكىشتەرىنىڭ جاقسارۋى حالىقارالىق رەيتينگتەردە دە بايقالادى. ماسەلەن، 2021 جىلدىڭ قورىتىندىسى بويىنشا بىرىككەن ۇلتتار ۇيىمىنىڭ تۇراقتى دامۋ ماقساتتارى رەيتينگىندە قازاقستان رەسپۋبليكاسى پوزيسياسىنىڭ جاقسارعانى بايقالادى. 2020 جىلى 193 ەلدىڭ ىشىندە قازاقستان 65ء-شى ورىندى يەلەندى. ال 2022 جىلدىڭ باسىندا بىرىككەن ۇلتتار ۇيىمى ءبىزدىڭ مەملەكەتىمىزدىڭ رەيتينگىن 6 پوزيسياعا كوتەرىپ، 59-ورىنعا دەيىن جاقسارتتى»، - دەدى اجار عينيات.