قازاقستاندا مەكتەپ وقۋشىلارىن پروفيلاكتيكالىق تەكسەرۋدەن وتكىزۋگە جانە ساۋىقتىرۋعا 2022 جىلعا 26،1 ملرد تەڭگە قاراستىرىلعان، دەپ حابارلايدى Almaty-akshamy.kz Inform.kz-كە سىلتەمە جاساپ.
«2020 جىلى مەكتەپ مەديسيناسى قارجىلاندىرۋدىڭ جەكە باعىتىنا شىعارىلدى. سول كەزدە وعان 18،5 ملرد تەڭگە، ال 2021 جىلى – 22،2 ملرد تەڭگە ءبولىندى. ال بيىلعى جىلى مەكتەپ وقۋشىلارى ءۇشىن الدىن الا تەكسەرۋ مەن ساۋىقتىرۋ ءىس-شارالارىنا 26،1 ملرد تەڭگەگە شارت جاسالدى» - دەپ ءمالىم ەتتى «الەۋمەتتىك مەديسينالىق ساقتاندىرۋ قورى» كوممەرسيالىق ەمەس اكسيونەرلىك قوعامى نۇر-سۇلتان قالاسى بويىنشا فيليالىنىڭ باسپا ءسوز قىزمەتىنەن.
بالالار جەڭىلدىككە يە ساناتقا كىرەدى جانە مەملەكەت ەسەبىنەن مىندەتتى الەۋمەتتىك مەديسينالىق ساقتاندىرۋ (ءمامس) جۇيەسىندە ساقتاندىرىلعان. تەگىن قىزمەتتەردى بالالار مەديسينالىق ساقتاندىرۋ قورىمەن شارت جاساسقان مەديسينالىق ۇيىمداردان الا الادى. مەكتەپ مەديسيناسى بالالارعا كومەكتى تىكەلەي ءبىلىم بەرۋ ۇيىمدارىندا، ياعني مەكتەپتەردە، بالاباقشالاردا، شاعىن ورتالىقتاردا نەمەسە باسقا دا ءبىلىم وشاقتارىندا كورسەتۋدى كوزدەيدى. بۇرىن مەكتەپ مەديسيناسى ۋچاسكەلىك قىزمەتكە بولىنگەن قاراجات ەسەبىنەن قارجىلاندىرىلعان. ءمامس جۇيەسى ەنگىزىلگەننەن كەيىن ول جەكە پوزيسياعا شىعارىلدى.
«بيىل قور ءبىلىم بەرۋ ۇيىمدارىندا مەديسينالىق قىزمەت كورسەتۋگە 436 ەمحانامەن 26،1 ملرد تەڭگەگە جۋىق سوماعا شارت جاسادى. سالىستىرا قاراساق: 2020 جىلى مەكتەپ مەديسيناسىنىڭ قىزمەتىن 417 مەديسينالىق ۇيىم، 2021 جىلى – 430 مەديسينالىق ۇيىم كورسەتتى، شارتتاردىڭ قۇنى 22،2 ملرد تەڭگەنى قۇرادى. الدىن الا قورىتىندى بويىنشا، 2022 جىلدىڭ 1 توقسانىندا شامامەن 6،4 ملرد تەڭگەگە مەكتەپ مەديسيناسى قىزمەتى كورسەتىلدى»، - دەلىنگەن باسپا ءسوز بايانىندا.
مەكتەپ مەديسيناسىنىڭ ءمانى – ءبىلىم بەرۋ ۇيىمدارىنداعى بالالاردى قاجەتتى مەديسينالىق قىزمەتتەرمەن قامتاماسىز ەتۋ. بۇل جۇمىس مەكتەپ نەمەسە بالاباقشا ورنالاسقان اۋماققا قاراستى ەمحانا جاۋاپكەرشىلىگىندە بولادى. ول ءۇشىن مەكتەپتە مەديسينا قىزمەتكەرىنىڭ جابدىقتالعان كابينەتتەرى بار ارنايى قىزمەت قۇرىلادى.
پروفيلاكتيكالىق تەكسەرۋ نەمەسە ۆاكسيناسيا جۇرگىزۋ ءۇشىن مەكتەپكە (نەمەسە بالاباقشاعا) ءتيىستى پروفيلدەگى دارىگەرلەر كەلەدى. مۇنداي ءىس-شارالار الدىن الا جوسپارلانادى جانە اتا-انالارعا كۇنى بۇرىن حابارلانادى. مەكتەپ مەديسيناسىنىڭ تاريفىنە ۆاكسيناسيا، جىل سايىنعى پروفيلاكتيكالىق تەكسەرۋ، ءتىس دارىگەرىنىڭ تىكەلەي وقۋ ورنىندا جۇرگىزەتىن تەكسەرۋى كىرەدى.
سونداي-اق وقۋ ورنىنداعى دارىگەرلەر بالالارعا سالاۋاتتى ءومىر سالتىن ۇستانۋ جونىندە ءىس-شارالار وتكىزەدى. ەگەر كاسىبي تەكسەرۋدە پاتولوگيا انىقتالعان بولسا، وندا بالا تىركەلگەن جەرى بويىنشا ەمحاناعا تەرەڭدەتىلگەن مەديسينالىق تەكسەرۋگە جىبەرىلەدى. بالالاردى ۆاكسينالاۋ اتا-انا كەلىسىمىمەن ۇلتتىق ەگۋ كۇنتىزبەسى بويىنشا جۇرگىزىلەدى. شۇعىل جاعدايلاردا مەديسينالىق پۋنكتىدە جەدەل جاردەم بريگاداسى كەلگەنگە دەيىن بالالارعا العاشقى كومەك كورسەتىلەدى.