30 مامىر كۇنى ساع. 10:00-دە «سارىارقا» جانە «باۋىرجان مومىش ۇلى» مەترو ستانسيالارى ىسكە قوسىلادى. ولار قازىرگى قىزمەت كورسەتىپ تۇرعان توعىز ستانسيانىڭ جالعاسى رەتىندە قالا ورتالىعىن جاتىن اۋداندارمەن بايلانىستىرادى دەپ حابارلايدى almaty-akshamy.kz
ەكى جاڭا ستانسيا ىسكە قوسىلعاننان كەيىن مەترو جەلىسىنىڭ جالپى ۇزىندىعى 3،1 شاقىرىمعا ۇزارىپ، ەندى 13،4 شاقىرىمدى قۇرايتىن بولادى. جەلى بويىنا 7-10 مينۋت سايىن جۇرەتىن تورتۆاگوندى 15 ەلەكتر پويىزىن جىبەرۋ جوسپارلانعان.
قازىرگى تاڭدا مەترو كۇنىنە 45 مىڭعا جۋىق جولاۋشى تاسىمالدايدى. جاڭا ستانسيالار ىسكە قوسىلعاننان كەيىن بۇل كورسەتكىش كۇنىنە 85 مىڭ جولاۋشىعا دەيىن وسەدى دەپ كۇتىلۋدە.
«ماسكەۋدەن» كەيىنگى «سارىارقا» ستانسياسى اباي داڭعىلى بويىندا التىنسارين داڭعىلى مەن ساين كوشەلەرىنىڭ ارالىعىندا Family Park ماڭىندا ورنالاسقان. تەرەڭ سالىنعان، ەكى كىرەبەرىسى مەن ءبىر ۆەستيبيۋلى بار. ستانسيادا ەكى جەدەلساتى مەن سەگىز ەسكالاتور ورناتىلعان. ينتەرەر جاساۋ كەزىندەگى نەگىزگى يدەيا – سارىارقانىڭ شەكسىز كەڭ دالاسىنىڭ اسەمدىگىن كورسەتۋ. قابىرعالارى ءمارمار تاستاردان قۇراستىرىلىپ، گرانيتپەن ورنەكتەلگەن. شەتكى جاعىنداعى قابىرعادا جازىق دالانىڭ ۇستىنەن شىعىپ كەلە جاتقان كۇن، ونىڭ بەرگى جاعىندا قازاقستان استاناسى بەينەسى ماڭىندا شاۋىپ كەلە جاتقان جۇيرىك اتتار بەينەلەنگەن پاننو ورناتىلعان.
«باۋىرجان مومىش ۇلى» ستانسياسى اباي داڭعىلى بويىندا مومىش ۇلى كوشەسىنىڭ باتىسىندا ورنالاسقان. تاياز ورنالاسقان، ەكى ۆەستيبيۋل مەن التى كىرەبەرىسى بار. ستانسيادا التى جەدەلساتى مەن ون بەس ەسكولاتور ورناتىلعان. پلاتفورما ۇزىندىعى 108 م. الماتى مەترو جەلىسىنىڭ ون ءبىرىنشى ستانسياسى ازىرگە سوڭعى ستانسيا بولىپ سانالادى.
ستانسيا ۇلكەن تۇرعىن الابىنىڭ ورتاسىندا ورنالاسقان. قابىرعالار مەن تىرەۋىشتەردى بەزەندىرۋ ءۇشىن اشىق رەڭكتى مارجان-سۇر ءتۇستى اعاش تەكتەس كەراميكالىق پانەلدەر، ال ەدەندى قاپتاۋعا – اشىق سۇر ءتۇستى تابيعي گرانيت پايدالانىلعان.
بولاشاقتا «قالقامان» ستانسياسى قۇرىلىسىن اياقتاپ، مەترونى باتىس باعىتتا «بارلىق» بازارىنا دەيىن دامىتۋ جوسپارلانعان.