بيىل ءماجىلىستىڭ ءۇشىنشى سەسسياسىندا 90 زاڭ قابىلدانىپ، ەل ءومىرىنىڭ ءتۇرلى سالاسىنا قاتىستى ماڭىزدى وزگەرىستەر ەنگىزىلدى. ءماجىلىس ءتوراعاسى ەرلان قوشانوۆ بۇل سەسسيانى "الەۋمەتتىك ادىلەتتىلىك پەن زاڭ ۇستەمدىگىن نىعايتقان جىل" دەپ باعالادى. بيىلعى سەسسيادا قابىلدانعان نەگىزگى زاڭدار مەن شەشىمدەر قانداي بولدى؟ اqshamnews.kz ءتىلشىسىنىڭ ماتەريالىمەن ەسكە ءتۇسىرىپ وتەيىك.
7 الەۋمەتتىك زاڭ: مەديسينا مەن بالا قۇقىعى الدىڭعى قاتاردا
ءماجىلىس ازاماتتاردىڭ الەۋمەتتىك جاعدايىنا ەرەكشە ءمان بەرىپ، مىندەتتى الەۋمەتتىك مەديسينالىق ساقتاندىرۋ جۇيەسىن قايتا قارادى. ەندى ساقتاندىرىلماعان ازاماتتار دا العاشقى جۇگىنگەن كەزىندە تەگىن كومەك الا الادى. سونىمەن قاتار:
-
ونكولوگيالىق سكرينينگتەر – تەگىن مەديسينالىق كومەكتىڭ كەپىلدىك بەرىلگەن كولەمىنە ەنگىزىلدى؛
-
ەستۋ قابىلەتى تومەن بالالار – جەرگىلىكتى بيۋدجەت ەسەبىنەن ەستۋ اپپاراتىمەن قامتاماسىز ەتىلەدى.
بالالاردىڭ قۇقىعىن قورعاۋ بويىنشا:
-
كاسىبي وتباسى ينستيتۋتى ەنگىزىلىپ، بالالار ۇيىنە جىبەرۋدىڭ ورنىنا ارنايى وتباسىلار قامقورشى بولادى؛
-
«كەلەشەك» جيناق جۇيەسى ەنگىزىلىپ، بالالارعا بىلىمگە ارنالعان قارجىلىق قولداۋ ارتادى؛
-
حالىقارالىق وليمپيادا جەڭىمپازدارى – "بولاشاق" باعدارلاماسى ارقىلى گرانتتى اۆتوماتتى تۇردە الا الادى.
قاۋىپسىزدىك پەن ادىلەت: جاڭا قىلمىستىق نورمالار مەن راقىمشىلىق
قىلمىستىق زاڭنامالار دا جاڭارىپ، قوعامداعى وزەكتى ماسەلەلەرگە تىكەلەي جاۋاپ بەرەتىن ءبىرقاتار زاڭدار قابىلداندى:
-
ينتەرنەت-الاياقتارعا ("دروپپەرلەرگە") جازا كۇشەيتىلدى؛
-
نەكەگە ماجبۇرلەۋ – ەندى قىلمىس سانالادى؛
-
بەت-الپەتتى بۇركەمەلەيتىن كيىمگە تىيىم سالىندى؛
-
ەسىرتكىمەن العاش ۇستالعان جاستارعا راقىمشىلىق قاراستىرىلىپ، 3000-نان استام ءىس قايتا قارالىپ جاتىر.
سونىمەن قاتار، راقىمشىلىق تۋرالى زاڭ قابىلدانىپ، 15 مىڭ ادامنىڭ جازا مەرزىمى قىسقارىپ، 2 مىڭعا جۋىعى بوستاندىققا شىعاتىن بولدى.
ەكونوميكادا – 4 نەگىزگى قۇجات: سالىق، بيۋدجەت، قور، دەربەستىك
ءماجىلىس جاڭا بيۋدجەت كودەكسىن قابىلداپ، بيۋدجەت راسىمدەرىن ەكى ەسە قىسقارتتى. بۇل قارجىنىڭ جۇمسالۋىن ءتيىمدى ءارى اشىق ەتپەك. ەڭ كوپ تالقىلاۋ تۋدىرعان – جاڭا سالىق كودەكسى:
"ءبىز سالىق اۋىرتپالىعىن ارتتىرۋ ارقىلى بيۋدجەت كىرىسىن كوبەيتۋگە جول بەرمەدىك"، – دەدى قوشانوۆ.
سالىق جۇيەسى ەندى حالىق پەن بيزنەس ءۇشىن تۇسىنىكتى، ءادىل ءارى تۇراقتى بولماق.
461 ساۋال، 2 000 قابىلدانعان ازامات
سونداي-اق، ءماجىلىس بيىل سۋ كودەكسىن قابىلداپ، حالىقتى سۋعا ۇقىپتى قاراۋعا جانە ۇنەمدەۋگە باۋليتىن جاڭا ءتارتىپ ورناتتى.
-
سۋ كودەكسى – حالىقتى سۋعا ۇقىپتى قاراۋعا باۋليتىن العاشقى زاڭ؛
-
36 حالىقارالىق شارت پەن كەلىسىم راتيفيكاسيالاندى؛
-
اەس بويىنشا رەفەرەندۋمعا دايىندىق كەزەڭىندە ءماجىلىس بەلسەندى ءرول اتقاردى؛
-
ۇلتتىق قور اكتيۆتەرىن باسقارۋ ستراتەگياسى جاڭارتىلدى.
سونىمەن قاتار، ءماجىلىس قوعاممەن بايلانىستى كۇشەيتۋ ماقساتىندا 461 دەپۋتاتتىق ساۋال جولداپ، 2 مىڭنان استام ازاماتتى جەكە قابىلدادى. جوعارى اۋديتورلىق پالاتا ءتوراعاسىنىڭ ەسەبى ەكى رەت تىڭدالىپ، اۋىل شارۋاشىلىعى مەن دەنساۋلىق ساقتاۋ سالاسىنداعى تۇيتكىلدەر تالقىلاندى.