وسى جىلدىڭ 1 ساۋىرىنە دەيىن ازاماتتار 2024 جىلدىڭ اۆتوكولىك سالىعىن تولەۋى ءتيىس. بۇل رەتتە سالىق سوماسى بىلتىرعى ايلىق ەسەپتىك كورسەتكىش (اەك) مولشەرىمەن ەسەپتەلەدى. بىلتىر اەك – 3692 تەڭگە بولدى. بيىلعى مولشەرى – 3932 تەڭگە، دەپ حابارلايدى aqshamnews.kz
سالىق كودەكسىنىڭ 492 بابىنا سايكەس، اۆتوكولىكتىڭ سالىق سوماسى اەك-كە جانە سالىق مولشەرلەمەسىنە بايلانىستى. سالىق مولشەرلەمەسى كوپ جاعدايدا كولىكتىڭ قوزعالتقىش كولەمىنە جانە ەل اۋماعىنداعى العاشقى تىركەۋ جىلىنا تاۋەلدى بولادى.
قوزعالتقىش كولەمى 3000 سم كۋبقا دەيىنگى جەڭىل كولىكتەردىڭ سالىق مولشەرلەمەسى تەك اەك-كە بايلانىستى جانە 1 مەن 9 اەك ارالىعىندا عانا بولادى (ياعني 3692 مەن 33 228 تەڭگە ارالىعىندا).
قوزعالتقىش كولەمى 3000 سم كۋبتان 4000 سم كۋبقا دەيىنگى، ەل اۋماعىنا 2013 جىلدىڭ 31 جەلتوقسانىنا دەيىن اكەلىنگەن كولىكتەردىڭ سالىق مولشەرلەمەسى – 15 اەك (2024 جىل ءۇشىن – 55 380 تەڭگە).
ال قوزعالتقىش كولەمى 4000 سم كۋبتان اسىپ كەتەتىن اۆتوموبيلدەردىڭ سالىق مولشەرلەمەسى 117 اەك-تى (2024 جىل ءۇشىن – 431 964 تەڭگە) قۇرايدى.
ەلگە 2014 جىلدان باستاپ اكەلىنگەن كولىكتەردىڭ سالىق مولشەرلەمەسى باسقاشا ەسەپتەلەدى. 2013 جىلدىڭ 31 جەلتوقسانىنان كەيىن ەل اۋماعىنا اكەلىنگەن، قوزعالتقىش كولەمى 3000 سم كۋبتان اساتىن كولىكتەردىڭ سالىعى 35-200 اەك (129 220 تەڭگە – 738 400 تەڭگە) ارالىعىندا بولادى.
2026 جىلعى سالىق 2025 جىلعى اەك-پەن ەسەپتەلەدى. سونىمەن قاتار بيىل نەمەسە كەلەسى جىلى سالىق كودەكسى جاڭارتىلماق. جاڭا رەداكسيادا شىعارىلعانىنا 10 جىلدان اسقان كولىكتەردىڭ سالىعىن – 30%-عا، 20 جىلدان اسقان كولىكتەردىڭ سالىعىن 50%-عا تومەندەتۋ كوزدەلگەن.