قازاقستاندا ەل-جەردى ارالاپ، شوۋ-باعدارلاما قوياتىن سيركتەر مەن جانۋارلاردى ۇستاپ كورۋگە مۇمكىندىك بەرەتىن كىشىگىرىم زووباقتاردىڭ جۇمىسىنا تۇبەگەيلى تىيىم سالىندى.
مۇنداي شەكتەۋ كوشپەلى وكەناريۋم مەن دەلفينارييلەرگە دە قاتىستى، دەپ حابارلايدى aqshamnews.kz.
ەندى جان-جانۋارلار مەن بالىقتاردى جۇك كولىگىنە تيەپ الىپ، ايلاپ گاسترولدىك ساپارمەن اۋىل-ايماقتى ارالاي المايدى. جاڭا ەرەجەنى ەلەمەگەندەرگە قوماقتى ايىپپۇل سالىنادى. ەكولوگيا ءمينيسترىنىڭ ماماندارى "بۇل نورما ەڭ الدىمەن قاۋىپسىزدىك ءۇشىن جاسالىپ وتىر" دەدى.
"جىلجىلمالى سيركتەردە جانۋارلارعا ءتيىستى جاعداي كورسەتىلمەيدى. ويتكەنى مۇمكىن ەمەس. ولار كوشىپ-قونىپ جۇرەدى. ءارتۇرلى اۋرۋ تاراتۋى مۇمكىن. اۋىرىپ قالسا، حالىقپەن كەزدەسكەن كەزدە ادامدارعا جۇعۋى مۇمكىن دەگەن قاۋىپتەر بار. سول سەبەپتى وسىنداي نورما ەنگىزىلدى"، - دەدى ق ر ەكولوگيا جانە تابيعي رەسۋرستار مينيسترلىگى باسقارماسىنىڭ باس ساراپشىسى باقىتجان يساحايەۆ.
ال ەگەر بۇل ەرەجەنى ەلەمەي، ءوز بەتىنشە ساياباقتار مەن پاركتەردە جانۋارلاردى ۇستاپ ءجۇرىپ قىزمەت كورسەتسە نەمەسە جەكەمەنشىگىندەگى جانۋارلارمەن ەلدى ارالاپ، سيرك ۇيىمداستىرسا، جەكە تۇلعاعا 40 مىڭ تەڭگەگە جۋىق، ال زاڭدى تۇلعاعا 100 مىڭ تەڭگەدەن كوپ ايىپپۇل سالىنادى.
"تەكسەرەتىن ارنايى ورگان جوق. ال ەگەر ارىز-شاعىم ءتۇسىپ جاتسا، ءتيىستى ورگاندارمەن بىرلەسىپ، تەكسەرۋ جۇرگىزۋگە بولادى. اكىمشىلىك نەمەسە باسقا دا جاۋاپكەرشىلىككە تارتۋعا بولادى"، - دەدى باقىتجان يساحايەۆ.