بۇگىن ۆيسە-پرەمەر – ۇلتتىق ەكونوميكا ءمينيسترى سەرىك جۇمانعارين كەڭەس وتكىزىپ، ەلىمىزدىڭ ءجىو ءوسىمىنىڭ قۇرامداس بولىگى مەن ەكونوميكاعا قوماقتى ۇلەس قوسىپ وتىرعان سالالاردىڭ دامۋ سەرپىنىن ارتتىرۋ مۇمكىندىكتەرىن تالقىلادى. قاي سالالاردا ءوسىم بايقالادى؟ قاي سالانى دامىتۋ كەرەك؟ بيىل ءجىو-نىڭ 6 پايىز وسىمىنە قالاي قول جەتكىزەمىز؟ تولىعىراق اqshamnews.kz ماتەريالىندا.
2025 جىلدىڭ قاڭتار–مامىر ايلارىندا ەلىمىزدىڭ جالپى ىشكى ءونىمى 6 پايىزعا ارتقان. بۇل – ۇلتتىق ستاتيستيكا بيۋروسى ۇسىنعان الدىن الا مالىمەت.
قاي سالالاردا ءوسىم بايقالادى؟
ەكونوميكالىق وسىمگە نەگىزگى سالالارداعى – ونەركاسىپ، قۇرىلىس، ساۋدا، كولىك جانە بايلانىس سەكتورلارىنداعى قارقىننىڭ ۇدەي ءتۇسۋى اسەر ەتكەن:
- ونەركاسىپ ءوندىرىسى بيىلعى قاڭتار–مامىردا 6،4 پايىزعا ءوستى. بۇل كورسەتكىش ەلدىڭ بارلىق 17 وڭىرىندە تىركەلگەن وسىممەن بايلانىستى؛
- اۋىل شارۋاشىلىعى سالاسىندا وڭ سەرپىن ساقتالادى – ءوسىم 4 پايىز بولدى. ايتا كەتەيىك، ساۋىرگە دەيىن كورسەتكىش 3،9 پايىز بولعان.
- قۇرىلىس سالاسى قارقىندى دامىپ كەلەدى، بۇل سالا 15،4 پايىز وسىمگە جەتتى. ەلدىڭ 18 وڭىرىندە وڭ ديناميكا تىركەلسە، اسىرەسە ماڭعىستاۋ وبلىسىندا ءىرى ينفراقۇرىلىمدىق جوبالار ەسەبىنەن قۇرىلىس كولەمى ەكى ەسەگە ارتتى.
- نەگىزگى كاپيتالعا سالىنعان ينۆەستيسيالار كولەمى 18،2 پايىزعا ۇلعايدى. قارجى اعىنى نەگىزىنەن كولىك، وندىرىستىك جانە الەۋمەتتىك ينفراقۇرىلىم جوبالارىنا، سونىمەن قاتار، جاڭا ونەركاسىپتىك نىساندار مەن زاماناۋي جابدىقتارعا باعىتتالعان.
- ساۋدا سەكتورىندا دا تۇراقتى ءوسىم بايقالادى. ساۋدا اينالىمى 7،8 پايىزعا ارتتى، بۇل الدىڭعى ايداعى 7 پايىزدىق كورسەتكىشپەن سالىستىرعاندا ءبىرشاما جوعارى. ىشكى ساۋدا قۇرىلىمىندا كوتەرمە ساۋدا ۇلەسى 68 پايىزعا جۋىقتاپ، وسى سەگمەنت 8،3 پايىزعا وسسە، بولشەك ساۋدا 6،5 پايىزدىق كورسەتكىشكە جەتتى.
- بايلانىس جانە تەلەكوممۋنيكاسيا سالاسىندا 2،8 پايىز ءوسىم تىركەلدى. بۇعان ينتەرنەت قىزمەتتەرىنە دەگەن سۇرانىستىڭ ارتۋى اسەر ەتتى. بۇل باعىتتاعى ءوسىم 13،9 پايىز بولدى.
- كولىك سالاسى ەڭ جوعارى كورسەتكىشتى كورسەتىپ وتىر – 23،1 پايىز. مۇنداي سەرپىندى ءوسىم، ەڭ الدىمەن، جۇك تەمىرجول كولىگىنىڭ جانە قۇبىر ارقىلى تاسىمالداۋ كولەمىنىڭ ۇلعايۋىنا تىكەلەي بايلانىستى.
بيىل ءجىو-نىڭ 6 پايىز وسىمىنە قالاي قول جەتكىزەمىز؟
بۇل سۇراققا ۆيسە-پرەمەر – ۇلتتىق ەكونوميكا ءمينيسترى سەرىك جۇمانعارين كەڭەستە جاۋاپ بەردى.
"ءبىزدىڭ ماقساتىمىز – بيىل ءجىو 6%-دىق وسىمىنە قول جەتكىزۋ. ول ءۇشىن ناقتى سەكتورداعى بارلىق سالا بەلگىلەنگەن ينديكاتورعا سايكەس جۇمىس ىستەۋگە ءتيىس. اكىمشىلىك كەدەرگىلەردى جەدەل جويىپ، كومپانيالار ءوز ءونىمىن شىعارۋدى ۇلعايتۋى ءۇشىن ءاربىر سالاداعى قارقىننىڭ باياۋلاۋى ەسەبىنەن ناقتى ايلىق جوسپارلار ازىرلەۋ قاجەت"، — دەپ اتاپ ءوتتى سەرىك جۇمانعارين.