ماقسات – زەينەت جاسىنا تاقاعان جانە زەينەتتەگى كىسىلەرگە قولداۋ كورسەتۋ، قارجىلىق ساۋاتتىلىعىن ارتتىرۋ.
بۇل تۋرالى عىلىم جانە جوعارى ءبىلىم ءمينيسترى ساياسات نۇربەك ايتىپ بەردى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«ءقازىر وتاندىق جوو اراسىندا «كۇمىس ۋنيۆەرسيتەت» دەگەن جوبا بار. اتالعان جوبا بىلتىر ش. ءۋاليحانوۆ اتىنداعى كوكشەتاۋ مەملەكەتتىك ۋنيۆەرسيتەتىندە پيلوتتىق رەجيمدە ىسكە قوسىلعان ەدى. دەمەك، ۋنيۆەرسيتەت قابىرعاسىندا زەينەت جاسىنا تاياعان جانە زەينەت جاسىنداعى كىسىلەرگە ارنالعان ورتالىق اشىلدى. ول جەردە ومىردە ءتۇرلى جايتتارعا تاپ بولعان ەگدە جاستاعى ازاماتتارعا كومەك، قولداۋ ۇسىنىلادى»، - دەدى ساياسات نۇربەك ەلوردادا وتكەن ەلەكتروندىق كوممەرسيا مەكتەبىنىڭ جۇمىس قورىتىندىسىنا ارنالعان شارا بارىسىندا.
ۆەدومستۆو باسشىسىنىڭ ايتۋىنشا، اتالعان جوبا پيلوتتىق رەجيمدە ءساتتى جۇزەگە اسىرىلدى.
«بيىل 70 جوعارى وقۋ ورنىنىڭ بازاسىندا «كۇمىس ۋنيۆەرسيتەت» ورتالىعى اشىلادى. وسى كۇنگە دەيىن 2 مىڭداي ادام ورتالىق كۋرسىنان ءوتتى. اتالعان ءىس-شارا ۋنيۆەرسيتەتتەردىڭ ءۇشىنشى ميسسياسى بولىپ سانالادى. جوو-نىڭ العاشقى ميسسياسى – ءبىلىم بەرۋ، ەكىنشى – عىلىم جانە سوڭعىسى – ءوڭىردىڭ الەۋمەتتىك دامۋىنا ۇلەسى قوسۋ»، - دەيدى مينيستر.
ساياسات نۇربەكتىڭ ايتۋىنشا، اتالعان باستامانى بارلىق رەكتورلار قولداپ وتىر.