وتكەن جىلى الماتىدا پوليسەيلەر 468 ەسىرتكى قىلمىسىن اشكەرەلەپ، 132 ەسىرتكى ساتۋ دەرەگىنىڭ جولىن كەستى، دەپ حابارلايدى Almaty-akshamy.kz Polisia.kz-كە سىلتەمە جاساپ.
«زاڭسىز اينالىمنان 715 كەلىدەن استام ەسىرتكى، ونىڭ ىشىندە 117 كەلىدەن استام سينتەتيكالىق ەسىرتكى تاركىلەندى. جالپى سوماسى 3،5 ميلليارد تەڭگەدەن استام سينتەتيكالىق ەسىرتكىنىڭ 1،5 ميلليوننان استام دوزاسىن تاراتۋدىڭ جولىن كەستىك. سونىمەن قاتار «سينتەتيكا» شىعاراتىن 7 ەسىرتكى زەرتحاناسى جويىلدى. ەسىرتكى قويماسىن ۇيىمداستىرۋدىڭ 2 دەرەگى جانە ەسىرتكى وسىمدىكتەرىن ءوسىرۋدىڭ 5 دەرەگى انىقتالدى. ەسىرتكىنى بايلانىسسىز، ينتەرنەت ارقىلى، ەلەكتروندى تولەمدەردى قولدانۋمەن تاراتۋ ءۇردىسى وزەكتى ماسەلەلەردىڭ ءبىرى ەكەندىگىنە ەرەكشە نازار اۋدارامىن. وتكەن جىلى قالا اۋماعىندا 68 ەسىرتكى قويىپ كەتۋشى ۇستالدى»، – دەدى الماتى قالالىق پوليسيا دەپارتامەنتىنىڭ باستىعى ارىستانعاني زاپپاروۆ.
سونداي-اق الماتى پوليسياسىنىڭ باسشىسى جەدەل ۋاكىلدەر، ەسىرتكى تاراتۋ جانە جارنامالاۋمەن اينالىساتىن 590 ينتەرنەت-سايتتى انىقتاعانىن ايتتى. ولار تۋرالى اقپارات ودان ءارى بۇعاتتاۋ ءۇشىن «كيبەرنادزورعا» جىبەرىلدى. ەرىكتىلەرمەن بىرگە ەسىرتكىنىڭ تارالۋى تۋرالى اقپاراتى بار 8537 گراففيتي-جازۋ تابىلدى جانە جويىلدى.