ءبىراق ىشكى ىستەر ءمينيسترى سايتتاردى جابۋ ماسەلەنى تۇبەگەيلى شەشپەيدى دەپ ەسەپتەيدى.
ءىىم بيىل قازاقستاندا 604 ەسىرتكى سايتىن جاپقان، دەپ حابارلايدى Almaty-akshamy.kz
مارات احمەتجانوۆ ۇكىمەت وتىرىسىندا ەسىرتكىمەن كۇرەس بارىسى تۋرالى ايتتى.
ءمينيستردىڭ سوزىنشە، ەسىرتكىنى «تەلەگرام-بوتتار» نەمەسە باسقا دا ينتەرنەت-رەسۋرستار ارقىلى ساتۋ كەڭىنەن تاراپ جاتىر. مىسالى، بيىل تىركەلگەن ءاربىر جەتىنشى ەسىرتكى قىلمىسى ينتەرنەت ارقىلى ساتۋمەن بايلانىستى.
"ارينە، ءبىز مۇنداي ينكوگنيتو ينتەرنەت-دۇكەندەردى جاۋىپ جاتىرمىز. بيىل 604 ەسىرتكى سايتىن جاپتىق. ءبىراق بۇل شارا ماسەلەنى تۇبەگەيلى شەشپەيدى. ويتكەنى جاڭا سايتتاردى اشۋ تەز، ال ونى انىقتاۋ ۇزاق. ۇيىمداستىرۋشىلاردى انىقتاۋ ودان دا كۇردەلى. سەبەبى، ولار شەتەلدەردە ورنالاسقان"، دەدى ءىىم باسشىسى مارات احمەتجانوۆ.
سونىمەن قاتار مينيستر مۇنداي زاڭسىز «كونتەنتتى» توقتاتۋ ءۇشىن، زاماناۋي اپپاراتتىق-باعدارلامالىق جابدىقتار قاجەت ەكەنىن ايتتى. سوندىقتان كەشەندى جوسپاردا ءتيىستى قۇرالدارمەن قامتاماسىز ەتۋ كوزدەلىپ وتىر («ارگۋس»، «ايريس»، «تريتون»).
"ولار الەۋمەتتىك جەلىلەر نەمەسە سايتتار ارقىلى ەسىرتكىنىڭ تارالۋىن انىقتاۋدى اۆتوماتتاندىرۋعا مۇمكىندىك بەرەدى. سونىمەن قاتار «كيبەرنادزور» جۇيەسى سايتتار اشىلسا، ولاردى ونلاين تۇردە بۇعاتتايدى، ياعني جاساندى ينتەللەكت ءوزى انىقتاپ، دەرەۋ توسقاۋىل قويادى. سونىمەن قاتار سايتتى ۇيىمداستىراتىن جانە ونى پايدالاناتىن ادامداردى انىقتاۋعا مۇمكىندىك بولادى"، - دەدى مارات احمەتجانوۆ.