VI جاھاندىق ينۆەستيسيالار جونىندەگى قازاقستاندىق دوڭگەلەك ۇستەل (Kazakhstan Global Investment Roundtable) الاڭىندا ق ر پرەمەر-مينيسترى ءاليحان سمايىلوۆ Pfizer، Lasselsberger Group جانە Al Rajhi International for Investment (RAII) كومپانيالارىنىڭ وكىلدەرىمەن كەزدەستى، دەپ حابارلايدى almaty-akshamy.kz
پرەمەر-مينيستر Pfizerء-دىڭ وڭىرلىك پرەزيدەنتى پاتريك ۆان دەر لوومەن اڭگىمە بارىسىندا قازاقستاندا كومپانيانىڭ بارلىق باستامالارى مەن ينۆەستيسيالىق جوبالارىن ىسكە اسىرۋدىڭ ماڭىزدىلىعىن اتاپ ءوتتى. اتاپ ايتقاندا، ءقازىر Prevenar 20 ۆاكسيناسىن ءوندىرۋدى لوكاليزاسيالاۋ بويىنشا بەلسەندى بىرلەسكەن جۇمىس جۇرگىزىلۋدە. استانادا KGIR-2023 شەڭبەرىندە جوبا بويىنشا ۇزاقمەرزىمدى شارتقا قول قويىلدى.
قازاقستاندا Prevenar 13 (الدىڭعى بۋىن) ۆاكسيناسىن قولدانعان جىلدارى بالالار اراسىنداعى پنيەۆمونيامەن سىرقاتتانۋشىلىقتىڭ 50%-عا تومەندەگەنى اتاپ ءوتىلدى. ءاليحان سمايىلوۆ جۇزەگە اسىرىلىپ جاتقان جوبا الداعى ۋاقىتتا دا حالىقتى ءساتتى يممۋنداۋعا ىقپال ەتەتىنىنە سەنىم ءبىلدىردى.
سونداي-اق ۇكىمەت باسشىسى كومپانيانىڭ رەسپۋبليكادا كاۆكاز، ورتالىق ازيا جانە موڭعوليا ەلدەرىن قامتيتىن جاڭا ايماقتىق كەڭسەسىن اشۋ جوسپارىن قۇپتادى.
«قازاقستان ينۆەستيسيا مەن وزىق تەحنولوگيالار تارتۋعا مۇددەلى. Pfizer پرەپاراتتار ءوندىرىسىن لوكاليزاسيالاۋ مەملەكەتىمىزدىڭ فارماسيەۆتيكا سالاسىنىڭ دامۋىنا سەرپىن بەرەتىنىنە سەنىمدىمىن»، — دەدى پرەمەر-مينيستر.
اۆستريالىق Lasselsberger Group كومپانياسىنىڭ باسشىسى يوزەف لاسسەلسبەرگەرمەن كەزدەسۋدە قازاقستان اۋماعىندا كەراميكالىق پليتالار، قۇرعاق قوسپالار مەن جەلىم شىعاراتىن زاۋىتتار سالۋ ماسەلەلەرى تالقىلاندى.
ءاليحان سمايىلوۆ ەلىمىزدە قۇرىلىس سالاسىنىڭ قارقىندى دامۋى قۇرىلىس ماتەريالدارىنا دەگەن سۇرانىستىڭ ارتۋىنا تىكەلەي اسەر ەتەتىنىن اتاپ ءوتتى. جالپى، جىل باسىنان بەرى ەلىمىزدە 13 ملن شارشى مەتردەن استام تۇرعىن ءۇي پايدالانۋعا بەرىلدى، بۇل وتكەن جىلمەن سالىستىرعاندا 13،8%-عا جوعارى.
«قازاقستان Lasselsberger سياقتى ستراتەگيالىق ينۆەستورلارمەن ۇزاق مەرزىمدى ىنتىماقتاستىقتى دامىتۋعا نيەتتى. ۇكىمەت جاڭا ينۆەستيسيالىق جوبالاردى جۇزەگە اسىرۋعا ءتيىستى كومەك كورسەتۋگە دايىن»، — دەدى پرەمەر-مينيستر.
Al Rajhi International for Investment كومپانياسىنىڭ باس ديرەكتورى، قازاقستان-ساۋد ىسكەرلىك كەڭەسىنىڭ تەڭ ءتوراعاسى احمەد ءالي ال-داحيلمەن كەزدەسۋ بارىسىندا اۋىل شارۋاشىلىعى سالاسىنداعى ىنتىماقتاستىقتىڭ وزەكتى ماسەلەلەرى تالقىلاندى.
ۇكىمەت باسشىسى اتاپ وتكەندەي، قازاقستان اگروونەركاسىپتىك كەشەن جۇيەلەرىن جاڭعىرتۋعا جانە اۋىل شارۋاشىلىعى ماركەتينگىنىڭ يننوۆاسيالىق باعدارلامالارىن ەنگىزۋگە مۇددەلى.
«وسى تۇرعىدا بىرلەسكەن جوبالاردى جۇزەگە اسىرۋ ءۇشىن ءسىزدىڭ كومپانياڭىزبەن ىنتىماقتاستىق تۋرالى مەموراندۋمعا قول قويۋ – ارىپتەستىگىمىزدى نىعايتۋداعى ماڭىزدى قادام. قازاقستاننىڭ اگروونەركاسىپ كەشەنىن ودان ءارى دامىتۋ ءۇشىن ۇلكەن الەۋەتى بار. مەملەكەت ءوز تاراپىنان اۋىل شارۋاشىلىعى سۋبەكتىلەرىنە بەلسەندى قولداۋ كورسەتىپ كەلەدى»، — دەدى ءاليحان سمايىلوۆ.
كەزدەسۋلەردىڭ قورىتىندىسى بويىنشا ءوزارا ءتيىمدى ىنتىماقتاستىقتى نىعايتۋ ءۇشىن تىعىز ءىس-قيمىلدى جالعاستىرۋ تۋرالى ۋاعدالاستىقتارعا قول جەتكىزىلدى.
ەستەرىڭىزگە سالا كەتەيىك، VI جاھاندىق ينۆەستيسيالار جونىندەگى قازاقستاندىق دوڭگەلەك ۇستەل اياسىندا ەلىمىزدە جاڭا جوبالاردى جۇزەگە اسىرۋعا ينۆەستورلارمەن 26 مەموراندۋم مەن كوممەرسيالىق قۇجاتتارعا قول قويىلعان بولاتىن. كەلىسىمدەردىڭ جالپى سوماسى $1،6 ملرد-تى قۇرايدى. جوبالار ەكونوميكانىڭ اگروونەركاسىپتىك كەشەنى، تاۋ-كەن جانە مەتاللۋرگيا ونەركاسىبى، دەنساۋلىق ساقتاۋ، جەڭىل ونەركاسىپ، ماشينا جاساۋ، ءبىلىم بەرۋ جانە ت.ب. سالالاردىڭ دامۋىنا وڭ ىقپال ەتەدى.