بولاشاققا سالىنعان ينۆەستيسيا. ءقازىر الماتىدا ارنايى مەكتەپكە دەيىنگى ءبىلىم بەرۋ ورىندارىنىڭ پەداگوگتارى ءۇشىن ۇيىمداستىرىلىپ جاتقان ترەنيگتەردى وسىلاي اتاۋعا بولادى. اتالعان سالا بويىنشا وتاندىق جانە شەتەلدىك ماماندار ۇسىنىس ەتىلگەن ترەنيگ ساباقتارى ءو.ءا.جولداسبەكوۆ اتىنداعى ستۋدەنتتەر سارايىندا ءوتىپ جاتىر دەپ حابارلايدى Almaty-akshamy.kz.
15 قاراشادان باستالعان اۋقىمدى ترەنيگكە اتالعان سالا بويىنشا ەڭ ۇزدىك وتاندىق جانە شەتەلدىك ساراپشىلار ۇسىنىس ەتىلگەن. اقش، يسپانيا، شۆەسيا، فينليانديا، گەرمانيا، نورۆەگيا، ۇلىبريتانيا، رەسەي جانە تاعى باسقا دا 10-نان استام ەلدەن 30-دان استام ساراپشى ساباق بەرۋدە.
وتاندىق جانە شەتەلدىك سپيكەرلەر قاتارىندا مەكتەپكە دەيىنگى ءبىلىم بەرۋ سالاسىنىڭ ەڭ ۇزدىك ساراپشىلارى، پەداگوگتارى مەن پراكتيكتەرى، سونداي-اق، بالاباقشالاردىڭ ديرەكتورلارى دا بار. ولار قازىرگى كەزدەگى بالاباقشالاردا ءبىلىم بەرۋدىڭ ەڭ جاڭا ءارى وزىق تاجريبەلەرىمەن بولىسەدى. ولاردان الماتىداعى 192 مەكتەپكە دەيىنگى ءبىلىم بەرۋ ورىندارىنان 2210 پەداگوگ ساباق الۋدا.
«باستى ماقساتىمىز – قالامىزداعى مەكتەپكە دەيىنگى ءبىلىم بەرۋ مەكەمەلەرىندەگى مامانداردىڭ بىلىكتىلىگىن ارتتىرۋ»، – دەيدى اۋقىمدى شارا تۋرالى پىكىرىمەن بولىسكەن الماتى قالالىق ءبىلىم باسقارماسىنىڭ مەكتەپكە دەيىنگى ءبولىمىنىڭ باس مامانى ۇلجان باتىربايەۆا. ول جانە بۇل جوبادان ءبىزدىڭ ماماندار ساباقتارعا قاتىسىپ قانا قويماي، ءوزارا پىكىر الماسۋ ارقىلى جاڭا يدەلار تابادى دەگەن سەنىمدە.
«بۇل ساباقتار 156 اكادەميالىق ساعاتقا قاراستىرىلعان. وندا وتاندىق جانە شەتەلدىك سپيكەرلەر اتالعان سالاداعى جاڭا مەتوديكالىق ينوۆاسيالىق تەحنولوگيالاردىڭ قولدانىلۋىن ءبىزدىڭ ماماندارعا ۇيرەتىپ، بىزدە عانا ەمەس الەم ەلدەرىندە وسى سالادا قانداي جاڭالىقتار بولىپ جاتقانىن جەتكىزسە دەيمىز. ايتالىق، وزگە ەلدەردە بالاباقشالار ءۇشىن اتا-انالاردان قانداي تالاپتار قويىلۋدا، ءارى ونى قالاي شەشىپ جاتىر دەگەن سۇراقتاردى دا قاراستىرۋدى كوزدەدىك»، – دەيدى باس مامان ۇلجان حانىم.
ايتا كەتەيىك، بۇل جوبا الماتى قالاسىن دامىتۋدىڭ 2025 جىلعا دەيىنگى باس جوسپارى اياسىندا وتۋدە. ءارى مەكتەپكە دەيىنگى ءبىلىم بەرۋ سالاسىنىڭ ماماندارىنا ارنالعان بۇنداي اۋقىمدى جوبا ەلىمىزدە العاش رەت وتكىزىلۋدە. بالاباقشالارداعى ءبىلىم بەرۋ ساپاسىن جوعارلاتۋ، ونداعى مامانداردىڭ كاسىپتىك ءبىلىمىن جەتىلدىرۋدە بۇل جوبانىڭ تيگىزەر پايداسى مول بولارى انىق.
