2024 جىلى كولىك ينفراقۇرىلىمىن ودان ءارى دامىتۋ ماقساتىندا شىمكەنت، پاۆلودار جانە قىزىلوردا قالالارىنداعى تەمىرجول ۆوكزالدارىندا تولىق رەكونسترۋكسيا جانە كۇردەلى جوندەۋ جۇمىستارى اتقارىلدى.
بۇل جۇمىستار جولاۋشىلارعا ساپالى ءارى ىڭعايلى قىزمەت كورسەتۋگە، ينفراقۇرىلىمدى زاماناۋي تالاپتارعا ساي ەتۋگە باعىتتالعان، دەپ حابارلايدى aqshamnews.kz كولىك مينيسترلىگىنە سىلتەمە جاساپ.
شىمكەنت جانە پاۆلودار قالالارىنىڭ تەمىرجول ۆوكزالدارى رەكونسترۋكسيادان وتسە، قىزىلوردا قالاسى تەمىرجول ۆوكزالى كۇردەلى جوندەۋ جۇمىسىمەن قامتىلدى.
شىمكەنت ۆوكزالىنىڭ وتكىزۋ مۇمكىندىگى ايتارلىقتاي ارتتى. بۇرىن تاۋلىگىنە 2000 جولاۋشىعا قىزمەت كورسەتىلسە، ءقازىر بۇل كورسەتكىش 6000 جولاۋشىعا جەتتى. عيماراتتىڭ جالپى اۋماعى 1770،2 شارشى مەتردەن 2250 شارشى مەترگە دەيىن كەڭەيتىلدى.
پاۆلودار ۆوكزالىندا مۇمكىندىگى شەكتەۋلى جاندارعا ارنالعان ەكى جۇك-جولاۋشى ءليفتى ورناتىلدى. عيمارات ىشىنە تاكتيلدى باعىتتاعىشتار توسەلىپ، ارنايى دەمالىس بولمەلەرى مەن سانيتارلىق توراپتار جاساقتالدى.
قىزىلوردادا 1905 جانە 1968 جىلدارى سالىنعان ەكى تاريحي عيمارات جاڭعىرتىلىپ، جولاۋشىلار اعىنى بىرنەشە ەسە ارتتى.
ءۇش ۆوكزالدا دا جوندەۋ جۇمىستارى اياسىندا سىرتقى كەلبەتى جاڭارتىلىپ، ەسىك-تەرەزە جۇيەلەرى مەن ينجەنەرلىك كوممۋنيكاسيالار رەتكە كەلتىرىلدى. ەرەكشە قاجەتتىلىگى بار جاندار ءۇشىن پاندۋستار، تاكتيلدى جولاقتار جانە ارنايى كاسسالار ورناتىلدى. سونىمەن قاتار زاماناۋي WiFi ايماقتارى، اقپاراتتىق ەكراندار مەن رەنتگەن اپپاراتتارى ىسكە قوسىلدى.
قازىرگى تاڭدا ءارتۇرلى باعىتتا شىمكەنت ۆوكزالىنان 20 جۇپ، پاۆلودار ۆوكزالىنان 16 جۇپ، ال قىزىلوردا ۆوكزالىنان 15 جۇپ پويىز قاتىنايدى.