ول سۋ تاسقىنىن بولجاۋعا جانە مودەلدەۋگە مۇمكىندىك بەرمەك.
مەملەكەت باسشىسىنىڭ تاپسىرماسى بويىنشا ەلىمىزدە سۋ تاسقىنىن بولجاۋعا جانە مودەلدەۋگە ارنالعان «Tasqyn» اقپاراتتىق جۇيەسى ازىرلەنۋدە. جۇيە توتەنشە جاعدايلاردىڭ الدىن الۋعا جانە ستراتەگيالىق شەشىمدەر قابىلداۋ ءۇشىن ءتيىستى بولجامدار جاساۋعا مۇمكىندىك بەرەدى، دەپ حابارلايدى aqshamnews.kz cالا مينيسترلىگىنە سىلتەمە جاساپ.
اقپاراتتىق جۇيەنى سيفرلىق دامۋ، يننوۆاسيالار جانە اەروعارىش ونەركاسىبى مينيسترلىگى سۋ رەسۋرستارى جانە يرريگاسيا، ەكولوگيا جانە تابيعي رەسۋرستار، توتەنشە جاعدايلار مينيسترلىكتەرىمەن بىرلەسىپ جاساپ جاتىر.
بۇگىنگى تاڭدا سۋ تاسقىنىن بولجاۋ جانە مودەلدەۋ ادىستەمەسى ازىرلەنىپ، بەكىتىلدى. ادىستەمە بويىنشا ۋاكىلەتتى ورگاندار اقپاراتتىق جۇيەگە سۋ قويمالارىنداعى سۋ دەڭگەيى، سۋ جىبەرۋ كولەمى، گيدرومەتەو بولجام سىندى مالىمەتتەردى ەنگىزەدى. جيناقتالعان دەرەكتەر نەگىزىندە جۇيە سۋ تاسقىنىنىڭ ىقتيمال سەنارييلەرىن مودەلدەيدى.
«Tasqyn» اقپاراتتىق جۇيەسىن وسى جىلدىڭ سوڭىنا دەيىن ىسكە قوسۋ جوسپارلانىپ وتىر.
«سۋ رەسۋرستارى جانە يرريگاسيا مينيسترلىگى جەدەل سۋ ءبولۋدى جۇزەگە اسىرۋ ءۇشىن جانە سۋ قويمالارى مەن سۋ شارۋاشىلىعى جۇيەلەرىنىڭ سۋ رەسۋرستارىن پايدالانۋ رەجيمدەرىنە تالداۋ جانە تۇزەتۋ ماقساتىندا جەدەل جانە بولجامدى سۋ شارۋاشىلىعى بالانسى ەسەبىن رەگلامەنتتەيدى. ايتا كەتۋ كەرەك، سۋ شىعىنىن بولجاۋ - گيدروتەحنيكالىق قۇرىلىستاردان سۋ جىبەرۋدى رەتتەۋ جانە قولايسىز گيدرومەتەورولوگيالىق جاعدايدا قورشاعان ورتاعا جۇكتەمەنى ازايتۋ بويىنشا شۇعىل ءىس-شارالاردى قابىلداۋ ءۇشىن اسا ماڭىزدى»،- دەدى سۋ رەسۋرستارى جانە يرريگاسيا ۆيسە-مينيسترى اسلان ابدرايموۆ.