وتكەن جىلمەن سالىستىرعاندا ەكى ەسە كوپ.
اعىمداعى جىلى ەگىس جانە ەگىن جيناۋ جۇمىستارىنا 220 ملرد تەڭگەدەن استام قاراجات بولىنەدى، بۇل وتكەن جىلمەن سالىستىرعاندا ەكى ەسە كوپ. بۇل تۋرالى ۇكىمەت وتىرىسىندا قازاقستان پرەمەر-مينيسترى ءاليحان سمايىلوۆ مالىمدەدى، دەپ حابارلايدى Almaty-akshamy.kz Eldala.kz سىلتەمە جاساپ.
ول اتاپ وتكەندەي، 70 ملرد تەڭگە كولەمىندە بيۋدجەتتىك نەسيەلەندىرۋمەن قاتار، اعىمداعى جىلى ازىق-تۇلىك كورپوراسياسى تاراپىنان اۋىل شارۋاشىلىعى ونىمدەرىن فورۆاردتىق ساتىپ الۋعا بولىنگەن قاراجات كولەمى 80 ملرد تەڭگەگە دەيىن ۇلعايتىلعان. رەسپۋبليكالىق بيۋدجەتتى ناقتىلاۋ بارىسىندا كوكتەمگى ەگىس جانە ەگىن جيناۋ جۇمىستارىنا تاعى 70 ملرد تەڭگە بولىنەدى.
«بۇدان باسقا، تىڭايتقىشتار مەن پەستيسيدتەردى ساتىپ الۋدى سۋبسيديالاۋ قۇنىنىڭ 50% بۇرىن جوسپارلانعان دەڭگەيدە ساقتالۋدا. سونداي-اق، وتكەن جىلدىڭ شەگىندە قايتا وڭدەۋگە تاپسىرىلعان تۇقىمداردى، باسىم داقىلداردى ساتىپ الۋدى، سۋ بەرۋ جونىندەگى قىزمەتتەردى سۋبسيديالاۋ ساقتالادى»، - دەپ حابارلادى پرەمەر-مينيستر.
ونىڭ ايتۋىنشا، تەحنيكالىق جاڭارتۋ دەڭگەيىن ارتتىرۋ ءۇشىن ينۆەستيسيالىق سۋبسيديالاۋ جانە نەسيەلەر مەن ليزينگ بويىنشا پايىزدىق مولشەرلەمەنى سۋبسيديالاۋ كولەمى ۇلعايتىلادى.
«اگرارشىلار سۇرانىس جوعارى بولىپ وتىرعان داقىلدار الاڭىن ۇلعايتىپ، وسى باعىتتى باسىمدىقپەن قارجىلاندىرۋدى قامتاماسىز ەتۋى قاجەت. بۇل رەتتە ەكسپورتقا باعدارلانعان تيىمدىلىگى جوعارى داقىلداردى ەگۋگە دە ەرەكشە نازار اۋدارۋ كەرەك. بۇل مىندەتتەر اگروتەحنولوگيالاردى مۇلتىكسىز ساقتاۋدى، تىڭايتقىشتار مەن وسىمدىكتەردى قورعاۋ قۇرالدارىن ۋاقتىلى ەنگىزۋدى تالاپ ەتەدى»، - دەپ اتاپ ءوتتى سمايىلوۆ.
پرەمەر-مينيستر اۋىل شارۋاشىلىعى مينيسترلىگى مەن وڭىرلەردىڭ اكىمدەرىنە كوكتەمگى ەگىس جۇمىستارىن ساپالى ءارى ۋاقتىلى جۇرگىزۋ ماسەلەسىن ەرەكشە باقىلاۋدا ۇستاۋدى تاپسىردى.
«اۋىل شارۋاشىلىعى مينيسترلىگى وبلىس اكىمدىكتەرىمەن بىرلەسىپ، ەگىس القاپتارىن ءارتاراپتاندىرۋ اياسىندا الەۋمەتتىك ماڭىزى بار جانە جەمشوپ داقىلدارىنىڭ قاجەتتى كولەمىن ەگۋدى قامتاماسىز ەتسىن، ونىڭ ىشىندە شارۋاشىلىقتاردى ءبىرىنشى كەزەكتە ازىق-تۇلىك كەلىسىمشارت كورپوراسياسىنىڭ فورۆاردتىق ساتىپ الۋى شەڭبەرىندە ىنتالاندىرسىن»، - دەدى سمايىلوۆ.
ول وتكەن جىلى ەلىمىزدىڭ كەيبىر وڭىرلەرىندە جەمشوپپەن قامتاماسىز ەتۋدە پروبلەمالار بولعانىن ەسكە سالدى.
«بيىل بۇل جاعداي قايتالانباۋى ءتيىس»، - دەپ اتاپ ءوتتى پرەمەر-مينيستر.
سونىمەن قاتار، ەكولوگيا مينيسترلىگىنە اۋىل شارۋاشىلىعى مينيسترلىگىمەن جانە وڭىرلەردىڭ اكىمدەرىمەن بىرلەسىپ، بارلىق جازعى كەزەڭدە اۋىل شارۋاشىلىعى تاۋار وندىرۋشىلەرىن سۋمەن قامتاماسىز ەتۋ بويىنشا شارالار قابىلداۋ تاپسىرىلدى.
«يندۋستريا مينيسترلىگى وڭىرلەردىڭ اكىمدەرىمەن بىرلەسىپ، مينەرالدى تىڭايتقىشتار وندىرۋشىلەرمەن ىشكى نارىقتى باسىم تارتىپپەن قامتاماسىز ەتۋ بويىنشا جۇمىس جۇرگىزسىن. بۇل جەردە بيىلعى جىلى ەكى ەسە وسكەن ولاردىڭ باعاسى دا ماڭىزدى. مونوپولياعا قارسى ورگان تىڭايتقىش وندىرۋشىلەرمەن ماسەلەنى پىسىقتاسىن»، - دەپ تۇيىندەدى سمايىلوۆ.