قازاقستاننىڭ ءار ايماعىنان 200-دەن استام بەلسەندى ايەل «AMANAT» پارتياسىنىڭ ايەلدەر قاناتى اياسىندا ۇيىمداستىرىلعان «Tomiris» كوشباسشىلىق جوباسىنىڭ وقۋ كۋرستارىنا قاتىستى. ءماجىلىس سپيكەرى جانە «AMANAT» پارتياسىنىڭ ءتوراعاسى ەرلان قوشانوۆ ولارمەن كەزدەسىپ، 6 قازاندا وتەتىن اتوم ەلەكتر ستانسياسى تۋرالى رەفەرەندۋم مەن پرەزيدەنت جولداۋىنىڭ جۇزەگە اسىرىلۋىن تالقىلادى.
ەرلان قوشانوۆ مەملەكەت باسشىسى قاسىم-جومارت توقايەۆتىڭ ايەلدەردىڭ قوعامداعى ءرولىن ءاردايىم جوعارى باعالايتىنىن جانە گەندەرلىك تەڭدىك پەن وتباسى قۇندىلىقتارىن نىعايتۋ ماسەلەلەرى پرەزيدەنت پەن «AMANAT» پارتياسىنىڭ باستى نازارىندا ەكەنىن اتاپ ءوتتى. ول ايەلدەر قاناتىنىڭ ءبىر جارىم جىلدا پارتيانىڭ قوزعاۋشى كۇشىنە اينالعانىن دا ايتتى. مىسالى، وتباسىلىق-تۇرمىستىق زورلىق-زومبىلىققا قاتىستى زاڭنىڭ قابىلدانۋى ايەلدەر قاناتىنىڭ باستامالارىنىڭ ءبىرى.
كەزدەسۋدە مەملەكەت باسشىسىنىڭ جولداۋى، اسىرەسە، ەلدەگى ەنەرگيا تاپشىلىعى ماسەلەسى دە تالقىلاندى. ەرلان قوشانوۆ اەس قۇرىلىسى ەلىمىزدىڭ ەنەرگەتيكالىق قاۋىپسىزدىگىن قامتاماسىز ەتۋ ءۇشىن ماڭىزدى ەكەنىن جانە قازاقستاندىقتاردىڭ باسىم بولىگى بۇل يدەيانى قولداپ وتىرعانىن اتاپ ءوتتى. حالىقتىق شتاب مۇشەلەرى دە وڭىرلەردى ارالاپ، تۇرعىندارمەن كەزدەسىپ، بەيبىت اتومدى قولداۋ بويىنشا جۇمىستار جۇرگىزۋدە.
يادرولىق فيزيكا ينستيتۋتىنىڭ وكىلدەرى كارلىعاش مۇناسبايەۆا مەن ناتاليا يزمايلوۆا قاۋىپسىزدىك تالاپتارىنا ساي سوڭعى تەحنولوگيالاردى پايدالانۋ ارقىلى اەس سالۋدىڭ مۇمكىندىكتەرى تۋرالى ايتىپ ءوتتى. كاسىپكەر كەنجەتاي تازابەكوۆا رەفەرەندۋمنىڭ «حالىق ۇنىنە قۇلاق اساتىن مەملەكەت» تۇجىرىمداماسىنىڭ كورىنىسى ەكەنىن اتاپ ءوتتى.
كەزدەسۋ سوڭىندا پارتيانىڭ ايەلدەر قاناتىنىڭ مۇشەلەرى اەس قۇرىلىسىنا قولداۋ ءبىلدىرىپ، قازاقستاندىقتاردى رەفەرەندۋمعا بەلسەندى قاتىسۋعا شاقىردى.