ق ر پرەمەر-مينيسترىنىڭ ورىنباسارى تامارا دۇيسەنوۆانىڭ توراعالىعىمەن وتكەن كەڭەستە ءبىلىم بەرۋ نىساندارىنىڭ اينالاسىنداعى جول ينفراقۇرىلىمىنىڭ قاۋىپسىزدىگىن قامتاماسىز ەتۋ ماسەلەلەرى تالقىلاندى. كەڭەسكە ىشكى ىستەر، وقۋ-اعارتۋ، مادەنيەت جانە اقپارات ۆيسە-مينيسترلەرى قاتىستى.
ىشكى ىستەر ءمينيسترىنىڭ ورىنباسارى يگور لەپەحانىڭ سوزىنە قاراعاندا، جىل باسىنان بەرى ەلدە كامەلەت جاسىنا تولماعانداردىڭ قاتىسۋىمەن 3،4 مىڭنان استام جول كولىك وقيعاسى بولعان.
ىشكى ىستەر ورگاندارى مۇددەلى مەكەمەلەرمەن بىرلەسە ءبىلىم بەرۋ نىساندارى ماڭدارىنىڭ جول قوزعالىسى قاۋىپسىزدىگى تالاپتارىنا سايكەستىگىن تەكسەرگەن. اتالعان ءىس-شارا بويىنشا 21 مىڭداي نىسان قامتىلدى. ولاردىڭ ىشىندە مەكتەپتەر، بالاباقشالار مەن قوسىمشا ءبىلىم بەرۋ ۇيىمدارى بار. بۇل باعىتتا وڭ وزگەرىستەر بار ەكەنىن ايتا كەتكەن ءجون. جىل باسىنان بەرى ءبىلىم بەرۋ نىساندارىنىڭ ماڭىندا 1400-دەن اسا جاياۋ جۇرگىنشىلەر جولاعى، 2،5 مىڭنان استام جاساندى كەدەرگىلەر، 5000-نان اسا جول بەلگىلەرى ورناتىلدى.
بۇل رەتتە، ءبىرقاتار نىسانداردا قاۋىپسىزدىك شارالارىنا بايلانىستى زاڭ بۇزۋشىلىقتار انىقتالعان. كەي جەرلەردە جاياۋ جۇرگىنشىلەر جولاعى، جاساندى كەدەرگىلەر جەتىسپەسە، وزگەسىندە جارىقتاندىرۋعا قاتىستى ماسەلەلەلەر كەزدەسەدى.
«جۇرگىزىلگەن تەكسەرۋلەر ناتيجەسىندە جول جانە كوممۋنالدىق مەكەمەلەرگە كەمشىلىكتەردى جويۋ جونىندە 3 مىڭنان استام نۇسقامالار بەرىلدى. اتالعان مەكەمەلەردىڭ 140-قا جۋىق لاۋازىمدى قىزمەتكەرى اكىمشىلىك جاۋاپكەرشىلىككە تارتىلدى. جۇرگىزىلگەن تەكسەرۋ شارالارىنان كەيىن 211 جاياۋ جۇرگىنشىلەرگە ارنالعان 211 جولاعى جاسالىپ، 518 جول بەلگىلەرى ورناتىلدى»، — دەدى ىشكى ىستەر ءمينيسترىنىڭ ورىنباسارى.
وقۋ-اعارتۋ مينيسترلىگى مۇددەلى مەملەكەتتىك ورگاندارمەن بىرگە ءبىلىم بەرۋ مەكەمەلەرى ماڭىن ءقاۋىپسىز جول ينفراقۇرىلىمىمەن قامتۋ جونىندە جۇمىس جوسپارىن ازىرلەدى. ۆيسە-مينيستر ەدىل وسپاننىڭ مالىمەتىنشە، قۇجات شەڭبەرىندە مەكتەپ وقۋشىلارىنا جول ەرەجەسىن ءتۇسىندىرۋ، ءقاۋىپسىز باعىتتار ءتۇزۋ، اقپاراتتىق اكسيالار وتكىزۋ جانە تاعى دا ءبىرقاتار شارالار قاراستىرىلعان.
«بۇل ماسەلە بالالارىمىزدىڭ دەنساۋلىعى مەن ومىرىنە بايلانىستى. سوندىقتان بارلىق مۇددەلى مەملەكەتتىك ورگاندار ونى تۇراقتى باقىلاۋىندا ۇستاۋى كەرەك. وڭىرلەر اكىمدىكتەرى قۇرىلىس ماۋسىمى باستالعاندا جول سالۋ جۇمىستارىن باستاۋ ءۇشىن قاجەتتى قارجى رەسۋرستارىن قازىردەن قامتاماسىز ەتۋى كەرەك. جول قوزعالىسى ەرەجەلەرىن ساقتاۋ بويىنشا جۇمىستاردى كۇشەيتكەن ءجون. ءاقپاراتتىق-تۇسىندىرۋ جۇمىستارى ءبىلىم بەرۋ نىساندارىندا، الەۋمەتتىك جەلىلەردە جانە بۇقارالىق اقپارات قۇرالدارىندا بەلسەندى تۇردە جۇرگىزىلۋى كەرەك»، — دەپ اتاپ ءوتتى تامارا دۇيسەنوۆا.