بۇل - 14 245 وقۋشى ورنىنا ەسەپتەلگەن مەكتەپتەر.
بيىل الماتىدا 14 245 وقۋشى ورنىنا ەسەپتەلگەن 22 مەكتەپ پايدالانۋعا بەرىلەدى. بۇل تۋرالى مەملەكەت باسشىسىنىڭ الماتىنى قالپىنا كەلتىرۋ جانە ودان ءارى دامىتۋ جونىندەگى تاپسىرماسىن ورىنداۋ ماقساتىندا 2022 جىلعا ارنالعان جەرگىلىكتى بيۋدجەتتى ناقتىلاۋ بويىنشا قالا ءماسليحاتىنىڭ XVI سەسسياسى بارىسىندا قالا اكىمى ەربولات دوسايەۆ مالىمدەدى، دەپ حابارلايدى Almaty-akshamy.kz.
ونىڭ ايتۋىنشا، 2022 جىلى ءبىلىم بەرۋگە 275،2 ملرد تەڭگە قاراستىرىلعان (جەرگىلىكتى بيۋدجەت - 196،2 ملرد.، رەسپۋبليكالىق بيۋدجەت – 79 ملرد.). بيۋدجەتتى ناقتىلاۋ اياسىندا قوسىمشا 9،4 ملرد. تەڭگە ءبولۋ جوسپارلانىپ وتىر.
«2022 جىلى وقۋشى ورنىنىڭ تاپشىلىعىن ازايتۋ ماقساتىندا 46 مەكتەپتىڭ قۇرىلىسى جالعاسىپ، 14 245 وقۋشى ورنىنا ەسەپتەلگەن 22 مەكتەپ بيىل پايدالانۋعا بەرىلەدى»، - دەدى قالا اكىمى.
سونىمەن قاتار بوستاندىق، اۋەزوۆ، المالى، جەتىسۋ اۋداندارىنداعى مەكتەپتەرگە جاپسارلاس 5 عيماراتتىڭ قۇرىلىسىن اياقتاۋعا قوسىمشا 1،8 ملرد. تەڭگە ءبولۋ ۇسىنىلدى.
