WhatsApp-تا 40 كۇن بويى اۋا تەمپەراتۋراسى 50 گرادۋسقا دەيىن كوتەرىلەتىنى تۋرالى اقپارات تارادى. مۇنداي اۋىتقۋشىلىقتار ءار 60 جىل سايىن بولىپ تۇرادى ەكەن.
ەڭ الدىمەن حابارلامادا قولدانىلعان تەرمينولوگياعا نازار اۋدارعان ءجون. وندا «مىسىق كۇندەرى» تۋرالى جازىلعان. مەتەورولوگيادا دا، كليماتولوگيادا دا مۇنداي تەرمين جوق.
سونداي-اق حابارلامادا ناقتى اۋا تەمپەراتۋراسىنىڭ 50 گرادۋسقا دەيىن كوتەرىلەتىنى بولجانىپ وتىرعان ايماقتار كورسەتىلمەگەن. ءبىر ۋاقىتتا جەردىڭ بارلىق كونتينەنتىندە مۇنداي جاعدايدىڭ ورىن الۋى ەكىتالاي. مۇنداي كۇماندى پىكىرلەر حابارلامانىڭ فەيك ەكەندىگىنىڭ بەلگىسى. ۋاقىت پەن گەوگرافيالىق بەلگىلەردىڭ بولماۋىنان ونى كەز كەلگەن جەردە جانە كەز كەلگەن ۋاقىتتا تاراتۋعا بولادى.
ءار 60 جىل سايىن قايتالاناتىن 40 كۇن بويى بولاتىن اپتاپ ىستىق تۋرالى تەورياعا كەلەتىن بولساق، ونى جەلىدە وڭاي تەكسەرۋگە بولادى. شىن مانىندە، اۋا تەمپەراتۋراسىنىڭ كوتەرىلۋى تۇراقتى ءارى الپىس جىل سايىن ورىن المايدى. سوڭعى جىلدارى الەمدە رەكوردتىق جوعارى تەمپەراتۋرا ءجيى تىركەلۋدە. ماسەلەن، 2022 جىلى ەۋروپادا ىستىق بولدى، ال 2023 جىلى تەمپەراتۋرانىڭ رەكوردتى كورسەتكىشتەرى ازيا ەلدەرىندە تىركەلۋدە.
مۇنىڭ سەبەبى – جەردەگى كليماتتىڭ وزگەرۋى. پارنيكتىك گاز شىعارىندىلارىنىڭ كوپ بولۋىنا بايلانىستى پلانەتامىزدىڭ بەتىندەگى تەمپەراتۋرا جوعارىلايدى.
دەمەك، تارالعان اقپارات فەيك جانە وعان سەنبەگەن ءجون.
