بۇل - ۇكىمەت وتىرىسىندا ءسوز العان ق ر ەكولوگيا، گەولوگيا جانە تابيعي رەسۋرستار ءمينيسترى سەرىكقالي برەكەشيەۆتىڭ ۋادەسى.
ءمينيستردىڭ ايتۋىنشا، اقمولا وبلىسىنىڭ ارشالى جانە سەلينوگراد اۋداندارىندا جىل سايىن تاسقىن ءقاۋپى تۋىنداۋىنا انتروپوگەندىك پروسەس سەبەپكەر بولىپ وتىر، دەپ حابارلايدى Almaty-akshamy.kz
«بيىل تاعى 6 سۋ قويمانى قالپىنا كەلتىرۋدى جوسپارلاپ وتىرمىز. قالعان 19-ى 2025 جىلدىڭ سوڭىنا دەيىن قالپىنا كەلتىرىلەدى»، - دەگەن مينيستر كەيىنگى جىلدارى كوكتەمگى سۋ تاسقىنىنا تابيعي جاعدايلار عانا ەمەس، انتروپوگەندىك پروسەستەر دە تۇرتكى بولىپ جاتقانىن اتاپ ءوتتى. «ماسەلەن، جىل سايىن سۋ تاسقىنى كەزەڭىندە اقمولا وبلىسىنىڭ ارشالى جانە سەلينوگراد اۋداندارىنداعى ەسىل جانە نۇرا وزەندەرىنىڭ ارناسىمەن استانا سۋ قويماسىنان جىبەرۋ كەزىندە سۋ باسقان ارنانىڭ وتكىزۋ قابىلەتىنىڭ بولماۋىنا بايلانىستى ىرگەلەس اۋماقتى سۋ باسۋ ءقاۋپى تۋىنداۋدا. اتالعان جاعدايلار قاراعاندى (نۇرا وزەنى)، سولتۇستىك قازاقستان (سىلەتى، ەسىل وزەندەرى) جانە قوستاناي وبلىستارى (توبىل وزەنى) اۋماعىندا ورىن الۋدا»، - دەدى ول ۇكىمەت وتىرىسىندا.
مينيستر وسىعان بايلانىستى اكىمدىكتەرگە اقمولا، قاراعاندى، قوستاناي جانە سولتۇستىك قازاقستان وبلىستارىنداعى پروبلەمالىق ۋچاسكەلەردە وزەن ارنالارىن تازارتۋدى ۇيىمداستىرۋ كەرەكتىگىن ايتادى. سونداي-اق، ول جەرگىلىكتى اكىمدىكتەرگە كوممۋنالدىق مەنشىكتەگى گيدروتەحنيكالىق قۇرىلىستاردىڭ جاي-كۇيىنە نازار اۋدارىپ، كوممۋنالدىق مەنشىكتەگى سۋ قويمالارىن تاسقىن سۋلاردى قابىلداۋعا دايىنداۋ قاجەتتىگىن ەسكە سالدى.