الماتىدا قاڭتار وقيعاسىندا كۇدىكتى رەتىندە قاماۋعا الىنعاندار جاقىندارىمەن جۇزدەستى

ولاردىڭ اراسىندا كامەلەتتىك جاسقا تولماعان ءتورت بالا دا بولعان.

الماتىدا قاڭتارداعى جاپپاي تارتىپسىزدىك كەزىندە تەرگەۋ يزولياتورىنا 500-گە جۋىق كۇدىكتى جەتكىزىلگەن، دەپ حابارلايدى Almaty-akshamy.kz قازاقپاراتقا سىلتەمە جاساپ.

الماتى قالالىق پوليسيا دەپارتامەنتىندە ءمالىم ەتكەندەي، قامالعانداردىڭ اراسىندا كامەلەتتىك جاسقا تولماعان ءتورت بالا دا بولعان، ءقازىر ونىڭ ەكەۋى شىعارىلدى. قامالعانداردىڭ جارتىسى ەشقايدا كەتپەۋ تۋرالى قولحاتپەن بوساتىلدى. ءقازىر قاڭتار وقيعاسى كەزىندە تارتىپسىزدىكتەرگە قاتىسقان 250 ادام قاماۋدا وتىر. تەرگەۋ قاماۋىنداعىلاردىڭ كوبىسى - تۇرمىستىق تەحنيكا ۇرلاعاندار مەن مارودەرلىكپەن اينالىسقاندار.

«تۇتقىنداردىڭ جاقىندارىمەن كەزدەسۋى الماتى قالالىق پروكۋراتۋراسىمەن بىرلەسە وتىرىپ جۇزەگە اسىرىلدى. جالعان اقپاراتتارعا جول بەرمەۋ ءۇشىن، ادام قۇقىعىن قورعاۋ جونىندەگى ۋاكىل، پروكۋراتۋرا، ءماجىلىس دەپۋتاتتارى ۇنەمى تەكسەرىس جۇرگىزىپ وتىرادى. قاماۋداعىلاردىڭ كەيبىرەۋى تۋىستارىمەن نەمەسە قورعاۋشىلارىمەن ەكىنشى رەت كەزدەسسە، كەيبىرەۋلەرى العاش رەت جۇزدەسىپ وتىر. كۇدىكتىلەرگە اپتاسىنا ەكى رەت كەزدەسۋگە رۇقسات ەتىلگەن»، – دەدى لا-155/18 مەكەمەسىنىڭ باستىعى اسەت جۇمادييەۆ.

سونداي-اق، پوليسيادا كەزدەسۋگە كەلگەندەر قاماۋداعى تۋىستارىنىڭ تاماقتانۋ جانە ۇستاۋ جاعدايىن سۇراپ، قاناعاتتانارلىق جاۋاپ العانى تۋرالى حابارلادى.