بيىل 3،1 ميلليوننان استام وقۋشى جازعى دەمالىستى پايدالى وتكىزەدى

قازاقستان رەسپۋبليكاسىنىڭ وقۋ-اعارتۋ مينيسترلىگى جازعى ماۋسىمعا دايىندىق جۇمىستارىن باستادى.

2025 جىلعى جاز مەزگىلىندە ەلىمىز بويىنشا 3،1 ميلليوننان استام بالا ساۋىقتىرۋ، دەمالىس جانە جۇمىسپەن قامتۋعا باعىتتالعان ءتۇرلى باعدارلامالارمەن قامتىلاتىن بولادى. ونىڭ ىشىندە 500 مىڭنان استامى – الەۋمەتتىك وسال ساناتتاعى بالالار. «قازاقستان حالقىنا» قورىنىڭ قولداۋىمەن 10 مىڭ بالا جازعى دەمالىسىن تەگىن وتكىزۋ مۇمكىندىگىنە يە بولادى، دەپ حابارلايدى aqshamnews.kz سالا مينيسترلىگىنە سىلتەمە جاساپ. 

جازعى دەمالىس باعدارلاماسى ءارتۇرلى باعىتتاردى قامتيدى: ەڭبەك جانە شىعارماشىلىق بەلسەندىلىك، تۋريستىك جانە تانىمدىق مارشرۋتتار، زياتكەرلىك ءارى ءبىلىم بەرۋ ءىس-شارالارى، سونداي-اق حالىقارالىق جوبالار مەن فورۋمدارعا قاتىسۋ.

بارلىق ۇيىمداستىرۋ شارالارى 9 مەملەكەتتىك ورگاننىڭ قاتىسۋىمەن ازىرلەنگەن ءبىرىڭعاي جوسپار اياسىندا ىسكە اسىرىلادى. وسى ماقساتتا رەسپۋبليكالىق جانە وڭىرلىك دەڭگەيدەگى شتابتار قۇرىلىپ، اعىمداعى جىلى جۇمىسىن باستايتىن دەمالىس ورتالىقتارىنىڭ ءتىزىمى جاساقتالدى.

بالالاردىڭ قاۋىپسىزدىگىن قامتاماسىز ەتۋگە ەرەكشە كوڭىل بولىنۋدە. سانيتارلىق تالاپتاردىڭ ساقتالۋى، تاعام قاۋىپسىزدىگى، سونداي-اق سۋ ايدىندارىندا، ورماندار مەن سپورت نىساندارىندا ساقتىق شارالارى قاتاڭ باقىلاۋدا بولادى.

ءقاۋىپسىز ءارى بەلسەندى جازعى دەمالىس مادەنيەتىن قالىپتاستىرۋ ماقساتىندا ارنايى جادىنامالار، نۇسقاۋلىقتار مەن گايدبۋكتار ازىرلەنىپ، بالالار مەن اتا-انالارعا تاراتىلاتىن بولادى. وڭىرلەردە «كيەلى شىعىس»، «ۇلى دالا كەرەمەتى»، «Jas galym»، «گاسترو تۋريزم»، «قوناقجاي وتباسى» سىندى بىرەگەي جوبالار ىسكە اسىرىلادى.

بيىل جىل بويى جۇمىس ىستەيتىن 16 لاگەر، 188 ماۋسىمدىق لاگەر، 10 مىڭنان استام مەكتەپ جانىنداعى لاگەر، ونىڭ ىشىندە ءبىرقاتارىندا تاماقتاندىرۋ قاراستىرىلعان، سونداي-اق 512 شاتىرلى جانە كيىز ءۇي لاگەرلەرى كەزەڭ-كەزەڭىمەن اشىلادى دەپ جوسپارلانۋدا.