ناۋرىز ايىندا «Enbek» ەلەكتروندىق ەڭبەك بيرجاسىندا 80،2 مىڭ بوس جۇمىس ورنى جانە 95،3 مىڭ تۇيىندەمە ورنالاستىرىلدى.
اقپان ايىمەن سالىستىرعاندا جۇمىس بەرۋشىلەر تاراپىنان بەلسەندىلىكتىڭ تومەندەۋى بايقالدى – بوس جۇمىس ورىندارىنىڭ سانى 34%-عا، سونداي-اق جۇمىس ىزدەۋشىلەر ورنالاستىرعان تۇيىندەمەلەر سانى 28% - عا ازايدى، دەپ حابارلايدى aqshamnews.kz ەڭبەك جانە حالىقتى الەۋمەتتىك قورعاۋ مينيسترلىگىنە سىلتەمە جاساپ.
ەەب مالىمەتتەرى بويىنشا، 2025 جىلدىڭ ناۋرىز ايىندا بىلىكتىلىك دەڭگەيى بويىنشا جۇمىس كۇشىنە سۇرانىس پەن ۇسىنىس اراسىنداعى تەڭگەرىمسىزدىك ساقتالادى: جوعارى بىلىكتى ماماندار بوس جۇمىس ورىندارىنىڭ 37 پايىزىن قۇراسا، ولار تۇيىندەمەنىڭ 32 پايىزىن عانا قۇرايدى. سونىمەن بىرگە بىلىكتىلىگى جوق جۇمىسشىلاردىڭ ەڭبەگىنە دەگەن سۇرانىس 14% قۇرادى، ال ولاردىڭ ۇسىنىسى بارلىق تۇيىندەمەلەردىڭ 28% - نا جەتتى.
وڭىرلىك بولىنىستە اقپان ايىمەن سالىستىرعاندا ورنالاستىرىلعان بوس ورىندار سانىنىڭ ەداۋىر تومەندەۋى شىعىس قازاقستان وبلىسىندا – 12،9 مىڭنان 4،5 مىڭعا دەيىن (65% - عا تومەندەۋ)، اقتوبە وبلىسىندا – 3،8 مىڭنان 2،7 مىڭعا دەيىن (-28%) جانە اتىراۋ وبلىسىندا – 3،5 مىڭنان 3،1 مىڭعا دەيىن (-12%) تىركەلدى.
جالپى تومەندەۋگە قاراماستان، الماتى وبلىسىندا جۇمىس بەرۋشىلەر بەلسەندىلىك دەڭگەيىن بۇرىنعى دەڭگەيدە ساقتاپ قالدى: ناۋرىزدا 3،4 مىڭ (-6%)، ال اقپان ايىندا 3،7 مىڭ بوس جۇمىس ورنى ورنالاستىرىلدى.
ۇسىنىس تاراپىنان بەلسەندىلىكتىڭ تومەندەۋى دە بايقالدى. بۇل رەتتە تۇيىندەمە سانىنىڭ ەڭ كوپ قىسقارۋى الماتى وبلىسىندا – 10،2 مىڭنان 7 مىڭعا دەيىن (-31%) بايقالدى. سونىمەن قاتار، اتىراۋ وبلىسىندا تۇيىندەمە سانى – 7،4 مىڭنان 5،8 مىڭعا دەيىن (-22%) جانە اقتوبە وبلىسىندا – 6 مىڭنان 5 مىڭعا دەيىن (-17%) تومەندەدى. سونىمەن قاتار، اقمولا جانە شىعىس قازاقستان وبلىستارىندا تومەندەۋ از بايقالدى (15% شەگىندە).
ناۋرىز ايىنىڭ قورىتىندىسى بويىنشا PR-مەنەدجەرلەر (3،9 مىڭ بوس جۇمىس ورنى)، مەدبيكەلەر/مەيىرگەرلەر (1،7 مىڭ بوس جۇمىس ورنى) جانە سانيتارلار (1،6 مىڭ بوس جۇمىس ورنى) سۇرانىسقا يە ماماندىقتاردىڭ قاتارىنا ەندى. سونىمەن قاتار، اۆتوبۋس جۇرگىزۋشىلەرىنە (+302 بوس جۇمىس ورنى)، ساۋداگەرلەرگە (+253 بوس جۇمىس ورنى) جانە ساتۋشى-كەڭەسشىلەرگە (+189 بوس جۇمىس ورنى) سۇرانىس ارتتى.
بوس جۇمىس ورىندارىندا ەڭ جوعارى جالاقى باس قۇرىلىسشىلارعا (ورتا ەسەپپەن 709 مىڭ تەڭگەدەن باستاپ)، ۇڭعىمالاردى جوندەۋ شەبەرلەرىنە (700 مىڭ تەڭگەدەن باستاپ) جانە بۇرعىلاۋ ينجەنەرلەرىنە (597 مىڭ تەڭگەدەن باستاپ) ۇسىنىلدى.
ەڭ كوپ جالاقىنى ونەركاسىپتىك جابدىقتار بويىنشا مەحانيك (ورتا ەسەپپەن 1،6 ملن تەڭگەدەن باستاپ)، IT سالاسىنداعى عىلىمي قىزمەتكەر (1،4 ملن تەڭگە) جانە ءونىمدى ازىرلەۋ جونىندەگى جوبالار جەتەكشىسى (1،3 ملن تەڭگە) لاۋازىمدارىنا ۇمىتكەرلەر سۇرادى.
وسىلايشا، ەەب مالىمەتتەرى بويىنشا، ناۋرىز ايىندا بوس جۇمىس ورىندارى مەن تۇيىندەمەلەر سانىنىڭ ازايۋى بايقالدى، بۇل رەتتە سۇرانىس پەن ەڭبەك ۇسىنىسى اراسىنداعى الشاقتىق ارتتى.