اسپالى جولدىڭ تەحنيكالىق جاي-كۇيىنە مونيتورينگ جاسايتىن جۇيەدەن اقاۋ شىقتى.
الەۋمەتتىك جەلىدە «مەدەۋ – شىمبۇلاق» اسپالى جولىندا كابينالاردا ادامدار قالىپ قويعانى تۋرالى ۆيدەو تارادى. تاۋ شاڭعىسى كۋرورتىنىڭ باسپا ءسوز قىزمەتى وقيعاعا قاتىستى تۇسىنىك بەردى، دەپ حابارلايدى Almaty-akshamy.kz قازاقپاراتقا سىلتەمە جاساپ.
تارالعان ۆيدەولارعا سۇيەنسەك، فۋنيكۋلەر اسپالى جولدا تۇرىپ قالعان. كابينالاردا 2،5 ساعات وتىرۋعا ءماجبۇر بولعان تۋريستەر تەك كەش باتا تومەنگە تۇسىرىلگەن.
تاۋ شاڭعىسى كۋرورتىنىڭ باسپا ءسوز قىزمەتىنەن ءمالىم ەتكەندەي، 9 جەلتوقسان كۇنى «مەدەۋ – شىمبۇلاق» اسپاجولى تەحنيكالىق اقاۋعا بايلانىستى ساعات 16:30 – 17:15 ارالىعىندا، ياعني 45 مينۋتقا توقتاتىلدى. ونىڭ سەبەبى – اسپالى جولدىڭ تەحنيكالىق جاي-كۇيىنە مونيتورينگ جاسايتىن جۇيەدەگى اقاۋ. ورتالىق پۋنكتكە مالىمەتتەردىڭ ءتۇسۋى توقتاعاننان كەيىن، اسپالى جولدىڭ جۇمىسى دا توقتاعان.
«توقتاۋ كەزىندە «مەدەۋ – شىمبۇلاق» اسپالى جولىندا قالىپ قويعان قوناقتاردى ءتۇسىرۋ ءۇشىن ساعات 17:15-تە رەزەرۆتى رەجيمگە كوشۋ جانە ىسكە قوسۋ جۇرگىزىلدى جانە بۇل «شىمبۇلاق» تاۋ-شاڭعى كۋرورتىنىڭ تەحنيكالىق بريگاداسى اقاۋدى تولىق جويعانشا جالعاستى. ساعات 18:30-دا اقاۋ تولىعىمەن جويىلىپ، اسپالى جول شتاتتى رەجيمدە جۇمىسىن جالعاستىردى»، - دەدى مەكەمەدەن.
سونداي-اق حابارلانعانداي، وسى ۋاقىت ارالىعىندا اسپالى جولداعى فۋنيكۋلەرعا وتىرۋ ءۇشىن كەزەكتە تۇرعان تۋريستەرگە تەگىن ءشاي بەرىلگەن. ال ءدامحانالار ءوز جۇمىس رەجيمىن ۇزارتقان. ودان بولەك، بالالارى بار قوناقتارعا «مەدەۋگە» دەيىن قىزمەتتىك كولىكپەن ترانسفەر ۇيىمداستىرىلعان.
«وسىنداي وقيعالاردىڭ قايتالانۋ ءقاۋپىن ازايتۋ جانە ۇقساس جاعدايلار كەزىندە كۋرورت قوناقتارىنىڭ ديسكومفورتىن تومەندەتۋ ءۇشىن قاجەتتى شارالار قابىلداندى. سونىڭ ىشىندە اسپالى جولداعى ءاربىر كابيناعا شتاتتان تىس جاعدايلار ءۇشىن قۇتقارۋ قوبديشالارىن (جامىلعى، وزدىگىمەن قىزدىرىلاتىن اياق كيىم توسەنىشى، بۇزىلمايتىن تىسكەباسار، دارىلىك پرەپاراتتاردان: بەلسەندىرىلگەن كومىر، قىزۋ تۇسىرەتىن، اللەرگيا مەن ديارەياعا قارسى دارى-دارمەك، كوزگە ارنالعان تامشىلار) قويۋ جۇمىستارى جۇرگىزىلىپ جاتىر.
كۋرورت اكىمشىلىگى كەلتىرىلگەن ىڭعايسىزدىق ءۇشىن كەشىرىم سۇرايدى»، - دەپ قوستى مەكەمەنىڭ باسپا ءسوز قىزمەتىنەن.