ءماجىلىس سپيكەرى ەقىۇ-نىڭ پرەزيدەنت سايلاۋى تۋرالى قورىتىندىسىنا پىكىر ءبىلدىردى
«بىرىنشىدەن، مۇنى ۇيىمنىڭ سىنى ەمەس، ۇسىنىمى دەپ ءتۇسىنۋ كەرەك. ەكىنشىدەن، "بىتكەن ىسكە سىنشى كوپ" دەگەن ءسوز بار. سوندىقتان، ءبىز ءوزىمىز ءۇشىن كىمنىڭ پىكىرى ماڭىزدى ەكەنىن ايقىنداپ الۋىمىز كەرەك. مەنىڭشە، بىزگە قازاقستان حالقىنىڭ پىكىرى ماڭىزدى. قازاقستان حالقى قاسىم-جومارت كەمەلۇلىنا باسىم كوپشىلىكپەن ءوزىنىڭ سەنىمىن، قولداۋىن كورسەتتى. ءادىل ءارى تازا سايلاۋ ءوتتى. بۇعان ەشكىمنىڭ ەشقانداي كۇمانى جوق شىعار دەپ مەن ويلايمىن»، - دەدى ءماجىلىس ءتوراعاسى.
سونداي-اق، ول سايلاۋدىڭ الدىندا ەل ارالاپ، حالىقتىڭ قازىرگى پرەزيدەنتتىڭ ساياساتىنا دەگەن ۇستانىمى قانداي ەكەنىن كورىپ قايتقانىن ەسكە سالدى.
«ءبىز بازارلارعا بارىپ، جۇمىسسىز جۇرگەن جاستارمەن كەزدەستىك. شاحتالارعا دەيىن تۇستىك. بۇكىل جەرگە بارساق تا، قولداۋ بولدى. قوعامدىق ۇيىمدارمەن، ءارتۇرلى پىكىرى بار ازاماتتارمەن كەزدەستىك. ءيا، سىن بار. ءيا، كەيبىر ماسەلەلەرگە بايلانىستى اركىمنىڭ ءوز پىكىرى بار. ءبىراق تۇپتەپ كەلگەندە، قازاقستانعا ءبىرىنشى كەزەكتە تۇراقتىلىق، الماعايىپ زاماندا اۋماعىمىزدىڭ، تۇتاستىعىمىزدىڭ ساقتالعانى كەرەك. سىرتتا بولىپ جاتقانداردى ىشىمىزگە كىرگىزىپ الماۋىمىز كەرەك. وسىنى سىزدەر دۇرىس تۇسىنۋلەرىڭىز كەرەك»، - دەدى ەرلان قوشانوۆ.
ءماجىلىس ءتوراعاسى كەزەكتەن تىس وتكەن پرەزيدەنت سايلاۋىنا 35-كە جۋىق ەلدىڭ وكىلدەرى كەلىپ، ونىڭ كوبى وڭ باعاسىن بەرگەنىن ايتتى.
«ال ەگەر سىن-پىكىرلەر بولسا، وعان سىرتقى ىستەر مينيسترلىگى ءوزىنىڭ پىكىرىن، جاۋابىن ايتتى. ءسىم ءوزىنىڭ كەلىسپەيتىنىن ايتتى. باسەكەلەستىك بولدى. بەس ازاماتتى قالايشا باسەكەگە لايىق ەمەس دەپ، ولاردى تومەندەتۋگە، قۇقىعىن شەكتەۋگە بولادى؟ سولاي بولا ما؟ ەقىۇ-نىڭ بۇعان دەيىن بەرگەن ترافارەتتى ۇسىنىمدارىنىڭ كوبى ەسكەرىلدى. كەيبىر جەرىندە پسيحيكالىق اۋىتقۋى بار ازاماتتاردىڭ دا داۋىسىن ەسەپتەۋ كەرەك دەيدى. وسى بويىنشا سىنايدى. ونى قابىلداۋ كەرەك پە، جوق پا؟ ءوز ۇستانىمىمىز، كوزقاراسىمىز بار. ءبىز ەگەمەندى ەلمىز عوي»، - دەدى سپيكەر.