بىشكەكتە قازاق پەن قىرعىزدىڭ «كەلىسىم» دوستىق اللەياسى اشىلدى

قىرعىزستاندا دوستىق اللەياسى پايدا بولدى

قوس ەلدىڭ تاۋەلسىزدىك العانىنا 30 جىل تولۋىنا ورايلاستىرىلعان «كەلىسىم» اللەياسىنىڭ اشىلۋ سالتاناتىنا قازاقستان ەلشىسى راپيل جوشىبايەۆ، قىرعىزستان جوعارى كەڭەسىنىڭ سپيكەرى تالانت مامىتوۆ، بىشكەك قالاسىنىڭ مەرى ايبەك دجۋنۋشالييەۆ جانە پارلامەنت دەپۋتاتتارى قاتىستى، دەپ حابارلايدى Almaty-akshamy.kz. مۇندا ەكى ەلدىڭ دوستىق قارىم-قاتىناسىنىڭ بەلگىسى رەتىندە تيان-شان شىرشاسىنىڭ 40 كوشەتى ەگىلدى. بۇل اعاش 300 جىلعا دەيىن ءومىر سۇرەدى.

«ەلىمىز بيىل تاۋەلسىزدىگىنىڭ 30 جىلدىعىن اتاپ ءوتىپ جاتىر. سوندىقتان دوستىق اللەياسىن ءدال وسى كەزدە اشىپ جاتقانىمىزدىڭ وزىندىك ءبىر ءمانى بار. ءبىزدىڭ حالقىمىز رۋحى مەن مادەنيەتى جاعىنان ۇقساس. قۇندىلىقتارىمىز دا ورتاق. سوندىقتان ءبىر-بىرىمىزدى جاقسى تۇسىنەمىز. جاڭا ساياباقتا اندەرىمىز شىرقالىپ، مەرەكەلىك كۇندەردى سول جەردە اتاپ وتسەك، تاماشا بولار ەدى»، - دەدى قىرعىزستان پارلامەنتىنىڭ سپيكەرى تالانت مامىروۆ. 

«بۇل اللەيانىڭ اشىلۋى باۋىرلاس ەكى حالىقتىڭ مىزعىماس دوستىعىن ايشىقتايدى. قازاق-قىرعىزدىڭ رۋحى ءبىر. ءبىزدىڭ حالقىمىزدى تەرەڭنەن تامىر تارتقان باۋىرلاستىق، دوستىق، مادەني-ەكونوميكالىق قاتىناستار بايلانىستىرادى. سوندىقتان اللەيانىڭ اشىلۋىنىڭ سيمۆولدىق ءمانى زور. بۇل - ءبىزدىڭ دوستىعىمىزدىڭ بەلگىسى»، - دەدى قىرعىزستانداعى قازاق دياسپوراسىنىڭ باسشىسى گۇلشات اسىلبايەۆا.