سوزدىكتە قاتە قولدانىستاردىڭ تۋىنداۋ سەبەبى ايقىندالىپ، دۇرىس نۇسقاسى كورسەتىلگەن.
مەملەكەت باسشىسى قاسىم-جومارت توقايەۆتىڭ العىسوزىمەن بۇقارالىق اقپارات قۇرالدارى ماماندارىنا ارنالعان «سوزتۇزەر» سوزدىگى جارىق كوردى، دەپ حابارلايدى Almaty-akshamy.kz
«ءتىل - ۇلتتىڭ وزەگى. وندا حالقىمىزدىڭ بۇكىل ءبىتىم-بولمىسى كورىنىس تاپقان. باي ءارى شۇرايلى ءتىلىمىز ۇرپاقتان ۇرپاققا جالعاسىپ، ەلىمىزبەن بىرگە جاساپ كەلەدى. شىن مانىندە ءتىل - جاندى اعزا ىسپەتتى، ۇدايى جاڭارىپ وتىرادى. زامان تالابىنا ساي جاڭا سوزدەر قوسىلادى. كەيبىرى كونەرىپ، سيرەك قولدانىلا باستايدى. بۇل - زاڭدى قۇبىلىس. ءبىز ءۇشىن ەڭ باستىسى - قاستەرلى ءتىلىمىزدىڭ عاسىرلار بويى قالىپتاسىپ، ۋاقىت سىنىنان سۇرىنبەي وتكەن تابيعاتىن بۇزباي ودان ءارى دامىتا ءتۇسۋ. ساۋاتتى جازىپ، دۇرىس سويلەي بىلەتىن حالىقتىڭ ءتىلى عۇمىرى بولادى. سونداي-اق كەز كەلگەن سالادا ەمىن-ەركىن قولدانىلادى. تاۋەلسىزدىك جىلدارىندا انا ءتىلىمىزدىڭ ءورىسى كەڭەيە ءتۇستى. ءبىلىم مەن عىلىمنىڭ، ينتەرنەت پەن بيزنەستىڭ تىلىنە اينالدى»، - دەپ اتاپ ءوتتى مەملەكەت باسشىسى.
دەگەنمەن قاسىم-جومارت توقايەۆ اقپاراتتىق تەحنولوگيالاردىڭ زاردابىن تيگىزەتىن تۇستارى دا جوق ەمەس ەكەندىگىن باسا ايتادى.
«قازىرگى جاستار ادەبي شىعارما وقىعاننان گورى ءتىل مادەنيەتىنىڭ تالاپتارى ساقتالا بەرمەيتىن الەۋمەتتىك جەلىدە وتىرعاندى ءجون كورەدى. بۇل وسكەلەڭ ۇرپاقتىڭ دۇرىس جازىپ، سويلەي ءبىلۋ قابىلەتىنە كەرى اسەرىن تيگىزۋدە. ءتىل تازالىعىن ساقتاۋ ىسىندە بۇقارالىق اقپارات قۇرالدارى ەرەكشە ءرول اتقارادى. جۇرتتىڭ ءبارى مامان ەمەس. جۋرناليستەر قاي ءسوزدى نەمەسە تەرميندى قالاي قولدانىسا كوپشىلىك سولاي كەرەك دەپ قابىلدايتىندىعى جاسىرىن ەمەس. سوندىقتان مەديا سالاسى قىزمەتكەرلەرىنىڭ ءسوز ونەرىن جەتىك مەڭگەرۋى اسا ماڭىزدى»، - دەدى ق ر پرەزيدەنتى.
مەملەكەت باسشىسى وكىنىشكە قاراي، اقپارات قۇرالدارىندا سوزدەر مەن تىركەستەردى ورىنسىز نەمەسە قاتە قولدانۋ فاكتىلەرى ءجيى كەزدەسەتىندىگىنە نازار اۋدارتادى.
«بۇل كەمشىلىكتى دەر كەزىندە تۇزەتۋ - ماڭىزدى مىندەت. وسىعان وراي ارنايى سوزدىك جاسالىپ، كوپشىلىككە ۇسىنىلىپ وتىر. مۇندا سوزدەردى قاتە قولداۋدىڭ 2 مىڭنان استام ناقتى مىسالى جيناقتالعان. ونىڭ ءبارى - اقپارات قۇرالدارىنان ءوزىمىز كۇندەلىكتى كورىپ جۇرگەن مىسالدار. سوزدىكتە قاتە قولدانىستاردىڭ تۋىنداۋ سەبەبى ايقىندالىپ، دۇرىس نۇسقاسى كورسەتىلگەن. بۇل ەڭبەكتىڭ ەرەكشەلىگى مەن پراكتيكالىق قۇندىلىعى وسىندا. وسى سوزدىكتى دايىنداعان بىلىكتى ماماندارعا ريزاشىلىعىمدى بىلدىرەمىن. «سوزتۇزەر» ب ا ق سالاسى ماماندارىنىڭ عانا ەمەس قالىڭ كوپشىلىكتىڭ يگىلىگىنە جارايدى دەپ سەنەمىن»، - دەدى قاسىم-جومارت توقايەۆ.