الماتى پوليسەيلەرى ەسىرتكى جاسىردى دەگەن كۇدىكپەن قىز بەن جىگىتتى ۇستادى

بۇل فاكت بويىنشا تەرگەۋدى الاتاۋ اۋداندىق پوليسيا باسقارماسى جۇرگىزىپ جاتىر.

الماتى پوليسەيلەرى كۇدىككە ىلىنگەن جاستاردى ۇستادى. مامانداردىڭ ايتۋىنشا، ولار «سينتەتيكانى» قويىپ جاتقان جەرىنەن قولعا ءتۇستى، دەپ حابارلايدى Almaty-akshamy.kz.

ىشكى ىستەر مينيسترلىگىنىڭ رەسمي سايتىنداعى مالىمەت بويىنشا، 24 جاستاعى ك.ەسىمدى ازامات جانە ونىڭ 20 جاستاعى سەرىگى پريكانالنايا كوشەسىندە جەدەل قىزمەتكەرلەردىڭ كوزىنە تۇسكەن. 

«جاستاردىڭ ءىس-قيمىلى كۇدىكتى بولىپ كورىندى. ءبىر قاراعاندا، ولار قاراڭعىدا بىردەڭە ىزدەگەندەي بولدى. ءبىراق ءىس جۇزىندە، كەرىسىنشە – ولار تۇتىنۋشىمەن الدىن الا كەلىسىلگەن جەرگە “جىلدامدىق” ەسىرتكىسىن جاسىرعان. جەكە ءتىنتۋ كەزىندە ولاردان زاتتاي 15 بۋما تابىلدى جانە تاركىلەندى، كىمگە تيەسىلى ەكەندىگى مەن شىعۋ تەگىن سوت-حيميالىق ساراپتاما انىقتايتىن بولادى»، – دەدى الماتى قالالىق پد ەسىرتكى قىلمىسىنا قارسى كۇرەس باسقارماسىنىڭ باستىعى ەرلان الماعامبەتوۆ.

مامانداردىڭ ايتۋىنشا، بۇل فاكت بويىنشا تەرگەۋدى الاتاۋ اۋداندىق پوليسيا باسقارماسى جۇرگىزىپ جاتىر. ق ر قك-نىڭ 296-بابى 4-بولىگىمەن قىلمىستىق ءىس قوزعالدى.