الەۋمەتتىك جەلىلەردە ەكس-شەنەۋنىكتىڭ تۇرمەدەن قاشقانى تۋرالى اقپارات جەلدەي ەسىپ، ءتىپتى بۇرىننان بەرى بوستاندىقتا ەكەنى نەمەسە شەتەلدە جۇرگەنى تۋرالى بولجامدار پايدا بولا باستادى.
الايدا قاجك سوتتالۋشىنىڭ قاشىپ كەتكەنى تۋرالى اقپاراتتى جوققا شىعاردى، دەپ حابارلايدى aqshamnews.kz
Orda.kzء-تىڭ جازۋىنشا، قۇقىق قورعاۋشى باۋىرجان مۋسين قۋاندىق بيشىمبايەۆتىڭ ارشالى تۇرمەسىندە ءبىر كۇن دە بولماعانىن ايتقان.
ەكس-مينيستردىڭ «جۇمباق جوعالۋى» تۋرالى AIRAN اقپاراتتىق رەسۋرسىنىڭ جۋرناليستەرى حابارلادى. ولاردىڭ مالىمەتىنشە، سوتتان كەيىن بيشىمبايەۆ ارشالى اۋىلىنا جاقىن كولونياعا جىبەرىلۋى كەرەك بولعان. تەلەارنانىڭ ءتۇسىرىلىم توبى جاقىندا سوتتالۋشىنىڭ راسىمەن سول جەردە بار-جوعىن تەكسەرۋگە بارىپ ونى تابا الماعان.
«بۇل سوتتالۋشى ماكسيمالدى قاۋىپسىزدىك مەكەمەسىندە جازاسىن وتەپ جاتىر. جالعان اقپارات تاراتۋ فاكتىسى بويىنشا قىلمىستىق ءىس قوزعالعانىن جانە كىنالىلەر جاۋاپكەرشىلىككە تارتىلاتىنىن حابارلايمىز»،-دەپ مالىمدەدى قاجك.
«ول ستەپنوگورسك قالاسىنىڭ №5 مەكەمەسىندە، ءتورتىنشى وتريادتا وتىر. ءبىزدىڭ ەلىمىزدە جازانى وتەۋ ورنىن مەكەمەنىڭ تولىمدىلىق دەڭگەيىنە قاراي تاڭدايدى. ادامنىڭ قاي جەردە وتىراتىنى تەك ونىڭ تۋىستارىنا عانا ايتىلادى، قاجك بۇل تۋرالى قوعامعا حابارلاۋعا مىندەتتى ەمەس»،-دەدى باۋىرجان مۋسين.
كەيبىر دەرەككوزدەر جالعان اقپارات تاراتۋ فاكتىسى بويىنشا قىلمىستىق ءىس قوزعالعانىن حابارلايدى، ءبىراق رەسمي دەرەككوزدەر بۇل اقپاراتتى ازىرگە راستاعان جوق.