اۆتونومدى كىتاپحانا قالا تۇرعىندارىنا كىتاپحاناعا بارماي-اق كىتاپ الىپ وقۋعا مۇمكىندىك بەرەدى.
ولاردىڭ بىرنەشەۋى ءقازىردىڭ وزىندە جاقسى جۇمىس ىستەپ تۇر. العاشقى اۆتونومدى كىتاپحانا جاستار ورتالىعىندا ورناتىلعان. كىتاپ الۋ ءۇشىن وقىرمان بيلەتى كەرەك، دەپ حابارلايدى aqshamnews.kz 24.kz-كە سىلتەمە جاساپ.
بيلەتتى سول جەردەگى كىتاپحانا قىزمەتكەرىنەن دە راسىمدەپ الۋعا بولادى. بارلىق قىزمەت تەگىن. كاتولوگتان قاجەتتى اۆتوردى تاڭداي الاسىز. اۆتومات ءوتىنىشتى تىركەپ، كىتاپتى شىعارىپ بەرەدى. ونى كەيىنىرەك كىتاپحاناعا دا، قۇرىلعىعا دا قايتارۋعا بولادى. قولدانۋ مەرزىمى 14 كۇن.
گۇلميرا اسىلبەك قىزى، الماتى قالاسىنىڭ تۇرعىنى:
- مىناداي جاقسى نارسە ۇيمداستىرىلىپ قالا بويىنشا قويىلىپ جاتىر ەكەن. سونى ەستىپ ارنايى كەلىپ، وزىمە قاجەتتى كىتاپتى العان جايىم بار. بۇل وتە كىتاپسۇيەر قاۋىم ءۇشىن قاجەت.
قاجەتتى ادەبيەتتى الماتى كىتاپحانالارى سايتىنا كىرىپ تە تاپسىرىس بەرۋگە بولادى. ونىڭ قورىندا ءارتۇرلى جانرداعى 3 ملن كىتاپ بار. بۇل قاۋىرت تىرلىكتەن قولى بوسامايتىن قالا تۇرعىندارى ءۇشىن وتە قولايلى. كىتاپ وقۋ مادەنيەتىن ارتتىرادى.
مەيرام بەكتەنبايەۆ، الماتى قالاسى ورتالىقتاندىرىلعان كىتاپحانالار جۇيەسىنىڭ ديرەكتورى
- قالادا كىتاپحانا كوپ ەمەس. ولارعا بارىپ، كىتاپ وقۋعا وقىرماننىڭ ۋاقىتى بولا بەرمەيدى. جالپى بۇل الەمدە بار تاجىريبە. ءبىراق ەلىمىزدە العاشقى دەربەس كىتاپحانا ەندى عانا ىسكە قوسىلىپ وتىر. كىتاپتاردى دەزينفەكسيالاۋ امالىن قاراستىردىق. ول ءۇشىن تازالاعىش زاتتاردى ساتىپ الۋىمىز كەرەك.
وزىنە-وزى قىزمەت كورسەتۋ كىتاپحانالارى قالاداعى ەكى ساۋدا ورتالىعىندا جانە مەكتەپتە دە ءساتتى جۇمىس ىستەپ تۇر. الداعى ۋاقىتتا مەترو ستانسيالارىندا، حالىققا قىزمەت كورسەتۋ ورتالىقتارىندا جانە باسقا دا قوعامدىق ورىنداردا 20 قۇرىلعى ورناتىلادى.