ىشكى ىستەر ءمينيسترىنىڭ ورىنباسارى، قىلمىستىق-اتقارۋ جۇيەسى كوميتەتىنىڭ (قاجك) ءتوراعاسى اباي قايىربەكوۆ ۇلتتىق ەكونوميكانىڭ ەكس-مينيسترى قۋاندىق بيشىمبايەۆتىڭ جازاسىن وتەۋ ءتارتىبى جايلى ايتتى، دەپ حابارلايدى Aqshamnews.kz ءتىلشىسى Tengrinews.kz تىلشىسىنە سىلتەمە جاساپ.
اباي قايىربەكوۆتىڭ سوزىنشە، بيشىمبايەۆ تۇزەۋ مەكەمەسىندە "باسقا سوتتالعاندارمەن بىردەي جاعدايدا" وتىر.
"بيشىمبايەۆ قىلمىستىق-اتقارۋ زاڭناماسىنىڭ بارلىق تالاپتارىنا ساي، وزگە سوتتالعاندارمەن تەڭ نەگىزدە جازاسىن وتەپ جاتىر"، - دەدى قاجك ءتوراعاسى.
ەكس-مينيستردىڭ ەڭبەككە ورنالاسۋى مەن تابىسىنا قاتىستى سۇراققا ۆيسە-مينيستر بۇل مالىمەتتەر جەكە دەرەكتەر ساناتىنا جاتاتىنىن ايتىپ، تۋىستارى مەن ادۆوكاتتارىنا عانا بەرىلەتىنىن جەتكىزدى.
"جالپى ايتارىم: ءبىزدىڭ مەكەمەلەردە سوتتالعانداردىڭ شامامەن جارتىسى ەڭبەككە تارتىلعان. بيىل جۇمىسپەن قامتىلعاندار سانىن 3 مىڭ ادامعا ارتتىردىق، بۇل جۇمىستى جالعاستىرامىز"، - دەدى ول.
جۋرناليستەردىڭ "بيشىمبايەۆ جەكە كامەرادا وتىر ما؟" دەگەن ساۋالىنا قايىربەكوۆ:
"ايتقانىمداي، ول جالپى نەگىزدە، باسقا سوتتالعاندارمەن بىرگە جازاسىن وتەپ جاتىر. اتالعان سوتتالعانعا قانداي دا ءبىر ەرەكشە جاعداي، جەڭىلدىك نەمەسە ارنايى تالاپ قاراستىرىلماعان"، - دەپ جاۋاپ بەردى.
ەسكە سالايىق، وتكەن جىلعى 13 مامىردا استانادا سالتانات نۇكەنوۆانىڭ ولىمىنە قاتىستى سوت پروسەسى اياقتالدى. ۇلتتىق ەكونوميكا مينيسترلىگىنىڭ بۇرىنعى باسشىسى قۋاندىق بيشىمبايەۆ جۇبايىن ازاپتاپ ولتىرگەنى ءۇشىن كىنالى دەپ تانىلىپ، 24 جىلعا باس بوستاندىعىنان ايىرىلعان ەدى.