ەلىمىزدىڭ ءبىرقاتار وڭىرىندە اق تۇتەك بوران ءالى باسىلعان جوق.
ەلىمىزدىڭ ءبىرقاتار وڭىرىندە اق تۇتەك بوران ءالى باسىلعان جوق. قولايسىز اۋا رايى سالدارىنان تاس جولداردىڭ 61 ۋچاسكەسىندە قاتىناۋ ۋاقىتشا توقتاتىلدى، دەپ حابارلايدى Almaty-akshamy.kz Almaty.tv-گە سىلتەمە جاساپ.
توتەنشەلىكتەر جولدى قالىپقا كەلتىرۋگە كۇش سالعانىمەن، قىس قاھارى قاتتى بولىپ تۇر. ماماندار سوڭعى ءبىر تاۋلىكتە ەسكەرتۋگە قاراماستان، جولعا شىعىپ كەتكەن 40-قا جۋىق ادامدى امان الىپ قالعان. ولاردىڭ قاتارىندا بالا دا بار.
توتەنشەلىكتەردىڭ اق تۇتەك بورانمەن ارپالىسقالى ءتورتىنشى تاۋلىك. ءقازىر ەلدەگى رەسپۋبليكالىق اۆتوجولداردىڭ 21 ۋچاسكەسىندە كولىك قوزعالىس شەكتەتىلگەن. شىعىستا جاعداي سوڭعى تاۋلىكتە قيىنداي تۇسكەن. ۇلىتاۋ مەن قوستاناي، جەزقازعان مەن پەتروپاۆل اراسىن جالعاعان اۆتوجولدا كولىكتىڭ بارلىق تۇرىمەن قاتىناۋ توقتاتىلدى.
«وسى ءبىر جەتىنىڭ ىشىندە ءبىرىڭعاي 1403 كولل-ورتالىعى 40 مىڭنان استام قوڭىراۋدى قابىلدادى. ونىڭ بارلىعى جولدا قالىپ قويعان كولىكتەر، كومەك سۇراعاندار، رەسپۋبليكالىق ماڭىزى بار جولدار تۋرالى اقپارات العىسى كەلەتىن تۇرعىنداردان كەلىپ ءتۇستى»، – دەدى «قازاۆتوجول» ۇك رەسمي وكىلى ءلاززات ستامعازييەۆا.
كۇن رايى قولايسىزدىعىن جولاۋشىلارعا عانا ەمەس، مەكتەپ وقۋشىلارىنا دا تيگىزدى. بۇگىن ءۇشىنشى توقساندى ءبىرقاتار وڭىردە بالالار ونلاين وقىپ باستادى. قاتتى اياز سالدارىنان سولتۇستىك قازاقستان وبلىسى مەن قوستاناي، سەمەي، استانادا 1 مەن 9 سىنىپ وقۋشىلارى قاشىقتان ءبىلىم بەرۋ فورماتىنا اۋىستىرىلعان. بۇل تاعى 2-3 كۇنگە سوزىلۋى مۇمكىن. سەبەبى «قازگيدرومەت» ماماندارى الداعى كۇندەرى بارلىق وڭىردە قالىڭ قار جاۋىپ، كۇن كۇرت سۋىتادى دەپ بولجاپ وتىر.
«اۋا تەمپەراتۋراسى ەلىمىزدىڭ باتىسىندا تۇندە 27-33، كۇندىز 15-25 گرادۋس اياز، وڭتۇستىك-باتىسىندا تۇندە 12-23، كۇندىز 5-15-كە دەيىن اياز جانە سولتۇستىك-باتىسىندا 32-40-قا دەيىن ايازدان 20-30 ايازعا دەيىن تومەندەۋى كۇتىلەدى»، – دەدى ينجەنەر-سينوپتيك التىنزەر ەسبۋسينوۆا.
«بىزگە حابارلاما تاڭەرتەن كەلەدى. ءبىرىنشى جانە ەكىنشى اۋىسىمعا اۋا رايى قولايسىزدىعىنا بايلانىستى ساباقتى ونلاين وتۋگە دايىنبىز»، – دەدى د. قونايەۆ اتىنداعى №66 مەكتەپ-ليسەيىنىڭ ءمۇعالىمى ساندۋعاش قۋانىشبەك قىزى.
توتەنشەلىكتەردىڭ اقپارىنشا، كۇن رايىنا قاراماي جولعا شىعىپ كەتەتىندەر كوبەيگەن. سوڭعى تاۋلىكتە قۇتقارۋ قىزمەتى ايازدا توڭىپ، جولدا قالعان 37 ادامدى امان الىپ قالىپتى. اراسىندا كامەلەتكە تولماعان توعىز بالا بار. «مۇنىمەن قوسا، ءقازىر رەسپۋبليكالىق ماڭىزى بار جولدار بويىندا دىتتەگەن جەرىنە جەتە الماي ۇزىن-سونار كەزەكتە تۇرعان كولىكتەر دە از ەمەس»، - دەيدى ماماندار. اباي وبلىسىندا 80، كوكپەكتى – قالباتاۋ باعىتىندا 39، اقتوبەدە 40-قا جۋىق كولىك جينالىپ قالعان.
«وتكەن تاۋلىكتە استانادا 78 جول-كولىك وقيعاسى تىركەلدى. استانا قالالىق پد اۋا رايى جاعدايىنا بايلانىستى جول قوزعالىسىنىڭ بارلىق قاتىسۋشىسىنا بارىنشا مۇقيات بولۋىن ەسكەرتەدى. جۇرگىزۋشىلەرگە كولىكتى جول بويىنا قويماۋعا، قوعامدىق كولىكتەر قوزعالىسىنا كەدەرگى كەلتىرمەۋگە شاقىرامىز»، – دەدى پد جپق باسقارماسى باستىعىنىڭ ورىنباسارى ەرجان ءادiلبەكوۆ.
ماماندار بۇگىن-ەرتەڭ حالىقتى اياز بەن بوراندا الىس جولعا شىقپاۋعا شاقىرادى. بۇگىن استانادان بارلىق باعىتقا شىعاتىن تاسجولدار جابىلعان.