مەملەكەتتىك بيۋدجەتتەن ارنايى قاراجات بەرىلەدى.
وقۋ-اعارتۋ ءمينيسترى اسحات ايماعامبەتوۆ بالاباقشادا تەگىن تاماق كىمدەرگە بەرىلەتىنىن ءتۇسىندىردى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«قازىرگى ۋاقىتتا بىزدە بالاباقشا كەزەگىنە تۇرماعان بىرنەشە ءجۇز مىڭ بالا بار. ولار نەگە كەزەككە تۇرمايدى؟ كەزەككە تۇرماعاننان كەيىن، بالاباقشاعا بارمايدى دەگەن ءسوز. بىزدە بالاباقشالار نەگىزى اقىسىز. ءبىراق تاماققا اتا-انالار وزدەرى تولەيدى. ونىڭ سوماسى ءارتۇرلى. ءبىزدىڭ قيىن جاعدايداعى، از قامتىلعان وتباسىلار وسى قاراجاتتى تابا المايتىنىن، بالاباقشادا بالالالارى تاماقتاناتىن اقشا جوق ەكەنىن ايتىپ، كەزەككە دە قويماي وتىر. سوعان بايلانىستى ول بالالاردىڭ مەكتەپكە دايىندىق، دەنساۋلىق، جاقسى تاماقتانۋ ماسەلەلەرىنە ۇلكەن كەرى اسەرىن تيگىزىپ وتىر»، - دەدى مينيستر.
ۆەدومستۆو باسشىسى بۇل باستاما مەملەكەت باسشىسىنىڭ سايلاۋالدى باعدارلاماسى اياسىندا قولعا الىناتىنىن ەسكە سالدى.
«سايكەسىنشە، وسىنداي وتباسىلار انىقتالىپ، سول بالالارعا مەملەكەتتىك بيۋدجەتتەن ارنايى قاراجات بەرىلىپ، تاماقتانۋ ماسەلەسى دە ولارعا تەگىن بولادى. سوندا بىزدە بىرنەشە ءجۇز مىڭ بالا بالاباقشالارعا بارىپ، جاقسى تاماقتانىپ، دەنساۋلىعىنا دا، وقۋ ۇلگەرىمىنە دە وتە ءتيىمدى بولادى»، - دەدى اسحات ايماعامبەتوۆ.