اقوردا «ۇشتىك گاز وداعىن» قۇرۋ ماسەلەسىن ءتۇسىندىردى

ەگجەي-تەگجەيلى كەلىسسوز جۇرگىزۋ قاجەت.

قازاقستان پرەزيدەنتىنىڭ باسپا ءسوز حاتشىسى رۋسلان جەلدىباي قاسىم-جومارت توقايەۆتىڭ ماسكەۋگە ساپارىندا تالقىلانعان ماسەلەگە تۇسىنىك بەردى، دەپ حابارلايدى Almaty-akshamy.kz.

«مەملەكەت باسشىسىنىڭ ماسكەۋگە جاساعان ساپارىنا قاتىستى بۇقارالىق اقپارات قۇرالدارىنان سۇراقتار كەلىپ ءتۇسىپ جاتىر. وسىعان بايلانىستى كرەملدە وتكەن قازاقستان مەن رەسەي پرەزيدەنتتەرىنىڭ كەلىسسوزى بارىسىندا قازاقستان مەن وزبەكستان تەرريتورياسى ارقىلى رەسەي گازىن تاسىمالداۋ جۇمىسىن ۇيلەستىرۋ ماقساتىندا قۇرامىنا رەسەي، قازاقستان، وزبەكستان كىرەتىن «ۇشتىك گاز وداعىن» قۇرۋ ماسەلەسى قاراستىرىلعانىن اتاپ وتكەن ءجون. قاسىم-جومارت توقايەۆ پەن ۆلاديمير پۋتين بارلىق تاراپتىڭ مۇددەسىن ەسكەرە وتىرىپ، وسى ماسەلەنىڭ ۇتىمدى شەشىمىن تابۋ ءۇشىن ءۇش ەل ساراپشىلارىنىڭ قاتىسۋىمەن ەگجەي-تەگجەيلى كەلىسسوز جۇرگىزۋ قاجەت دەپ سانايدى»، - دەپ جازدى رۋسلان جەلدىباي Facebook پاراقشاسىندا.

ەسكە سالا كەتەيىك، مەملەكەت باسشىسى اپتا باسىندا رەسەيگە رەسمي ساپارمەن بارعان بولاتىن.

مەملەكەت باسشىسى قازاقستان مەن رەسەيدىڭ حVIII ءوڭىرارالىق ىنتىماقتاستىق فورۋمىنا قاتىستى.

سونداي-اق پرەزيدەنت رەسەي باسشىسى ۆلاديمير پۋتينمەن جانە ۇكىمەت باسشىسىمەن كەزدەستى.