اۋىل شارۋاشىلىعى سالاسىنداعى ىقپالداستىقتى دامىتۋ كەرەك - مەملەكەت باسشىسى.
قازاقستان پرەزيدەنتى قاسىم-جومارت توقايەۆ مەملەكەتتەرىمىزدىڭ اگرارلىق الەۋەتىن ءتيىمدى پايدالانۋ كەرەكتىگىن ايتتى. سوندا ەلدەرىمىزدىڭ ازىق-تۇلىك قاۋىپسىزدىگىن ايتارلىقتاي نىعايادى. بۇل تۋرالى ق ر پرەزيدەنتى ءبىرىنشى «ورتالىق ازيا – جۇڭگو» سامميتىندە ءمالىم ەتتى، دەپ حابارلايدى Almaty-akshamy.kz.
«ءقازىر جاھاندىق ازىق-تۇلىك نارىعى ءجيى قۇبىلىپ تۇر. سوندىقتان ءبىز وسى سالاداعى ىنتىماقتاستىقتى نىعايتا تۇسكەنىمىز ءجون. قازاقستان اگروونەركاسىپ ونىمدەرىنىڭ ەكسپورتىن ارتتىرۋعا جانە ونىڭ ءتۇرىن كوبەيتۋگە مۇددەلى. ەلىمىز بيداي جانە ۇن وندىرەتىن الەمدەگى ەڭ ءىرى ون ەلدىڭ قاتارىنا كىرەدى. جىل سايىن 5 ميلليون توننادان استام بيداي مەن 1،5 ميلليون توننا ۇن ەكسپورتتايمىز. شارۋالارىمىز سىرتقا شىعارىلاتىن ءداندى جانە مايلى داقىلداردىڭ كولەمىن ارتتىرۋعا دايىن. ولار ەكولوگيالىق جاعىنان تازا ءارى جوعارى سۇرىپتى ەت پەن ورگانيكالىق ونىمدەردى دە كوپتەپ جەتكىزە الادى. ەسەسىنە، باۋ-باقشا ونىمدەرى مەن ازىق-تۇلىك تاۋارلارىن تۇراقتى ساتىپ الۋعا مۇددەلىمىز. ءبىز مەملەكەتتەرىمىزدىڭ اگرارلىق الەۋەتىن ءتيىمدى پايدالانۋىمىز كەرەك. سوندا ەلدەرىمىزدىڭ ازىق-تۇلىك قاۋىپسىزدىگىن ايتارلىقتاي نىعايتامىز. بۇل قادام ءبارىمىزدىڭ مۇددەمىزگە ساي كەلەدى. وسى رەتتە مەن «قورعاس» حالىقارالىق ساۋدا ورتالىعىندا بىرلەسكەن ازىق-تۇلىك حابىن قۇرۋدى ۇسىنامىن. اگروونەركاسىپ سالاسىندا سيفرلىق جانە «جاسىل» تەحنولوگيالاردى ەنگىزۋ ماسەلەسىنە باسا ءمان بەرگەن ءجون. بۇل ىستە قىتايلىق سەرىكتەستەرىمىزدىڭ تاجىريبەسى مەن مۇمكىندىگى اسا قاجەت»، - دەپ اتاپ ءوتتى مەملەكەت باسشىسى.